ESEKIELE 14

₁Vhaṅwe vhahulwane vha Israele vho ḓa nḓuni yanga vha dzula na nṋe, ₂ipfi ḽa Muṋe washu ḽa amba na nṋe ḽa ri, ₃“Iwe ṅwana wa muthu, havha vhathu vho vhea mbilu dzavho kha midzimu yavho ya tshika, zwi vha itisa vhuvhi vha zwi nambatela nga mbilu yoṱhe. Ndi nga vhuya nda tenda vha tshi mmbudzisa? ₄Zwino-ha, amba navho u vha vhudze u ri, ‘Muṋe wa zwoṱhe Yahavee u ri: Muisraele muṅwe na muṅwe ane a vhea mbilu yawe kha midzimu yawe ya tshika kana a nambatela zwi mu khakhisaho, a yo ṱoḓa muporofita, phindulo yawe u ḓo i wana kha Nṋe Yahavee, zwi tshi tevhedza midzimu yawe i sa fheli ya tshika. ₅Vhathu vha Israele vhe vha ntshandukela vha nambatela midzimu yavho i sa fheli ya tshika, ndi vhona uri ndi ḓo vha laṱisa nga u ralo.’

₆“Zwenezwo vhudza vhathu vha Israele u ri, ‘Muṋe wa zwoṱhe Yahavee u ri: Vhuyani! Landulani midzimu yaṋu ya tshika! Laṱani zwiito zwaṋu zwi nengisaho, ₇ngauri arali ufhio na ufhio wa vhathu vha Israele, kana mutsinda a dzulaho kha ḽa Israele, a ntshandukela a vhea mbilu yawe kha midzimu yawe ya tshika, a nambatela zwine zwa mu itisa vhuvhi, a yo ṱoḓa muporofita uri a ḓe a vhudzise Nṋe, phindulo yawe u ḓo i wana wana kha Nṋe, Yahavee. ₈Onoyo ndi ḓo lwa nae; ndi ḓo mu ita tsumbo na tshianeo. Ndi ḓo mu bvisa kha vhathu vhanga; ndi hone ni tshi ḓo zwi ḓivha uri ndi Nṋe Yahavee. ₉Arali muporofita a tenda u xedzwa a amba ḽiṅwe fhungo ḽa dubo, ndi Nṋe Yahavee ndi mu xedzaho, ndi ḓo angaladza tshanḓa tshanga nda mu rwa, nda mu bvisa kha vhathu vhanga Vhaisraele. ₁₀Vha ḓo hwala muhwalo wa milandu yavho, mulandu wa muporofita na wone u ḓo hula wa nga wa munna ane a yo mu vhudzisa. ₁₁Ndi hone vhathu vha Israele vha si tsha ḓo ntshandukela; a vha tsha ḓo dovha vha ḓishata mashika nga vhuvhi honoho. Vha ḓo vha vhathu vhanga, Nṋe nda vha Mudzimu wavho – hu amba Nṋe Muṋe wa zwoṱhe Yahavee.’ ”

₁₂Ipfi ḽa Muṋe washu ḽa amba na nṋe ḽa ri, ₁₃“Iwe ṅwana wa muthu, arali shango ḽa nkhakhela nga u sa fulufhedzea, Nṋe nda angaladza tshanḓa nda ḽi rwa, nda lozwa mavhele a zwiḽiwa zwaḽo, nda ḽi ḓisela nḓala ya vhulaha vhathu vhaḽo na zwifuwo, ₁₄zwino naho shangoni ḽeneḽo hu tshi dzula vhanna havhano vhararu, Nua na Danele na Jobo, havho vhanna vho vha vha tshi ḓo tshidzwa vhe vhararu fhedzi nga u fulufhedzea havho – hu amba Nṋe Muṋe wa zwoṱhe Yahavee. ₁₅Arali ndo vha ndi tshi nga ḓisa zwivhanda shangoni ḽeneḽo zwa ponda vhanna vhaḽo ḽa sala ḽi soga, ha si vhe na a fhiraho nga henefho nga u ofha izwo zwivhanda, ₁₆zwino naho avho vhanna vhararu vha tshi dzula shangoni ḽeneḽo, nga vhutshilo hanga – hu amba Nṋe Muṋe wa zwoṱhe Yahavee – vho vha vha sa ḓo lamukisa ṅwana wavho wa mutukana kana wa musidzana; ho vha hu tshi ḓo tshidzwa vhone vhe vhoṱhe, shango ḽone ḽa sala ḽi soga.

₁₇“Arali ndo vha ndi tshi nga ḓisa pfumo shangoni ḽeneḽo nda ri: Pfumo nga ḽi buḓekanye shango; ndi ḓo vhulaha vhathu na zwifuwo ngaḽo, ₁₈zwino naho avho vhanna vhararu vha tshi nga dzula shangoni ḽeneḽo, nga vhutshilo hanga – hu amba Nṋe Muṋe wa zwoṱhe Yahavee – vho vha vha sa ḓo kona u lamukisa ṅwana wavho wa mutukana kana musidzana; ho vha hu tshi ḓo tshidzwa vhone vhe vhoṱhe.

₁₉“Arali ndo vha ndi tshi nga ḓisa dwadze shangoni ḽeneḽo, nda dzikisa mbiti dzanga nga u shulula malofha avho ndi tshi vhulaha vhathu na zwifuwo, ₂₀naho Nua na Danele na Jobo vha tshi dzula shangoni ḽeneḽo, nga vhutshilo hanga – hu amba Nṋe Muṋe wa zwoṱhe Yahavee – vho vha vha sa ḓo lamukisa ṅwana wavho wa mutukana kana wa musidzana, vho vha vha tshi ḓo ḓitshidza vhone vhaṋe nga u fulufhedzea havho.”

₂₁Muṋe wa zwoṱhe Muṋe washu u ri, “Zwino zwi ḓo vhifha hani arali nda rwa Jerusalema nga ṱhamu dzanga nṋa dzi ofhisaho, pfumo na nḓala na zwivhanda na dwadze, nda lozwa vhathu vhawo na zwifuwo zwavho! ₂₂Naho zwo ralo hu ḓo vha na vha salaho henefho, vha vhamba maano vha ponyokisa vhaṅwe vhana vha vhatuka na vha vhasidzana, vha ḓa ha inwi uri ni vhone kutshilele kwavho na maitele avho, na pfa no rudza mbilu naho ndi tshi ḓo vha ndo rwa Jerusalema nga ṱhamu, ndo u ḓisela khombo. ₂₃Vha ḓo ni rudza mbilu musi ni tshi vhona kutshilele kwavho kuvhi na maitele avho mavhi, na ḓo konou ḓivha uri zwoṱhe zwe nda vha ita a tho ngo sokou zwi ita lwa fhedzi, hu amba Nṋe Muṋe wa zwoṱhe Yahavee.”