YESAYA 57

₁Vhavhuya vha a lovha

ha si vhe na ane a zwi londa;

vha fulufhedzeaho vha a hwalwa;

a hu na ane a zwi ṱalukanya uri vha tshi hwalwa

ndi u tinyiswa khombo.

₂Vhane vha fara i re yone vha na mulalo,

vha tshi fa vha a awela.

₃“Inwi vhana vha vhaloi,

vha zwiṱonḓolo,

vha dziphombwe,

sendelani ni haṱulwe!

₄Ni khou kolela nnyi?

Ni khou nzhonzhowedza nnyi?

Lulimi lu khou ṱoṱomodzelwa nnyi?

Vhana vha mashandukwa,

vha vhadzia-u-zwifha ndinwi!

₅Ni luvha midzimu yaṋu ya zwa mbebo

nga u ita vhupombwe fhasi ha miri yoṱhe

ya zwimvingimvingi,

ni dzhia vhana vhaṋu na vha ita zwiṱhavhelo

magovhani na pharani.

₆Henefho ni dzhia matombo a suvhelelaho,

eneo na a ita midzimu na a luvha!

Ni a itela thevhula nga waini na mpambo.

Ni vhona unga zwine na ita zwi a ntakadza?

Ni ḓo swiṱwa fhasi ha matombo eneo!

₇“Ni ya thavhani ndapfu na ita vhupombwe,

na ṋekedza zwiṱhavhelo henefho.

₈Ni nambatedza phamba dzaṋu murahu ha mahothi

na kha zwiaramo;

ni a ntshandukela na bvula zwiambaro

na sala fhedzi,

na gonya mimbete yaṋu na vhafunwa vhaṋu,

na anḓana navho

na takalela u dzhena navho nḓuni,

na ita na u vha ṋea malamba.

₉Ni ḓishasha nga zwiḓolo zwi nukhelelaho

na dubisa zwioro

na yo luvha uḽa mudzimu Molekhe.

Ni ruma vhaḓinḓa kule, vha vhuya vha swika na vhudzulavhafu

vha tshi ṱoḓa midzimu ine na nga i luvha.

₁₀Ni a ḓinetisa nga nyendo dzaṋu dzi sa fheli,

na si vhuye na ri,

‘A zwi farisi tshithu!’

na pfa ni na nungo, na si ṋoke.”

“Ndi vhonnyi heyo midzimu

ine ya ni dzhenisa nyofho,

na vho nnzwifhela na nkhangwa tshoṱhe?

Ndo fhedza tshifhinga tshilapfu ndo ḓifhumulela;

kani ndi zwone zwine na si tsha nndonda?

₁₂Ni vhona unga zwine na ita ndi zwone,

hone zwino a thi tsha ḓo fhumula,

ndi ḓo ni dzumbulula,

midzimu ye na ita ya si kone u ni tshidza.

₁₃Edzonu ṱavha mukosi

ni vhone arali izwo zwithu zwaṋu zwe na kuvhanganya

zwi tshi ḓo ni phalala!

Zwi ḓo hwalwa nga muya,

na mufemo zwawo u ḓo zwi vhudzulela kule.

“Huno vhane vha shavhela ha Nṋe vha ḓo dzula shangoni,

thavha yanga khethwa ya vha yavho.”

“Khurani, khurani, phulani gondo ḽi tshimbilee!

Zwikhukhuli zwoṱhe nga zwi bviswe

nḓilani ya vhathu vhanga!

₁₅Hu amba Nṋe Waṱaḓuluṱaḓulu;

haya hanga ndi ha lini na lini;

ndi pfi Mukhethwa.

Ndi dzula fhethu hukhethwa ngei ṱaḓulu,

nda dovha nda dzula na vho tsikeledzwaho,

vha ḓiṱukufhadzaho,

uri vha ḓiṱukufhadzaho ndi dovhe ndi vha ṋee vhutshilo,

mbilu dzo tsikeledzwaho nga vhutshinyi

ndi dzi vuse.

₁₆Ndi nga si dzule ndi tshi vha pomoka

kana nda vha sinyutshela lu sa gumi,

mimuya ya vhathu ye nda i sika Nṋe muṋe

i sa ḓo lovha phanḓa hanga.

₁₇Ndo vha ndo sinyutshela vhuvhi havho

ha u funa u pfuma nga tseḓa,

nda vha rwa nda vha furalela.

Naho zwo ralo vha ḓi ntshandukela vha fara yavho nḓila.

₁₈“Zwe zwa vha wela ndo zwi vhona;

ndi ḓo vha fhodza.

Ndi ḓo vha endedza nda vha khuthadza,

vho ṱungufhalaho nda vha fhumudza.

₁₉Ndi ḓo longa thendo milomoni yavho;

vhoṱhe ndi vha ṋea mulalo,

vha re kule na vha re tsini!

Ndi ḓo vha fhodza.”

Ho amba Muṋe washu.

₂₀Vhavhi vhone vha nga lwanzhe lu sa aweli;

magabelo alwo ha dziki,

a hwala makukwe na matope.

₂₁Mudzimu wanga u ri,

“Vhavhi a vha na mulalo.”