DOTORONOMIO 22

₁“U songo ri u tshi vhona kholomo ya muṅwe kana nngu kana mbudzi yó xela wa sokou i litsha; u fanela u i humisela khae. ₂Arali muṋe wayo a tshi dzula kule, kana arali u sa ḓivhi uri ndi nnyi, u fanela u dzhia tshifuwo itsho wa tshi khadela hayani hau, wa dzula natsho muṋe watsho a vhuya a tshi ṱoḓa, wa konou mu ṋea. ₃Zwi ḓi nga donngi kana tshiambaro kana thundu iṅwe na iṅwe ya muṅwe yo ngalangalaho, arali u tshi i wana u songo sokou i litsha.

₄“Arali u tshi ṱangana na donngi kana kholomo ya muṅwe yó tsikeledzwa nga muhwalo nḓilani, u songo sokou i litsha, mu farise a i vuse.

₅“Musadzi ha ambari tshiambaro tsha munna, zwi ḓi nga munna a sa ambari tsha musadzi; ane a nga ita hezwo u tou nengisa Muṋe washu Mudzimu waṋu.

₆“Arali u tshi wana tshiṱaha tsha tshiṋoni murini kana fhasi mavuni, wa vhona tshiṋoni tshi tshi khou alamela makumba kana tsho fukedza mafhondo, u songo dzhia mme khathihi na makumba; ₇litsha mme a fhufhe u konou dzhia mafhondo, ndi hone zwi tshi ḓo u nakela wa lalama.

₈“Arali u tshi ḓifhaṱela nnḓu ntswa u fanela u vhiela muṱa u re nṱha ha ṱhanga nga guḓa uri muthu a sa ḓo wela fhasi e nṱha ha ṱhanga, a fa wa ovha mulandu wa malofha awe.

₉“Zwi a ila u gobela thoro tsimuni ya minḓirivhe; arali wa zwi ita, khaṋo ya iyo mbeu khathihi na minḓirivhe i ḓo vha ya thembele.

₁₀“U songo pana phulu na donngi nga dzhogo nthihi.

₁₁“U songo ambara tshiambaro tsho lukwaho nga vhukuse ho vanganaho na muḓali.

₁₂“U rungelele zwivhuvhi kha ṱhodzi nṋa dza tshiambaro tshau.

₁₃“Arali munna a tshi dzea musadzi a mu dzhenisa nḓuni a vho mu nengwa ₁₄a thoma u mu tshinya dzina nga u mu pomoka zwi sa ḓivhalei, a ri, ‘Ndo dzea uyu musadzi nda mu dzhenisa nḓuni nda wana a si tshee musidzana wa phorelele,’ ₁₅zwenezwo vhabebi vha musadzi vha fanela u bvisa tsumbo ya uri ṅwana wavho o vha a tshee musidzana vha isa tsumbedzo khoroni vha i sumbedza vhahulwane vha muḓi, ₁₆khotsi a musadzi a amba na vhahulwane a ri, ‘Ndo ṋea uyu munna ṅwananga uri a vhe musadzi wawe, zwino u vho mu nengwa, ₁₇u mu pomoka zwithu zwi sa ḓivhalekani a tshi ri: Ndo wana ṅwana waṋu e si musidzana wa phorelele. Huno tsumbedzo ya uri ṅwananga ndi musidzana khei.’ A tshi ralo a adze sila ḽe vha lala khaḽo vha tshi dzhenisana nḓuni lwa u thoma ya vha tsumbo ya uri uyo ṅwana o vhingwa e musidzana. ₁₈Zwo no ralo vhahulwane vha muḓi vha fanela u dzhia uyo munna vha mu rwa nga ṱhamu, ₁₉vha dovha vha mu lifhisa maseṱha a ḓana vha a ṋee khotsi a musadzi, ngauri mukwasha o tshinya dzina ḽa musidzana wa phorelele wa Muisraele. Nahone ho ngo tendelwa u mu ṱala vhutshilo hawe hoṱhe.

₂₀“Hone arali munna o amba ngoho, arali zwo wanala uri musadzi o vha e si musidzana wa phorelele, ₂₁u fanela u bviselwa muṋangoni wa nnḓu ya khotsi awe, vhanna vha muḓi wawe vha mu kanḓa nga matombo vha mu vhulaha, ngauri o ita zwi shonisaho Israele, o ita vhupombwe a tshee nḓuni ya khotsi awe. Ndi hone ni tshi ḓo fhelisa vhuvhi uho.

₂₂“Arali munna a farwa e na musadzi wa muṅwe vha fanela u vhulawa vhoṱhe vhuvhili havho; ndi hone ni tshi ḓo fhelisa vhuvhi uho kha Vhaisraele.

₂₃“Arali munna a tshi ṱangana na musidzana o no dzewaho nga muṅwe, a ṱangana nae muḓini a mu dzhenisa nḓuni, ₂₄ni fanela u vha dzhia vhuvhili havho na vha bvisela khoroni ya muḓi na vha kanḓa nga matombo na vha vhulaha. Musidzana ni tshi mu vhulaha ndi uri u ḓo vha a songo ṱavha mukosi, hone zwo itea ngomu muḓini, munna ene ni mu vhulahe ngauri u ḓo vha o tshinya musidzana o no dzewaho nga muṅwe munna. Ndi hone ni tshi ḓo fhelisa vhuvhi uho.

₂₅“Hone arali munna a tshi ṱangana na musidzana ḓakani a mu tshipa, ngeno uyo musidzana o no dzewa nga muṅwe munna, hu fanela u vhulawa uyo munna o mu tshipaho fhedzi, ₂₆musidzana ni songo mu ita tshithu, a hu na tshe a ita tsho eḓanwaho nga lufu; zwe a itwa zwi fana na musi munna o fara muṅwe a mu vhulaha. ₂₇Uyo munna o mu wana ḓakani, musidzana uyo o dzewaho nga muṅwe munna o ṱavha mukosi ha si vhe na we a mu lamulela.

₂₈“Arali munna a tshi ṱangana na musidzana a sa athu fulufhedzisanaho na munna, a mu fara a mu tshipa zwa bvela khagala, ₂₉zwenezwo uyo munna o tshipaho musidzana u fanela u lifhela khotsi a musidzana maseṱha a 50 a dzea musidzana. Ho ngo tendelwa u mu ṱala lini na lini, ngauri o mu tshipa.

₃₀“Hu songo vha na munna ane a nyadzisa khotsi awe nga u ita mmane musadzi.