YESAYA 13

₂“Imisani tshiga tsha nndwa muṱumbani wa tshikwara hu vhonalaho,

ni vha vhidzelele.

Vha vhidzeni nga tshanḓa,

vha dzhene nga khoro dza vhaḓivhalea.

₃Ndo ruma maswole vhe vha ḓikumedza Nṋe;

ndo vhidza vhahali vhanga uri vha nndifhedzele;

ndi vhane vha pembelela u kunda hanga.”

₄Thetshelesani mukosi u pfalaho dzithavhani –

mubvumo wa gogo ḽihulu ḽa vhathu,

mubvumo wa mivhuso na dzitshakha

vha tshi kuvhangana!

Muṋe washu Mulangazwoṱhe u khou lugisela mmbi yawe

u bva pfumo.

₅Vha bva mashangoni a kule,

henengei vhusendekamisi.

Muṋe washu o sinyuwa,

o ḓa na zwihali zwawe u lozwa shango ḽoṱhe.

₆Honḓani,

ḓuvha ḽa Muṋe washu ḽi tsini;

Ramaanḓaoṱhe u ḓo lozwa zwoṱhe.

₇Zwanḓa zwoṱhe zwi ḓo kulea nungo,

mbilu dzoṱhe dza ṋoka;

₈vha ḓo farwa nga nyofho,

vha zhakeledzwa nga vhuṱungu vhu no nga ha musadzi

e tsini na u vhofholowa;

vha ḓo lavhelesana vho hanganea,

zwifhaṱuwo zwó tshenuluwa nga ṱhoni.

₉Vhonani,

ḓuvha ḽa Muṋe washu ḽi khou ḓa,

ḓuvha ḽa tshiṱuhu,

ḽa mbiti dzawe dzi ofhisaho,

ó sinyuwa;

ḽifhasi ḽi ḓo sala ḽi soga;

u ḓo lozwa vhatshinyi vha re khaḽo.

₁₀Ṋaledzi dza lutomboni na mulalavhungu wadzo

a zwi tsha ḓo vha na tshedza;

ḓuvha ḽi ḓo bva ḽo swifhala,

na ṅwedzi a u tsha ḓo penya.

“Ndi ḓo ṱungufhadza shango nga mulandu wa vhuvhi haḽo,

vhavhi nda vha rwela milandu yavho,

ndo laṱisa vhane vha ḓihudza,

vha tshiṱuhu vha u ḓiḓivha nda vha ṱukufhadza.

₁₂Ndi ḓo ita uri vhathu vha sale vha si gathi,

vha shaee u fhira musuku wa Ofiri.”

₁₃Muṋe washu Mulangazwoṱhe u ḓo dzinginyisa ḽiṱaḓulu,

shango ḽa thengathenga ḽa sudzuluwa vhudzuloni haḽo,

musi wonoyo a tshi sumbedza mbiti dzawe dzi ofhisaho.

₁₄Tshakha dza vhatsinda vha dzulaho Babele

dzi ḓo balangana dza shavhela mashangoni adzo,

dza nga phala dzo shushedzwaho,

dza nga nngu dzi si na mulisa.

₁₅Ane a farwa, tshawe ndi u vhulawa;

ane a thubiwa u ḓo ḽiwa nga pfumo.

₁₆Tshetshe dzavho dzi ḓo pwashekanywa

vho ḓi ṱalela zwavho,

nnḓu dzavho dza ṱangulwa,

vhasadzi vhavho vha tshipiwa.

“Ndi khou ritha Vhamedia uri vha die Babele;

vhone siliva a vha i takaleli,

na musuku a vha u londi.

₁₈Vha ḓo lozwa vhaṱhannga nga vhura na misevhe,

na tshetshe a vha nga dzi khathutsheli,

na vhana a vha nga vha pfeli vhuṱungu.”

₁₉Babele, yone ndalama i fhiraho mivhuso yoṱhe,

hone vhugala vhune Vhakhaladia

vha ḓihudza ngaho,

Mudzimu u ḓo u phusukanya sa zwe a ita Sodoma na Gomora.

₂₀A hu tsha ḓo vhuya ha dzula muthu,

ha vhuya ha fhira mirafho na mirafho;

na mutendeleki wa phangani ha nga akhi dennde yawe henefho,

na mulisa a nga si vhuye

a ladza nngu dzawe henefho.

₂₁Hu ḓo lala phukha dza phangani,

matumba a ḓala magwitha,

mphwe dza dzula henefho,

ha thamuwa madimoni a mbokoṱo,

₂₂vhudzumbamoni hawo ha lila phele,

phunguhwe dza dzula pfamoni dzawo dza vhugala.

Ndi hone tshifhinga tsha Babele tsho swika;

maḓuvha awo a vho ṱoḓou fhela.