JEREMIA 23

₁Muṋe washu u ri, “Vhalisa vhane vha khou lozwa sambi ḽa nngu dzanga vha dzi balanganya, vha ḓo zwi vhona!” ₂Zwino-ha Muṋe washu Mudzimu wa Israele a tshi amba na vhalisa vha vhathu vhawe u ri, “Ndi ḓo ni lifhedzela vhuvhi haṋu; no balanganya sambi ḽa nngu dzanga na dzi khadela kule na si dzi londole. ₃Nṋe muṋe ndi ḓo kuvhanganya nngu dza sambi ḽanga dzo salaho nda dzi bvisa mashangoni oṱhe he nda dzi thathela hone, nda dzi humisela pfuloni yadzo, dza dzwala dza anda henefho. ₄Ndi ḓo dzi ṱoḓela vhalisa vhane vha ḓo dzi londola, a dzi tsha ḓo ofha, a dzi tsha ḓo ofhiswa, a hu tsha ḓo vha na i xelaho.”

₅Muṋe washu u ri, “Maḓuvha a khou ḓa ane nda ḓo ita uri hu simuwe ḓadzwane ḽa Dafita ḽi tshidzaho, i ḓo vha khosi ine ya ḓo vhusa nga vhuṱali, a haṱula nga khaṱhulo mbuya, a ita zwi re zwone shangoni. ₆Misi yawe Juda ḽi ḓo tshidzwa, Israele ḽa lala. U ḓo pfi, ‘U tshidzwa ndi Muṋe washu’.”

₇Muṋe washu u ri, “Hu khou ḓa misi ine vhathu vha si tsha ḓo ri, ‘Ri ana nga Yahavee a tshilaho we a pfulusa Vhaisraele Egipita,’ ₈vha vho ḓo ri, ‘Ri ana nga Yahavee a tshilaho, we a pfulusa Vhaisraele shangoni ḽa devhula na mashangoni oṱhe he a vha o vha thathela hone.’ Ndi hone vha tshi ḓo dzula shangoni ḽavho.”

₉Ndi tshi amba nga vhaporofita ndi ri:

₁₁Muṋe washu u ri,

₁₅Zwenezwo Muṋe washu Mulangazwoṱhe a tshi amba nga vhaporofita u ri, “Ndi ḓo ita uri vha ḽe zwiḽiwa zwa u kalakata, vha nwe maḓi a re na vhutulu, ngauri vhaporofita vha Jerusalema ndi vhone vho fhuraho vhathu vhoṱhe uri vha ṱambe Mudzimu.”

₁₆Muṋe washu Mulangazwoṱhe u ri, “Ni songo thetshelesa zwine vhaporofita vha ni porofitela; vha ni fulufhelisa zwi si zwone. Vha amba mabono a no bva mihumbuloni yavho a songo ambiwa nga Nṋe Yahavee. ₁₇Vha ṱolou vhudza vhane vha nnyadza vha ri: ‘Muṋe washu u ri: Ni ḓo vha na mulalo.’ Vhane vha tshila vha tshi tevhedza zwine vha funzedzwa nga mbilu dzavho dza tshipimbi, vha vha vhudza vha ri, ‘A ni nga welwi nga khombo!’ ₁₈Hone ndi nnyi wavho we a ima khoroni yanga uri a vhone kana a pfe ipfi ḽanga? Ndi nnyi we a thetshelesa a pfa ipfi ḽanga? ₁₉Vhonani, mbiti dzanga dzi ḓo pwashea dza vha ḓumbu, dza vha tshiḓumbumukwe tsha swiela ṱhoho dza vhavhi. ₂₀Mbiti dzanga a dzi nga humi dzi sa athu khunyeledza zwi re mbiluni yanga. Misi i ḓaho ndi hone ni tshi ḓo zwi ṱalukanya zwavhuḓi.

₂₁“Havha vhaporofita a vho ngo ruṅwa nga Nṋe, vho sokou bva nga vhoṱhe; Nṋe a tho ngo amba navho, vho sokou ḓiporofitela. ₂₂Hone arali vho vha vho dzhena khoroni yanga, vho vha vha tshi ḓo vha vho ḓivhadza vhathu vhanga maipfi anga vha vha humisa nḓilani dzavho mmbi, vha vha laṱisa zwiito zwivhi.”

₂₃Muṋe washu u ri, “Ni vhona unga Nṋe ndi Mudzimu a re tsini ane na nga mu langa naa? A thi Mudzimu a re kule na inwi naa? ₂₄U hone ane a nga dzumbama ho khudaho hune nda nga si mu vhone? Kani-ha a thi ḓadzi ḽiṱaḓulu na ḽifhasi? ₂₅Ndo zwi pfa zwe vhaporofita vha amba vha tshi porofita mazwifhi nga dzina ḽanga, vha tshi ri, ‘Ndo lora! Ndo lora!’ ₂₆Nṋa izwi zwi ḓo guma lini mbiluni dza vhaporofita havha vha u zwifha vha no porofita zwa vhufhura vha tshi sokou ḓihumbulela? ₂₇Vha tshi hanelelana miloro yavho vha itela uri vhathu vhanga vha hangwe dzina ḽanga, u ḓi nga na vhokhotsi avho vhó hangwa dzina ḽanga nga u luvha Baali. ₂₈Litshani muporofita a re na muloro a vhudze vhathu muloro wawe, hone a re na ipfi ḽanga mu litsheni a ḽi vhudze vhathu a tshi amba ngoho. Mungu u a vhuya wa vhewa huthihi na thoro naa? Ho amba Nṋe Yahavee. ₂₉Ipfi ḽanga a ḽi ngi mulilo? A ḽi ngi hamula ine ya pwashekanya tombo naa? ₃₀Huno-ha Nṋe ndi lwa na vhaporofita vhane vha tswelana maipfi ane ha pfi a bva kha Nṋe. ₃₁Ee, ndi lwa na vhaporofita vhane vha amba zwe vha sokou humbula vha ri, ‘Hu amba Yahavee!’ ₃₂Vhukumakuma ndi lwa na vhane vha porofita miloro i si yone. Vha i vhudza vhathu vha xedza vhathu nga mazwifhi avho na nga mazuwo avho, ngeno Nṋe ndi songo vha ruma kana nda vha vhea. A vha vhuyi vha farisa vhathu havha nga tshithu. Ho amba Nṋe Yahavee.”

₃₃Muṋe washu o mmbudza a ri, “Jeremia, arali vhathu havha kana muporofita kana tshifhe a u vhudzisa a ri, ‘Ndi mini tshine Muṋe washu a ri hwesa zwino nga ndaedzo yawe?’ vha fhindule u ri, ‘Muhwalo wa Muṋe washu ndi inwi; u ḓo ṱuwa a tshi ni kudza kule!’ ₃₄Arali muporofita kana tshifhe kana muṅwe-vho a ri, ‘Yahavee u khou ni hwesa muhwalo hoyo,’ ndi ḓo laṱisa onoyo muthu na muṱa wawe. ₃₅Tshine nda tenda ni tshi vhudzisa khonani dzaṋu kana mashaka ni tou ri, ‘Phindulo ya Yahavee i ri mini?’ kana na ri, ‘Yahavee o ri mini?’ ₃₆Hone ni songo tsha vhudzisa na ri, ‘Yahavee u khou ri hwesa mini?’ Ane a ralo, ndaedzo yanga i ḓo tou vha muhwalo wawe vhukuma, ngauri u khou shanda maipfi a Mudzimu a tshilalo, Nṋe Yahavee Mulangazwoṱhe Mudzimu waṋu. ₃₇Ni ṱolou vhudzisa muporofita ni tshi ri, ‘Yahavee o u fhindula a ri mini?’ Kana, ‘Yahavee o amba mini?’ ₃₈Hone ane a dovha a vhudzisa uri, ‘Ri ḓo hweswa mini nga Yahavee?’ ndo vha laedza uri vha songo dovha vha ralo. ₃₉Zwenezwo, vhukumakuma ndi ḓo ni thubela kule nda ni doba nda ni posa kule hanga khathihi na miḓi ye nda ṋea inwi na vhokhotsi aṋu. ₄₀Ndi ḓo ni nyadzisa lini na lini, ni ḓo shona lini na lini zwa si vhuye zwa hangwiwa.”