JEREMIA 48

“Muḓi wa Nebo u ḓo zwi vhona,

u ḓo sala u matumba.

Kiriathaimi u ḓo thubiwa wa shona;

vhushavhelo vhu ḓo phusukanywa ha shona.

₂Muaba a ḽi tsha ḓo khoḓwa;

vhathu vha langana u ḽi phusukanya vhe Hesheboni vha ri,

‘Iḓani ri yo fhedza lushaka holuḽa.’

Na kha iwe Mademene a hu tsha ḓo pfala ipfi;

pfumo ḽi ḓo u sala murahu.

₃Ipfani mikosi ya Horonaimi,

ndi mikosi ya phusuphusu na ndozwo khulu.

₄Muaba ḽo phusukanywa;

tshililo tshi pfala u swika Tsuara.

₅Vho fara nḓila ya Luhithi,

vha enda vha tshi tswimila lu ṱungufhadzaho;

nḓilani i no tsela Horonaimi

hu pfala zwililo zwa vhuṱungu

hu tshi lilelwa iyo ndozwo.

₆Shavhani! Gidimani ni sa ḓo fa;

ni nge mbiḓi ya phangani.

₇Vhunga ni tshi fulufhela lupfumo lwaṋu

na mitsheṱo ye na fhaṱa,

na inwi ni ḓo thubiwa.

Khemosho mudzimu waṋu u ḓo hwalwa

wa iswa vhuthubwani

khathihi na vhotshifhe vhawo

na vhahulwane vhawo.

₈Miḓi yoṱhe i ḓo welwa nga mulozwi,

a hu na na muḓi u no ḓo ponyoka.

Govha ḽi ḓo phusukanywa,

mudavhi u ḓo ṱangulwa.

Ho amba Nṋe Yahavee.

₉Hashani muṋo masimuni a Muaba,

uri a si tsha liṅwa;

hu si kale ḽi ḓo vha soga;

miḓi yaḽo i ḓo ṱutshelwa,

ya si tsha dzula muthu.

₁₀“A sa iti mushumo wa Yahavee nga mbilu nthihi

nga a teketelwe!

Nga hu teketelwe a sa shululi malofha

nga pfumo ḽawe!”

₁₁“Muaba a ḽi athu vhuya ḽa iswa vhuthubwani;

ḽo vha ḽo ḓi dzika u bva hanani haḽo,

ḽi tshi nga waini yo dzikaho

i songo shululwaho i tshi bva kha ino mvuvhelo

ya shelwa kha iḽa;

muḓifho waḽo u kha ḓi vha wonouḽa wa kale,

u nukhelela haḽo a ho ngo shanduka.”

₁₂Hone Muṋe washu u ri,

“Hu khou ḓa misi

ine nda ḓo ruma vhathu

vha no shulula dzimvuvhelo,

vha ḓo ḽi shulula vha pwasha madzhomela aḽo.

₁₃Zwenezwo Muaba ḽi ḓo shona nga Khemosho,

unga nnḓu ya Israele yo shona zwiḽa vha tshi fulufhela Bethele.

₁₄“Ndi mini ni tshi ri,

‘Ri vhahali nndwani,

govholanoni ri na tshivhindi,

a ri ofhi tshithu’?

₁₅Muaba ḽi ḓo phusukanywa,

vhaphusukanyi vhaḽo vha nḓilani;

vhaṱhanngana vhavho vhone-vhone vha ḓo shidzhwa,”

i ralo Khosi ine ya pfi Yahavee Mulangazwoṱhe.

₁₆“Muaba ḽi ḓo ṱuwa ḽi tshi fhalala;

khombo yaḽo a i nga lengi u ḓa.

₁₇Inwi noṱhe no ḽi tangaho,

noṱhe ni no ḓivha bvumo ḽaḽo,

ḽi lileleni ni ri,

‘Yawee,

luḓo lwa maanḓa lwo vunḓea,

muvhuso wa vhugala wo phusukanywa!’ ”

₁₈“Inwi vhathu vha Diboni,

itsani kha vhugala haṋu,

dzulani fhasi mavuni o omaho;

mulozwi wa Muaba u ḓo ni ḓela,

a phusukanya miḓi yau ya vhushavhelo.

₁₉Inwi ni no dzula Aruere,

imani gondoni ni sedze.

Vhudzisani vhanna vha no khou shavha

na vhasadzi vha ponyokaho ni ri,

‘Ho iteani?’

₂₀Vha ḓo fhindula vha ri,

‘Muaba ḽo phusukanywa ḽa shona.’

Honḓani ni tou ṱavha mukosi!

Ḓivhadzani mulamboni wa Arinoni uri Muaba ḽo phusukanywa.

₂₅“Nungo dza Muaba dzo kulea,

tshanḓa tshaḽo tsho vunḓea,”

u ralo Muṋe washu.

₂₆“Ḽi kambiseni,

ḽo nyadza Yahavee.

Muaba nga ḽi vhumbuluwe maṱanzani aḽo;

vhathu nga vha ḽi shonedze.

₂₇Israele wo vha u sa khou ḽi shonedza naa?

Kani ḽo vha ḽo farwa na mafobvu,

hezwi u tshi ḽi nyadza wa ita na u dzungudza ṱhoho

misi yoṱhe u tshi ḽi amba?

₂₈Inwi ni dzulaho Muaba,

ṱutshelani miḓi yaṋu ni yo dzula dzinngwani.

Ni nge ḽiivha ḽi no fhaṱa tshiṱaha tshaḽo

mulomoni wa bako.”

₂₉“Ro zwi pfa uri

Muaba ḽi a ḓihudza!

Ḽi ḓihudza lwa u kalula, ḽi a ḓipfa,

ḽi a ḓigagamisa, ḽi a ḓiḓivha,

ḽi na mbilu ya u ṱonga.

₃₀Ndi ḓivha swili yaḽo,

hone i ḓo pfuvha,

mazuwo aḽo ndi mahandana,”

u ralo Muṋe washu.

₃₁“Ndi zwine Muaba nda ḽi lilela,

ndi tou honḓa ndi tshi honḓela Muaba ḽoṱhe,

vhathu vha Kiri Herese ndi vha pfela vhuṱungu.

₃₂Inwi minḓirivhe ya Sibima,

ndi ni lilela unga Jazere u tshi lila.

Matavhi aṋu o adza a swika lwanzheni;

a guma nga Lwanzhe lwa Muṋo henengei Jazere.

Mitshelo yaṋu na nḓirivhe dzo vhibvaho

zwo welwa nga mulozwi.

₃₃Mirini ya mitshelo na masimuni a Muaba

a hu tshee na dakalo na mifhululu.

Ndo kaṱudza waini i no ela i tshi bva bonḓeloni;

a hu na ane a dzi suka o takala a tshi fhululedza.

₃₄“Mukosi wa tshililo tshavho u a hulela,

u ṱavhiwa Hesheboni wa pfala Eliali na Jahatsi,

wa ṱavhiwa Tsuara wa pfala Horonaimi na Eligathi Shelishiya.

Na maḓini a Nimirimu muḓi wo phusukanywa.

₃₅Kha ḽa Muaba ndi ḓo fhelisa vha no gonya zwivhanga

vha yo ṋekedza zwiṱhavhelo,

vha dubisela midzimu yavho zwioro,”

u ralo Muṋe washu.

₃₆“Mbilu yanga i lilela Muaba unga tshiṱiringo;

i lila unga tshiṱiringo i tshi lilela vhathu

vha Kiri Herese.

Lupfumo lwe vha lu kuvhanganya lwo ṱuwa.

₃₇Ṱhoho dzoṱhe dzo palulwa,

ndebvu dzoṱhe dzo vheulwa,

zwanḓa zwoṱhe zwo tshetshekanywa,

khundu dzoṱhe dzo pilwa nga saga,

u sumbedza u ṱungufhala.

₃₈Zwiludzani zwa dzinnḓu kha ḽa Muaba

na mikotoni yaho ndi zwililo fhedzi,

Muaba ndo ḽi vunḓa

unga dzhomela ḽi sa ṱoḓwi nga muthu,”

u ralo Muṋe washu.

₃₉“Ḽo pwashea ḽa balangana!

Vha honḓa hani!

Muaba ḽo furalela ḽó furalela ḽó shona!

Muaba ḽi a shonedzwa,

vhoṱhe vho ṋekanaho masakha naḽo

vha a ḽi nyala.”

“Vhonani! Hu khou kavha goni,

ḽi ṱharamudza phapha ḽa godimela Muaba.

₄₁Miḓi i ḓo thubiwa,

ni ḓo dzhielwa vhushavhelo.

Musi wonoyo mbilu dza vhahali vha Muaba,

dzi ḓo nga mbilu ya musadzi a tshi ṱoḓou vhofholowa.

₄₂Muaba ḽi ḓo phusukanywa,

vhathu vhaḽo a vha tsha ḓo vha lushaka,

nge vha nyadza Nṋe Yahavee.

₄₃No lindelwa nga zwi ofhisaho na dindi na mulavhu

inwi vhathu vha Muaba,”

u ralo Muṋe washu.

₄₄“Ane a vhuya a shavha izwo zwi ofhisaho

u ḓo wela dindini,

ane a gonya a bva dindini u ḓo fashwa nga mulavhu;

Muaba ndi ḓo ḽi ḓisela ṅwaha wa ṱhamu yaḽo,”

u ralo Muṋe washu.

₄₅“Tshavhi dzi ima murunzini wa Hesheboni

dzó kulea nungo.

Hesheboni ho bva mulilo,

tshivhindini tsha Sihoni ho bva khavhu ya mulilo;

i fhisa mivhombo ya Muaba,

i fhisa madethele a vhadziamazuwo.

₄₆Iwe Muaba u ḓo zwi vhona!

Vhathu vha Khemosho vho lozwiwa;

vhaṱhannga vhau vho hwaliwa vha iswa vhuthubwani,

vhananyana vhau vho thubiwa.

₄₇Naho zwo ralo misi i ḓaho

ndi ḓo dovha nda ladza ḽa Muaba,”

u ralo Muṋe washu.

Khaṱhulo ya Muaba i guma henefha.