JOHANISI 10

₁“Zwino ipfani-ha: Muthu ane a sia u dzhena tshitumbani tsha nngu nga muṋango, tshawe ha vha u fhufhela nga huṅwe, onoyo ndi fobvu, ndi ḽivemu. ₂Ane a dzhena nga muṋango ndi Ene mulisa wa nngu. ₃Onoyo, mulindamuṋango u a mu vulela, mulisa a vhidza nngu dzawe nga madzina, dzone dza mu pfa, a bva nadzo. ₄Musi o no bvisa nngu dzawe dzoṱhe, u dzi ranga phanḓa, dzone dza mu tevhela, ngauri dzi ḓivha ipfi ḽawe. ₅Muṅwe muthu dzi nga si vhuye dza mu tevhela; dzi ḓo tou mu shavha ngauri a dzi ḓivhi ipfi ḽawe.”

₆Yesu a tshi vha vhudza tshifanyiso itsho, vhone a vho ngo ṱalukanya zwine a amba.

₇Yesu a dovha a ri, “Zwino ipfani-ha: muṋango wa tshitumba tsha nngu ndi Nṋe. ₈Vhoṱhe vhomesia vhe vha ḓa ndi sa athu ḓa ndi mafobvu na mavemu; ndi zwe nngu dza si kone u vha thetshelesa.

₉“Muṋango ndi Nṋe. Ane a dzhena nga Nṋe u ḓo tshidzwa; u ḓo dzhena a tshi bva a wana pfulo. ₁₀Tsha fobvu ndi u dzhenela u tswa na u vhulaha na u tshinyekanya fhedzi. Nṋe tshe nda ḓela tshone ndi uri vhathu vha vhe na vhutshilo nga vhuḓalo.

₁₁“Ndi Nṋe mulisa wa ndele. Mulisa wa ndele u kumedza vhutshilo hawe a tshi itela nngu dzawe. ₁₂Muswiswiwa ene a si mulisa wa vhukuma, ngauri nngu a si dzawe; a tshi vhona maṱalerwa a tshi ḓa u a shavha a dzi sia; maṱalerwa a sala a tshi fara dziḽa nngu a dzi balanganya. ₁₃Muswiswiwa u a shavha ngauri ene u lavhelesa malamba fhedzi, nngu ha dzi londi. _14-15Nṋe ndi mulisa wa ndele. Unga Khotsi a tshi nnḓivha na Nṋe ndi tshi mu ḓivha, nngu dzanga ndi dzi ḓivha nga u ralo, na dzone dzi nnḓivha nga u ralo. Hafhu ndi kumedza vhutshilo hanga ndi tshi itela nngu dzanga.

₁₆“Ndi tshee na dziṅwe nngu dzanga dzi sa athu dzhena kha tshino tshitumba. Na dzenedzo ndi fanela u dzi ḓisa; dzi ḓo pfa ipfi ḽanga, dza vha sambi ḽithihi ḽi re na Mulisa muthihi.

₁₇“Ndi zwone zwine Khotsi anga a mpfunela zwone, ngauri ndi kumedza vhutshilo hanga uri ndi dovhe ndi vhu wane. ₁₈A si uri vhutshilo hanga ndi khou tou dzhielwa nga muṅwe. Nṋe muṋe ndi tou vhu kumedza ndi tshi zwi funa. Ndi na maanḓa a u vhu kumedza, nda dovha nda vha na maanḓa a u vhu dzhiulula, ngauri ndo tou laiwa nga Khotsi anga uri ndi ite zwenezwo.”

₁₉Ayo maipfi a dovha a vusa phambano vhukati ha Majuda. ₂₀Vhathu vhanzhi vho vha vha tshi vho ri, “Ni kha ḓi vhuya na ṱolou ḓidinelani nga u mu thetshelesa? O kavhiwa nga thuṅwa ya Saṱhane hoyu muthu! U khou penga!”

₂₁Hone vhaṅwe vha ri, “Muthu a na thuṅwa a nga vhuya a amba nga u tou rali? Nṋa kani-ha thuṅwa i a kona u swingulusa mabofu?”

₂₂Zwino Jerusalema ha mbo swika tshifhinga tsha vhuṱambo ha u elelwa zwa musi thembele i tshi dovha u kumedzwa Mudzimu. Zwenezwo ho vha vhu vhuriha.

₂₃Musi Yesu a tshi khou tshimbila thembeleni, Lukumbini lwa Solomoni, ₂₄Majuda vha mu tanga vha ri, “Nṋa ni ḓo litsha lini u ṱwa no ri tikisa luwa? Arali e inwi Mesia itani u amba zwi pfale.”

₂₅Yesu a fhindula a ri, “Hufha ndo no ḓi ni vhudza na si tende! Mishumo ine nda i ita nga dzina ḽa Khotsi anga i a nṱanzilela; ₂₆hone inwi a ni tendi ngauri a ni nngu dzanga. ₂₇Nngu dzanga dzone dzi thetshelesa ipfi ḽanga; ndi a dzi ḓivha nahone dzi a ntevhela. ₂₈Ndi dzi ṋea vhutshilo vhu sa fheli, a dzi nga vhuyi dza fa, nahone a hu na ane a ḓo dzi thuba dzi na Nṋe. ₂₉Zwe Khotsi anga a mpha zwi fhira zwoṱhe; a hu na ane a nga kona u zwi dzhavhula tshanḓani tshawe. ₃₀Nṋe na Khotsi ri tshithu tshithihi.”

₃₁Majuda vha mbo ḓi dovha vha yo doba matombo vha tshi ri vha mu kanḓe ngao. ₃₂Yesu a vha vhudza a ri, “Ndo ni sumbedza mishumo minzhi mivhuya ye nda shuma nga maanḓa a Khotsi anga; zwino ndi ufhio mushumo une na khou ṱoḓa u mmbulahela wone?”

₃₃Vha fhindula vha ri, “A ri khou ṱoḓa u ni vhulahela mushumo wavhuḓi; ri ṱoḓa u ni vhulahela u tamba haṋu nga Mudzimu! Ni khou ḓiita Mudzimu ni muthu wa ṋama!”

₃₄Yesu a ri, “Hufha kha Mulayo waṋu ho ṅwaliwa maipfi a Mudzimu a u ri, ‘Ni midzimu’! ₃₅Riṋe ri ḓivha uri zwine Maṅwalo a amba zwi ḓi dzula zwi ngoho lini na lini, huno vhenevho vhe Mudzimu a amba navho o ri vha pfi midzimu. ₃₆Arali e Nṋe Khotsi o tou nta a nthuma shangoni. Zwino inwi ni nga amba hani na ri ndi tshi ri ndi Murwa wa Mudzimu ndi khou tamba nga Mudzimu? ₃₇Arali ndi sa khou ita mishumo ya Khotsi anga ni songo mpfulufhela. ₃₈Hone arali ndi tshi khou ita yone, fulufhelani-ha yone mishumo, naho Nṋe ni sa mpfulufheli, ndi hone ni tshi ḓo vhona na mbo ḓi ḓivha tshoṱhe uri Khotsi u kha Nṋe, Nṋe ndi kha Khotsi.”

₃₉Vha dovha vha edzisa u mu fara, hone Ene a sutuka.

₄₀Yesu a dovha a wela mulambo wa Jorodani a humela fhaḽa he Johanisi a vha a tshi lovhedza hone, a dzula henefho. ₄₁Vhathu vhanzhi vha ḓa khae vha tshi ri, “Johanisi a hu na tshiga tsha maḓembe e a ita; naho zwo ralo zwoṱhe zwe a amba nga uyu munna ndi zwone.” ₄₂Henefho vhathu vhanzhi vha mu fulufhela.