YESAYA 27

₁Musi wonoyo Muṋe washu u ḓo dzhia banga ḽawe

ḽi ofhisaho, ḽihulu, ḽa maanḓa a rema Liviathani,

heḽiḽa ḽiṋowa ḽa luvhilo,

ḽiṋowa ḽi sombekanaho;

u ḓo vhulaha buka ḽi dzulaho lwanzheni.

₂Musi wonoyo

Muṋe washu u ḓo ni vhudza a ri,

“Ndi na tsimu i takadzaho ya minḓirivhe,

i imbeni!

₃Nṋe Yahavee ndi a i londola,

a thi fhidzi u i sheledza.

Ndi i linda vhusiku na masiari hu sa ḓo ḓa muṅwe a tshinya.

₄A i tsha mmbilaedza,

hone nda wana ho mela

luanakha na mitshutshungu,

ndi ḓo lwa nazwo nda zwi fhisa zwe tshote.

₅Ndi khwiṋe vha tshi shavhela ha Nṋe nda vha tsireledza, vha pfumelwa.

Ee, nga vha pfumelwe!”

₆Misi i ḓaho vhaḓuhulu vha Jakopo vha ḓo ṱoka midzi,

Vhaisraele vha ḓo kulukusha vha fhufhumisa,

vha ḓadza shango nga mitshelo.

₇Muṋe washu o tambudza Vhaisraele

unga a tshi tambudza vhatambudzi vhavho kani?

Vho vhulawa unga hu tshi vhulawa vhavhulahi vhavho naa?

₈Aiwa, ho ngo vha tambudza lwa u tou kalula

hezwi a tshi vha sukumedzela vhuthubwani,

o tou vha hwala nga muya u vayaho wa vhubvaḓuvha.

₉Nga vha kuye matombo a aḽiṱari dza vhannḓa,

dzi sale dzi tshi nga vhukhopfu,

hu si tsha vha na thanda dza mudzimutshisadzi Ashera,

na aḽiṱari dza u fhisela zwioro;

ndi hone milandu ya vhaḓuhulu vha Jakopo

i tshi ḓo pfumelwa, ndi yone tsumbo

ya uri vho hangwelwa vhutshinyi.

₁₀Muḓi uyu wo dzivhelwaho a u tshee na muthu,

wo no tou vha matumba,

wo sala u tshi nga soga,

wo no vha pfulo ya ṋamana,

ngedziḽaa dzo awela dzi tshi khou swarula matavhi.

₁₁Matavhi a miri o puta a vunḓekana,

vhasadzi vha reḓa dza khuni dza u vhasa.

Musiki wavho a nga si vha khathutshele,

Muvhumbi wavho a nga si vha pfele vhuṱungu;

ndi vhathu vha si na ṱhalukanyo.

₁₂Hu khou ḓa ḓuvha ḽine Muṋe washu

a ḓo kuvhanganya vhathu vha Israele

nga muthihi nga muthihi u bva Yufuratha u swika nga mukano wa Egipita,

zwa nga mulimi a tshi fhula goroi

a nanguludza thoro a si sie na nthihi.

₁₃Musi wonoyo hu ḓo lidzwa phalaphala khulu

i tshi vhidza Vhaisraele vho fhalalelaho Ashuru

na vho thathelwaho Egipita uri vha vhuye hayani,

vha luvhe Muṋe washu Jerusalema,

thavhani yawe khethwa.