DOTORONOMIO 23

₁“Munna o luvhedzwaho kana o tumulwaho vhudzimu ha tsha vhalwa na tshivhidzo tsha Muṋe washu.

₂“Muthu o bebiwaho nga khotsi na mme vha re mashaka a tsini ho ngo tendelwa u dzhena tshivhidzoni tsha Muṋe washu, na vhaḓuhulu vhawe vha songo dzhena tshivhidzoni tsha Muṋe washu u vhuya u swika kha murafho wa fumi. ₃Muamoni kana Mumuaba ha vhalwi na tshivhidzo tsha Muṋe washu; na vhaḓuhulu vhavho a vha vhalwi khatsho lini na lini. ₄Ndi uri zwiḽa ni nḓilani ni tshi bva Egipita, vhone a vho ngo ni ṱanganedza vha ni ṋea zwiḽiwa na maḓi, tshe vha ita vho tou thola Biliamu ṅwana wa Bioro we a vha a tshi dzula Phethoro kha ḽa Misopothamia, vha mu ṋea tshelede uri a ḓe a ni teketele. ₅Muṋe washu Mudzimu waṋu o tou sa tenda u ita zwe Biliamu a humbela, a mbo shandukisa mafhanza a vha mashudu, ngauri u a ni funa. ₆Zwenezwo ni songo vhuya na pfana navho, na u vha tonda ni songo vha tonda lini na lini.

₇“Vhaedomo vhone ni songo vha sanda, ndi mashaka aṋu. Na Vhaegipita ni songo vha sanda, ngauri no vhuya na dzula shangoni ḽavho. ₈Arali Muedomo kana Muegipita a tshi dzula na inwi, vhaḓuhulu vhawe vha murafho wa vhuraru vha a vhalwa zwavho na tshivhidzo tsha Muṋe washu.

₉“Musi ni tshi bvela maswina aṋu pfumo, ni vhone uri ni si ite tshithu tshivhi na tshithihi. ₁₀Arali muṅwe waṋu o kumala nga u lora a tevhula mbeu ya tsiko vhusiku, u fanela u bva mishashani yaṋu, a songo dzhena khayo. ₁₁Ḽi ḓo ri ḽi sa athu kovhela, a ṱamba nga maḓi, ḽo no kovhela a konou vhuya.

₁₂“Ni fanela u vha na fhethu hune na bvela hone, nnḓa ha mishasha, hune na ya hone ni tshi bvela nga nnḓa. ₁₃Kha thundu dzaṋu hu vhe na kutanda kwa u bwa. Ni ḓo ri ni tshi bvela nga nnḓa na thoma u bwa kudindi, na ri no fhedza na fukedza. ₁₄U vhuya zwa pfalwo ndi uri Muṋe washu Mudzimu waṋu u na inwi mishashani yaṋu uri a ni lamulele, a kumedze maswina aṋu zwanḓani zwaṋu, ndi zwine mishasha yaṋu ya pfi i vhe mikhethwa; arali Muṋe washu a tshi vhona zwa vhuaḓa mishashani yaṋu, u ḓo ni ṱutshela.

₁₅“Arali phuli ya shavha muṋe wayo ya swika kha iwe, u songo mu humisela ha muṋe wawe. ₁₆A nga ḓi dzula na iwe hune a funa muḓini muṅwe waṋu; u songo mu tambudza.

₁₇“Musidzana wa Muisraele a songo vhuya a vha phombwe ya thembeleni, na muṱhannga wa Muisraele a songo ralo. ₁₈Na tshelede ye vha wana nga yeneyo nḓila i songo vhuya ya ḓiswa thembeleni ya Muṋe washu Mudzimu waṋu uri ni lifhe zwe na mu fulufhedzisa; Muṋe washu Mudzimu waṋu u nengiswa nga zwenezwo zwithu vhuvhili hazwo.

₁₉“Arali u tshi adzima Muisraele wa hau zwiṅwe – i nga vha tshelede kana zwiḽiwa kana tshifhio na tshifhio – u songo zwi vhila na mavhoḓa azwo. ₂₀Mutsinda u nga mu bvisisa zwawe mavhoḓa, hone Muisraele nga iwe u songo mu bvisisa, ndi hone Muṋe washu Mudzimu waṋu a tshi ḓo ni shudufhadza kha zwoṱhe zwine na shuma shangoni ḽine na khou ya khaḽo uri ni ḽi dzhie ḽi vhe ḽaṋu.

₂₁“Arali u tshi fulufhedzisa Muṋe washu Mudzimu waṋu tshithu, u songo lenga u tshi bvisa; u ḓo u sengisa wa wanala u na mulandu. ₂₂Arali u sa fulufhedzisi Muṋe washu tshithu, a u na mulandu, ₂₃hone arali wa bula nga u tou funa hau wa ri u ḓo ṋea Muṋe washu tshiṅwe tshithu, u fanela u khunyeledza zwe wa mu fulufhedzisa.

₂₄“Arali u tshi dzhena tsimuni ya muṅwe ya minḓirivhe, u nga ḽa wa fura, tenda wa si fulele mufaroni. ₂₅Arali u tshi fhira nga tsimuni ya muṅwe ya goroi u nga ḓi ṱhukhula zwau ṱhotshe nga tshanḓa wa ḽa, tenda wa si tou tshea nga segere.