JEREMIA 24

₁Musi Jehoyakhini ṅwana wa Jehoyakimu khosi ya Juda, na vhahulwane na vhatsila na vhafhaṱi vha Juda vho no hwalwa vha tshi bva Jerusalema vha iswa vhuthubwani Babele nga Nebukhadnetsara khosi ya Babele, Muṋe washu a ntsumbedza zwirundu zwivhili zwo vhewa muṋangoni wa thembele ya Muṋe washu. ₂Tshiṅwe tshirundu tsho vha tshi na mahuyu avhuḓi, ane a nga aḽa a no ranga u vhibva; tshiṅwe tshirundu tsho vha tshi na mahuyu a si avhuḓi, o tshinyala lune a sa tsha ḽea. ₃Ndi hone Muṋe washu a tshi mmbudzisa a ri, “Jeremia, u khou vhona mini?” Nṋe nda fhindula nda ri, “Ndi khou vhona mahuyu. Avhuḓi o naka nga maanḓa, hone a si avhuḓi o tshinyala lune a nga si ḽee.”

₄Ndi hone ipfi ḽa Muṋe washu ḽi tshi ḓa kha nṋe ḽa ri, ₅“Nṋe Yahavee Mudzimu wa Israele ndi ri: Ndi tshi sedza mathubwa a no bva Juda, vhe nda vha pfulusa fhano fhethu nda vha isa shangoni ḽa Vhakhaladia, ndi vhona vhe vhavhuḓi vha tshi nga mahuyu avhuḓi. ₆Ndi ḓo vha londola uri zwi ḓi vha nakela, nda dovha nda vha humisela shangoni heḽino. Ndi ḓo vha fhaṱa vha ima, nda si vha wise; ndi ḓo vha sima, nda si vha tupule. ₇Ndi ḓo vha ṋea mbilu ine ya ḓo nnḓivha uri ndi Nṋe Yahavee. Vha ḓo vha vhathu vhanga, Nṋe nda vha Mudzimu wavho, ngauri vha ḓo vhuya kha Nṋe nga mbilu yavho yoṱhe.

₈“Tsedekia ene na vhahulwane vhawe na vho salaho Jerusalema vho ponyokaho lufu, vha nga kha ḓi vha vho sala fhano shangoni ḽino kana vha tshi dzula Egipita, ndi ḓo vha ita unga mahuyu a si avhuḓi, o tshinyalaho lune a sa tsha ḽea. ₉Ndi ḓo vha ḓisela khombo lune tshakha dzoṱhe dza mashango dza ḓo ofha. Hoṱhe hune nda ḓo vha balanganya vha ḓo kolelwa nga vhathu, vha ita miswaswo ngavho, vha vha nyadza; vha tshi teketela muthu vha ḓo ri ngavhe a tshi welwa nga khombo yeneyo ye ya wela vhathu vha Juda. ₁₀Ndi ḓo vha ḓisela pfumo na nḓala na dwadze, vha si tsha vha hone shangoni ḽe nda ṋea vhone na vhokhotsi avho.”