DOTORONOMIO 31

₁Mushe o amba na Vhaisraele vhoṱhe a ri, ₂“Nṋe ndo no vha na miṅwaha ya 120, a thi tsha kona u ni ranga phanḓa nndwani, nahone Muṋe washu o mmbudza a ri a thi nga weli Jorodani. ₃Muṋe washu Mudzimu waṋu ndi Ene ane a ḓo ni ranga phanḓa ni tshi wela, ndi Ene ane a ḓo lozwa tshakha idzi dzoṱhe dza ni shavha na konou dzhia mashango avho. Ni tshi wela, murangaphanḓa waṋu u ḓo vha Joshua, unga Muṋe washu o dzula o amba. ₄Tshakha idzi Muṋe washu u ḓo dzi ita zwenezwo zwe a ita Sihoni na Ogo mahosi a Vhaamori na mashango avho, u ḓo vha lozwa. ₅Musi Muṋe washu a tshi vha kumedza zwanḓani zwaṋu ni vha ite zwenezwo zwe nda ni laya. ₆Imani ni khwaṱhe, ni songo vha ofha, ni songo vha tetemela, hufha Muṋe washu Mudzimu waṋu a tshi khou ya na inwi, ha nga ni laṱedzi, ha nga ni ṱutsheli.”

₇Ndi hone Mushe a tshi vhidza Joshua, a mu laya Vhaisraele vhoṱhe vha tshi zwi pfa a ri, “Imani ni khwaṱhe, ndi inwi ane na ḓo isa lushaka ulu shangoni ḽe Muṋe washu a ḽi fulufhedzisa vhomakhulukuku wavho a ri u ḓo vha ṋea ḽone. Ndi inwi ane na ḓo vha endedza vha ḽi dzhia. ₈Muṋe washu Ene muṋe u ḓo ni ranga phanḓa; u ḓo ḓi tshimbila na inwi, ha nga ni laṱedzi, ha nga ni ṱutsheli, ni songo vhuya na ofha tshithu.”

₉Mushe o ṅwala mulayo wa Mudzimu a u ṋea vhotshifhe, vhone Vhalivi, vha hwalaho mbulungelo ya mulanga wa Muṋe washu, na vhahulwane vhoṱhe vha Israele, ₁₀a vha laya a ri, “Tshifhinga tshiṅwe na tshiṅwe musi ho fhela miṅwaha miṱanu na mivhili, nga ṅwaha wa u hangwelana milandu, vhuṱamboni ha Mishasha ₁₁musi Vhaisraele vhoṱhe vha tshi ḓa u dalela Muṋe washu Mudzimu waṋu fhethu he a ḓinangela, ni vhale mulayo uyu Vhaisraele vhoṱhe vha tshi zwi pfa nga nḓevhe dzavho. ₁₂Hu vhe na tshivhidzo tsha vhathu vhoṱhe, vhanna na vhasadzi na vhana na vhatsinda vhane na dzula navho, uri noṱhe ni zwi pfe ni gude u hulisa Muṋe washu Mudzimu waṋu, ni vhulunge ndayo idzi dzoṱhe ni dzi tevhedze. ₁₃Ngauralo na vhana vhaṋu vha sa athu ḓivha mulayo wonoyo vha ḓo ḓipfela nga vhoṱhe vha guda u hulisa Muṋe washu Mudzimu waṋu misi yoṱhe ine na dzula shangoni ḽine na khou wetshela khaḽo ni tshi wela Jorodani uri ni ḽi dzhie ḽi vhe ḽaṋu.”

₁₄Muṋe washu a vhudza Mushe a ri, “Tshifhinga tsho sendela tsha uri u fe. Vhidza Joshua ni ime denndeni ya u ṱangana na Nṋe ndi mu laye.” Ndi hone Mushe na Joshua vha tshi ya vha ima denndeni ya u ṱangana na Muṋe washu. ₁₅Muṋe washu a vhonala henefho denndeni e phuphuni ya gole, iyo phuphu ya gole ya ima muṋangoni wa dennde.

₁₆Muṋe washu a amba na Mushe a ri, “Hu si kale u ḓo fa. Wó no fa holu lushaka lu ḓo ntshandukela lwa yo ita vhupombwe na midzimu isili ya shango iḽo ḽine vha khou ya khaḽo. Vha ḓo nṱutshela vha vhofholola mulanga wanga we nda vhofha navho. ₁₇Zwenezwo ndi ḓo vha sinyutshela nda vha ṱutshela-vho, nda vha furalela. Vha ḓo lovha vha welwa nga khombo nnzhi vha tambula zwinzhi. Ndi hone vha tshi ḓo ri, ‘Khombo idzi dzo ri wela ngauri Mudzimu washu ha tshee na riṋe.’ ₁₈Naho zwo ralo ndi ḓo ḓi vha furalela misi iyo nga mulandu wa vhuvhi hoṱhe he vha ita vha tshi tevhela midzimu isili.

₁₉“Ḓiṅwaleleni-ha luimbo holu, ni lu gudise Vhaisraele uri vha kone u lu imba-vho uri matshelo luimbo ulu lu vhe vhuṱanzi ha u vha haṱula. ₂₀Ndi ḓo vha swikisa shangoni ḽe nda fulufhedzisa vhomakhulukuku wavho, shango ḽi elaho mukhaha na ṋotshi, hone vhone vha ḓo ri vho ḽa vha fura vha khwaṱha, vha mbo rembulutshela ha midzimu isili vha luvha yone, Nṋe vha nnyadza vha vhofholola mulanga wanga. ₂₁Musi khombo idzo nnzhi na madambudzo zwi tshi vho vha wela, luimbo holu lu ḓo vha vhudza uri zwi itwa ngani. Vha kha ḓi ḓo lu imba, lwa konou vha vhuṱanzi ha u vha laṱa. Nṋe ndi ḓivha mbilu dzavho na ṋamusi vha tshee fhano ndi sa athu vha swikisa shangoni ḽe nda vha fulufhedzisa.” ₂₂Zwo no ralo Mushe a ṅwala ulwo luimbo ḓuvha ḽeneḽo a lu gudisa Vhaisraele.

₂₃Ndi hone Muṋe washu a tshi laya Joshua ṅwana wa Nunu a ri, “Ndi iwe ane wa ḓo ranga Vhaisraele phanḓa wa vha swikisa shangoni ḽe nda vha fulufhedzisa; ima-ha u khwaṱhe, Nṋe muṋe ndi ḓo vha na iwe!”

₂₄Musi Mushe o fhedza u ṅwala mafhungo oṱhe a mulayo uyu buguni, ₂₅a laya Vhalivi vha hwalaho mbulungelo ya mulanga wa Muṋe washu a ri, ₂₆“Dzhiani bugu iyi ya mulayo ni i vhee tsini ha mbulungelo ya mulanga wa Muṋe washu Mudzimu waṋu uri i vhe ṱhanzi ni tshi laṱwa nga tshifhinga tshi ḓaho. ₂₇Nṋe ndi ḓivha uri ni vhadzia-u-shanduka na vhadzia-tshipimbi, hufha no shandukela Muṋe washu nṋe ndi tshi kha ḓi tshila, zwino musi ndo no fa zwi ḓo vha zwingafhani? ₂₈Ndi zwone, rambani vhahulwane vhoṱhe vha matsinde aṋu na vharangaphanḓa vhaṋu ndi kone u vha vhudza mafhungo aya ndi vha vhudze uri ḽiṱaḓulu na ḽifhasi ndi ṱhanzi dzanga, ₂₉ngauri ndi dzula ndi tshi zwi ḓivha uri musi ndo no fa a ni nga kundwi u tshinya na pambuwa nḓilani ye nda ni laya, ndi zwine na ḓo welwa nga khombo misi i ḓaho, ngauri ni ḓo ita zwi sa takadzi Muṋe washu, na mu ṱunga nga zwiito zwaṋu.”

₃₀Mushe a imba luimbo holu Vhaisraele vhoṱhe vha tshi khou thetshelesa, a vhuya a lu fhedza.

O imba a ri,