ESEKIELE 46

₁Muṋe wa zwoṱhe Muṋe washu u ri, “Khoro ya vhubvaḓuvha ya muṱa wa ngomu i fanela u dzula yo valwa maḓuvha maṱanu na ḽithihi ane vhathu vha shuma ngao. I vulwe nga ḓuvha ḽa Sabatha na nga ḓuvha ḽa vhuṱambo ha ṅwedzi u tshi dzula. ₂Muvhusi a dzhene nga vanḓani ḽa khoro ya nnḓa a dzule tsini na mihangammbwa ya khoro. Vhotshifhe zwenezwo vha ṋekedze tshiṱhavhelo tshawe tsha u fhiswa na nduvho yawe ya vhukonani. O fanela u luvha e kha tshiukhuvha tsha khoro, a konou bvela nnḓa; iyo khoro i songo tsha dovha ya valwa ḽi vhuye ḽi kovhele. ₃Vhathu vha shango vha gwadame phanḓa ha Muṋe washu henefho muṋangoni wa khoro nga maḓuvha a Sabatha na nga maḓuvha a ṅwedzi u tshi dzula. ₄Tshiṱhavhelo tshi fhiswaho tshine muvhusi a ṋekedza Yahavee nga ḓuvha ḽa Sabatha tshi vhe tsha ngwana ṱhanu na nthihi dzi si na luvhadzi na thutha i si na luvhadzi ₅na nduvho ya thoro ya epha nthihi i ṋekedzwaho na iyo thutha na nduvho dza thoro dzine a tou funa dzi ṋekedzwaho na idzo ngwana, na litha nṋa dza mapfura a ṋekedzwaho na epha iṅwe na iṅwe. ₆Musi wa vhuṱambo ha ṅwedzi u tshi dzula, tshiṱhavhelo tshi vhe mbohwana i si na luvhadzi na ngwana ṱhanu na nthihi dzi si na luvhadzi na thutha nthihi i si na luvhadzi. ₇Mboho na thutha dzi ṋekedzwe na nduvho ya epha nthihi ya thoro, ngwana dzi ṋekedzwe na nduvho ya thoro ine a tou funa, epha iṅwe na iṅwe i ṋekedzwe na litha nṋa dza mapfura.

₈“Musi muvhusi a tshi dzhena, a dzhene nga vanḓani ḽa khoro, a dovhe a bve nga nḓila yeneyo. ₉Vhathu vha shango musi vhone vha tshi ḓa phanḓa ha Yahavee vhuṱamboni ho vhewaho, vho dzhenaho nga khoro ya devhula vha tshi ḓa u luvha, vha bve nga khoro ya tshipembe, vho dzhenaho nga khoro ya tshipembe vha bve nga khoro ya devhula. Hu songo vha na ane a humela murahu a bva nga khoro ye a dzhena ngayo, nga a bve nga ḽiṅwe sia. ₁₀Muvhusi a ḓe navho, a dzhene unga vhone, a bve unga vhone.

₁₁“Nga maḓuvha a vhuṱambo ho fhambanaho mboho iṅwe na iṅwe na thutha iṅwe na iṅwe i ṋekedzwe na epha nthihi ya thoro, ngwana i ṋekedzwe na zwine a tou funa; epha iṅwe na iṅwe i ṋekedzwe na litha nṋa dza mapfura.

₁₂“Musi muvhusi a tshi ṋekedza tshiṱhavhelo tshi fhiswaho tshine a tou funa kana nduvho ya vhukonani ine a tou funa, a vulelwe khoro ya vhubvaḓuvha, a ṋekedze tshiṱhavhelo tshawe tshi fhiswaho na nduvho yawe ya vhukonani sa zwine a ita nga ḓuvha ḽa Sabatha; musi o no bva, khoro i mbo ḓi valwa.

₁₃“Musi muṅwe na muṅwe a nṋekedze ngwana i si na luvhadzi ya ṅwaha muthihi tshi vhe tshiṱhavhelo tshi fhiswaho; hetsho a tshi ṋekedze matsheloni maṅwe na maṅwe. ₁₄Matsheloni maṅwe na maṅwe a engedze a ṋekedze nduvho ya thoro: khilogiramu tharu dza vhukhopfu ha goroi na litha nthihi ya mapfura, a vanganywe na vhukhopfu. Heyo ndi nduvho ya thoro i ṋekedzwaho Nṋe, hoyo ndi mulayo wa lini na lini, a u gumi. ₁₅Ngwana na nduvho ya mbeu na mapfura zwi ṋekedzwe matsheloni maṅwe na maṅwe lini na lini.”

₁₆Muṋe wa zwoṱhe Muṋe washu u ri, “Arali muvhusi a ṋea muṅwe ṅwana wawe mukovhe wa shango ḽawe, iḽo shango ḽi ḓo vha ḽa onoyo ṅwana wawe, ḽa vha ifa ḽa muṱa wawe. ₁₇Huno arali a ṋea muṅwe mushumi wawe mukovhe wa shango ḽawe, iḽo shango ḽi ḓo vha ḽa uyo munna u swika ṅwaha une a vhofhololwa ngawo, ḽa konou dovha ḽa humela ha muvhusi. Ndi vhana vhawe fhedzi vhane vha nga dzula na mukovhe wa vha wavho tshoṱhe. ₁₈Muvhusi a songo dzhia na tshipiḓa zwatsho tsha mukovhe wa ifa ḽa vhathu, u ralo ha vha u vha dzhiela thundu yo vha fanelaho; ifa ḽine a ṋea vhana vhawe kha ḽi bve kha thundu yawe, uri hu si vhe na muthihi wa vhathu vhanga a no dzhielwa thundu yawe yo mu fanelaho, vhathu vha balangana na shango.”

₁₉Uyo munna a nnzhia nda dzhena nga muṋango sia ḽa khoro ya devhula yo livhaho rumuni khethwa dzo fhaṱelwaho vhotshifhe. Henefho phanḓa hashu, sia ḽa vhukovhela, ho vha hu na tshikhala magumoni. ₂₀Uyo munna a mmbudza a ri, “Hafha ndi hone hune vhotshifhe vha ḓo bika phukha dzo shidzhwaho dza tshiṱhavhelo tsha tshipfumelo na nduvho ya ndifho na nduvho ya thoro, vha si ṱwe vha tshi zwi hwalela muṱani wa nnḓa vha vhangela vhathu khombo nga vhukhethwa hazwo.”

₂₁A nnzhia a nnyisa muṱani wa nnḓa, a ntshimbidza khuḓani nṋa dzoṱhe; khuḓani iṅwe na iṅwe ya muṱa wa nnḓa ho vha hu na muṅwe muṱa muṱuku. ₂₂Ndi uri khuḓa nṋa dza muṱa dzo vha dzi na miṱa miṱuku miṋa, vhunavha vhu tshi ita maga a 40, vhuphara ha ita maga a 30, vhuṋa hayo i tshi eḓana. ₂₃Muṅwe na muṅwe wa iyo miṱa miṋa wo vha wo tangeledzwa nga mutsheṱo wa matombo, hu na zwivhaso hoṱhe u mona na tsinde ḽa mutsheṱo. ₂₄Uyo munna a mmbudza a ri, “Hezwi ndi zwiṱanga zwine vhashumi vha thembele vha ḓo bika khazwo zwiṱhavhelo zwine zwa ṋekedzwa nga vhathu.”