Jeremia a tshi amba na Mudzimu: “A hu tshee na khangwelo”
1Muṋe washu u ri,
“Inwi vhathu vha Jerusalema,
tshimbilani na mikoto ya muḓi waṋu
ni tshi gonya ni tshi tsa!
Sedzani hoṱhe-hoṱhe ni elekanye!
Londolosani zwiṱaraṱani!
Arali na wana muthu muthihi zwawe
ane a fulufhedzea,
a no ita zwi re zwone,
zwenezwo Muṋe washu u ḓo hangwela uno muḓi.
2Hone nangwe ni tshi ana nga dzina ḽa Yahavee,
ni ana mazwifhi fhedzi.”
3Ngoho zwine Iwe Muṋe washu wa zwi ṱoḓa
ndi u fulufhedzea.
Wo vha rwa,
vhone vha si pfe tshithu;
wo vha kuya,
vhone vha si tende u laiwa.
Mbilu dzavho dzo oma u fhira matombo,
vha hana u rembuluwa.
4Zwenezwo nṋe nda elekanya nda ri:
Ndi vhashai fhedzi vha no ita hezwo,
a vha na nḓivho,
a vha ḓivhi nḓila ya Muṋe washu,
a vha ḓivhi zwine Mudzimu wavho a zwi funa,
5tshani ndi ye ha vharangaphanḓa ndi ambe navho,
vhone vha ḓivha nḓila ya Muṋe washu,
vha ḓivha zwine Mudzimu a funa.
Mathina na vhone vho pfana vhoṱhe,
vha vunḓa dzhogo yawe,
vha khathula thambo dzawe.
6Muṋe washu a ri,
“Ndi zwine maswina a havha vhathu
a ḓo vha fhufhela unga ndau i tshi bva maṱakani,
a vha phusukanya unga maṱalerwa a tshi bva phangani,
a vha lalela tsini ha miḓi yavho unga nngwe,
ya ponda ane a vhuya a linga u bvela nnḓa;
ngauri ndi kanzhi vha tshi shandukela Mudzimu
vha pambuwa nḓila.
7Ndi nga ni hangwela hani?
Vhana vhaṋu vho nṱamba,
vha ana nga midzimu i si tshithu.
Ndo vhofha mulanga navho nda tou vha anisa,
vhone vha ntshandukela vha ita vhupombwe,
vha kuvhangana nḓuni dza dziphombwe.
8Vha nga bere dza mboho dzo nonaho,
vha emula vhasadzi vha vhaṅwe vhanna,
muṅwe na muṅwe a lila unga bere i tshi ṱoḓa tsadzi.
9A tho ngo fanela u vha rwela zwenezwo naa?
Lushaka lwo raloho a tho ngo fanela u lu lifhedza naa?
10Ndi ḓo ruma maswina a remekanya minḓirivhe
ya vhathu vhanga,
hone a si i remekanye tshoṱhe.
Ndi ḓo ri vha ṱangule matavhi,
ngauri a si anga.
11Nnḓu ya Israele na nnḓu ya Juda vho ntshandukela tshoṱhe!
Ho amba Nṋe Yahavee.”
Vhaisraele vha tshi rwelwa u ḓifulufhela havho
12Vha nyadza Muṋe washu vha ri,
“A nga si ri ite tshithu!
A hu na tshi no ḓo ri wela;
a ri nga fi nga pfumo kana nga nḓala;
13vhaporofita vha tou vha muya u fhungaho,
zwine vha amba a zwi bvi kha Muṋe washu;
zwine vha amba nga zwi vha wele vhone vhaṋe!”
14Ndi zwine Muṋe washu Mudzimu Mulangazwoṱhe
a amba na nṋe a ri,
“Jeremia, nge avha vhathu vha amba nga u ralo,
ndi ḓo ita uri maipfi anga a nge mulilo
u tshi bva mulomoni wau,
u fhise havha vhathu unga khuni.”
15Muṋe washu u ri,
“Ndi khou ḓisa lushaka lu no bva kule
uri lu ḓe lu ni die,
ndi lushaka lwa kale lu re na maanḓa a sa konadzei,
lu no amba luambo lune na si lu ḓivhe,
zwine vha amba ni nga si zwi pfe.
16Mikutu yavho i nga zwalo zwo aṱamaho,
vhanna vhavho vhoṱhe ndi vhomakone vha nndwa.
17Vha ḓo ḽa khaṋo yaṋu ya zwiḽiwa,
vha vhulaha vhana vhaṋu vha vhatuka na vha vhasidzana,
vha fhedza masambi aṋu a nngu na a kholomo,
vha ḽa minḓirivhe yaṋu na mihuyu.
Miḓi ya vhushavhelo ine na i fulufhedza
vha ḓo i phusukanya nga pfumo.”
Ṱhamu i tevhedza vhutshinyi
18Muṋe washu u ri, “Na misi yeneyo a thi nga lozwi vhathu vhanga tshoṱhe. 19Arali vha u vhudzisa vha ri, ‘Yahavee Mudzimu washu ndi mini a tshi ri ita nga u rali?’ iwe Jeremia u vha fhindule u ri, ‘Yahavee u ri: Vhunga no nṱamba na luvha midzimu isili shangoni ḽaṋu, zwino ni vho ḓo shumela vhatsinda shangoni ḽisili.’ ”
Khundavhalai
20Muṋe washu u ri,
“Ḓivhadzani vha nnḓu ya Jakopo,
ni vhudze vhathu vha Juda ni ri,
21‘Yahavee u ri:
Edzonu pfa, inwi matsilu a sa ṱalukanyi tshithu:
ni na maṱo, ha vhoni,
ni na nḓevhe, a dzi pfi.
22A ni nnyofhi Nṋe Yahavee?
A ni ntetemeli?
Ndi Nṋe we nda vhea muṱavha uri u vhe mukano wa lwanzhe;
lu nga si pfuke lini na lini.
Magabelo a nga ḓi takuwa,
a nga si zwi kone;
a nga ḓi bvuma, a nga si pfuke.
23“ ‘Vhathu havha vhone vha na mbilu dza tshipimbi, dza mashandukwa; vho pambutshela thungo vha mbo ḓi ṱuwa. 24A vha vhuyi vha ri: Nga ri ofhe Yahavee Mudzimu washu ane a ri nisela mvula dza luṱavula na dza tseula nga tshifhinga tshadzo, a ri londola ra kaṋa nga tshifhinga tsho teaho ri sa fhidzi. 25Huno zwo shanduka nga mulandu wa vhukhakhi haṋu, vhutshinyi haṋu ho ni shaisa zwivhuya.
Vhomakuvhe vha vhufhura
26“ ‘Kha vhathu vhanga hu na vhavhi, vha lalelana unga vhathu vha no rea zwiṋoni, vha retshela vhathu zwikwekwe. 27Nnḓu dzavho dzo ḓala zwe vha wana nga vhufhura, dzi nga kuḓu kwa zwiṋoni kwo ḓala zwiṋoni. Ndi zwe vha pfuma vha vha na maanḓa, 28vha khwaṱha vha ita na u penya. Vhuvhi havho ho no tou kalula; tsengoni a vha tikedzi tsiwana, a vha ṋei vhashai pfanelo dzavho.
29“ ‘Nṋe Yahavee ndi ḓo kundwa ngani u ni rwela zwenezwo? Ndi ḓo kundwa ngani u lifhedza holu lushaka?
Mulandu wa vhotshifhe na vhaporofita
30“ ‘Fhano shangoni heḽi ho itea zwi ofhisaho, zwi nengisaho: 31Vhaporofita vha porofita mazwifhi fhedzi, vhotshifhe vha vhusela u ḓipfumisa fhedzi; vhathu vhanga na vhone vha funa zwo tou ralo. Hone musi zwi tshi fhela ni ḓo itani?’ ”
