YESAYA 39

₁Mirodakha Baladani, ṅwana wa Baladani khosi ya Babele, a pfa uri khosi Hiskia o vha a tshi lwala a dovha a fhola. Ndi hone a tshi mu ṅwalela luṅwalo a mu rumela na tshifhiwa. ₂Hiskia a tshi vhona vhaḓinḓa a vha takalela, a vha sumbedza lupfumo lwawe – siliva na musuku, zwilungalungane na zwiḓolo zwi nukhelelaho, na zwihali zwawe zwoṱhe zwa nndwa – lupfumo lwawe lwoṱhe. A hu na na tshithihi tsha pfamoni yawe kana muvhusoni wawe woṱhe tshe Hiskia a si vha sumbedze.

₃Zwenezwo muporofita Yesaya a ya ha khosi Hiskia a mu vhudzisa a ri, “Vhaḽa vhanna vha bvafhi? Vho ri mini?”

Hiskia a fhindula a ri, “Vha bva shangoni ḽa kule, vha bva Babele.”

₄“Vho vhona mini pfamoni?”

“Vho vhona zwoṱhe zwi re ngomu. A hu na na tshithihi tshi re nḓuni dza mbulungelo tshe nda si vha sumbedze.”

₅Ndi hone Yesaya a tshi vhudza Hiskia a ri, “Kha vha pfe ipfi ḽa Muṋe washu Mulangazwoṱhe: U ri ₆hu khou ḓa tshifhinga tshine zwoṱhe zwi re pfamoni yavho, na zwoṱhe zwe vhomakhulukuku wavho vha khokha u swika zwino, zwa ḓo hwalwa zwa iswa Babele. A hu na tshi no ḓo sala. U ralo Muṋe washu. ₇Vhaṅwe vhana vhavho vhe vha vha beba, vha ḓo hwaliwa vha yo luvhedzwa, vha shumela khosi ya Babele pfamoni yawe.”

₈Ndi hone Hiskia a tshi fhindula Yesaya a ri, “Ipfi ḽe vha mmbudza ḽi tshi bva ha Muṋe washu ndi ḽavhuḓi,” nge a humbula a ri, “Tenda ha vha na mulalo na vhudziki ndi tshi kha ḓi tshila.”