ESEKIELE 41

₁U bva afho uyo munna a nnzhia a nnyisa nḓuni khethwa, a ela mihangammbwa ya muṋango waho zwa ita maga maṱanu na ḽithihi vhudenya kha ḽiṅwe sia, na kha ḽiṅwe sia zwa ita maga maṱanu na ḽithihi. ₂U aṱama ha muṋango ho vha hu maga a fumi. Vhudenya ha mbondo sia ḽiṅwe na ḽiṅwe ḽa muṋango ho vha vhu maga maṱanu sia ḽino na maga maṱanu sia ḽiḽa. A ela vhunavha ha henefho ha ita maga a 40, vhuphara ha ita maga a 20. ₃Uyo munna a sendela rumuni ya bvungwi a yo ela phuphu dza vothi muṋangoni wayo dza ita maga mavhili, zwino ha ḓa muṋango wa ita maga maṱanu na ḽithihi, vhunavha ha mbondo sia ḽiṅwe na ḽiṅwe ḽa muṋango ha ita maga maṱanu na mavhili. ₄Ndi hone a tshi ela vhunavha ha Hukhethwakhethwa ha ita maga a 20, na vhuphara haho ha ita maga a 20 u fana na ha nnḓu khethwa. Zwenezwo a mmbudza a ri, “Hafha ndi hone Hukhethwakhethwa.”

₅Uyo munna a ela vhudenya ha luvhondo lwa thembele ha ita maga maṱanu na ḽithihi. U mona na thembele yoṱhe ho vha hu na rumu dzo kwamaho luvhondo lwayo, vhuphara hadzo ndi maga maṋa. ₆Idzo rumu dzo vha dzo ṱanḓekana u ya nṱha, dzi 30 kha tshitizi, zwitizi zwi zwiraru. Thikho dza idzo rumu dzo monaho hoṱhe dzo vha dzi songo longwa luvhondoni lwa thembele; ndi uri luvhondo lwa thembele lwo vha lu tshi fhungudzea sia ḽa nnḓa u ya nṱha, kha tshitizi tshiṅwe na tshiṅwe lwa sia lumeme, tshitizi tsha tou dzula nṱha ha lumeme lwonolwo sia ḽa ngomu, ₇zwa ita uri vhuphara ha dzirumu vhu ḓi engedzea vhu tshi ya nṱha, nga luvhondo lwa thembele lu tshi ḓi sekena lu tshi ya nṱha tshitizi nga tshitizi, lwo tangiwa nga dziḽa rumu ha vha na zwiṱepisi zwi no bva kha tshitizi tsha fhasi zwi tshi gonyela kha tsha nṱha. _8-11Vhudenya ha mbondo dza nnḓa dza lufhera lwo monaho na thembele ndi maga maṱanu. U mona na lwonolwo lufhera ho vha hu na luḓila lwa matombo; vhuphara halwo ndi maga maṱanu, vhulapfu u ya nṱha ndi maṱanu na ḽithihi. Miṋango ya lufhera lwo monaho na thembele yo vha yo lavhelesa luḓila holwo, muṅwe wo lavhelesa devhula, muṅwe tshipembe. Vanḓa ḽo vha ḽo tangiwa nga luvhanḓe lune vhuphara halwo ha ita maga a 20.

₁₂Vhukovhela ha tshikhala hetsho tshi si na tshithu ho vha hu na nnḓu ya vhunavha ha maga a 90 na vhuphara ha maga a 70, vhudenya ha luvhondo lwa nnḓu hu tshi ita maga maṱanu u mona hoṱhe. ₁₃A ela vhunavha ha thembele ha ita maga a ḓana. A konou ela muṱa wa murahu ha thembele khathihi na nnḓu ya vhukovhela na mbondo dzayo, na wone wa ita maga a ḓana. ₁₄Vhuphara ha phanḓa ha thembele na tshikhala tshi si na tshithu ho vha hu maga a ḓana. ₁₅A ela vhunavha ha iyo nnḓu ya vhukovhela murahu ha itsho tshikhala tshi si na tshithu tsho monaho hoṱhe, khathihi na phera dzo monaho na nnḓu, zwa ita maga a ḓana.

Matungo a Hukhethwakhethwa na mavanḓa a muṱa, ₁₆na zwiukhuvha zwao na zwitsireledzi zwa mafasiṱere na mahothi, mavhili mavhili, ḽithihi kha guvha ḽiṅwe na ḽiṅwe, zwoṱhe zwo vha zwo tibedzwa nga matanda, u bva fhasi u swika kha mafasiṱere, mafasiṱere ó tsireledzwa nga matanda. ₁₇U bva vothini u swika ngomu ha thembele na u mona luvhondo lwoṱhe lwa rumu ya ngomu, nga ngomu na nga nnḓa, ho vha hu na makolo a zwithu zwo vhaḓwaho, ₁₈vhakherube na mitshevho, mitshevho na vhakherube zwi tshi sielana, mukherube muṅwe na muṅwe o vha e na zwifhaṱuwo zwivhili, ₁₉tshifhaṱuwo tsha muthu o lavhelesa mutshevho, sia ḽiṅwe e na tshifhaṱuwo tsha ndau yo lavhelesa mutshevho sia ḽiṅwe, u mona na thembele yoṱhe. ₂₀Vhakherube na mitshevho zwo vha zwo vhaḓiwa u bva fhasi u swika nṱha ha muṋango, na mbondoni dza Hukhethwakhethwa. ₂₁Mihangammbwa ya Hukhethwa khathihi na ya Hukhethwakhethwa yo vha i na vhuphara na vhulapfu vhu eḓanaho.

₂₂Phanḓa ha Hukhethwakhethwa ho vha hu na aḽiṱari ya matanda, vhulapfu u ya nṱha i tshi ita maga mararu, vhunavha na u aṱama zwi tshi ita maga mavhili. Khuḓa dzayo na muteo na nga matungo ho vha hu matanda. Uyo munna a mmbudza a ri, “Heḽi ndi ḓafula ḽo imaho phanḓa ha Muṋe washu.”

₂₃Muṋango wa Hukhethwa wo vha u na mahothi mavhili, na wa Hukhethwakhethwa wo vha u na mahothi mavhili. ₂₄Mahothi ayo o vha e na hinzhi mbili, vothi ḽithihi ḽi na hinzhi mbili, ḽiṅwe-vho ḽi na hinzhi mbili. ₂₅Nṱha ha hayo mahothi a Hukhethwa ho vha ho vhaḓiwa makolo a vhakherube na mitshevho a no fana na a re mbondoni. Phanḓa ha vanḓa ḽa thembele ho vha hu na ṱhanga ya matanda. ₂₆Kha mbondo dza matungo a guḓa ho vha hu na vhubuli vhu re na makolo a mitshevho masia oṱhe. Rumu dza matungo a thembele na dzone dzo vha dzo fulelwa.