DOTORONOMIO 19

₁“Muṋe washu Mudzimu waṋu u ḓo lozwa tshakha dzine a ni ṋea shango ḽadzo, na vha thatha na dzula miḓini yavho na nḓuni dzavho. ₂No ralo ni khethe miḓi miraru henefho shangoni ḽine Muṋe washu Mudzimu waṋu a ni ṋea uri ḽi vhe ḽaṋu, ₃zwino muthu ane a tshenuwa o vhulaha muṅwe u ḓo kona u shavhela kha yeneyo miḓi. Ni khethekanye shango ḽaṋu ḽine Muṋe washu Mudzimu waṋu a ni ṋea, ḽi vhe zwipiḓa zwiraru, uri muṅwe na muṅwe a kone u swika khayo. ₄Arali muthu a tshenuwa o vhulaha muṅwe hu si nga khole, e si muthu we a dzula o mu fara nga mbilu, onoyo a nga shavhela miḓini iyo uri a si vhulawe. ₅Tsumbedzo ngei: Arali vhanna vhavhili vha tshi yo reḓa khuni ḓakani, ha ri muṅwe a tshi imisa tshanḓa uri a reme thanda, mbaḓo ya tshenuwa yo ṱomowa ya rwa uḽa muṅwe a fa; a no nga onoyo a nga shavhela ha muṅwe wa heyo miḓi a si vhulawe. ₆Arali muḓi u kule, shaka ḽa mufu ḽi re mulifhedzi ḽi nga mu sala murahu ḽa mu fara a sa athu swika, ḽa ri ḽi tshee ḽo sinyuwa, ḽa mu vhulaha a si na mulandu wo eḓanaho lufu, ngauri o vha a songo dzula o fara mufu nga mbilu. ₇Ndi zwine nda ni laya uri ni khethe miḓi miraru.

₈“Huno Muṋe washu Mudzimu waṋu u ḓo dovha a engedza shango ḽe a fulufhedzisa vhomakhulukuku waṋu, a ni ṋea shango ḽoṱhe ḽe a dzula o amba uri u ḓo ḽi ṋea vhomakhulukuku waṋu ₉arali na vhulunga ndayo dzoṱhe dzine nda ni laya ṋamusi na dzi tevhedza, na funa Muṋe washu Mudzimu waṋu, na tevhela nḓila dzawe misi yoṱhe. Zwenezwo ni dovhe ni khethe miṅwe miḓi miraru ni tshi ḓadzisa iḽa ya u thoma. ₁₀Ni ite nga u ralo uri hu si vhulawe muthu a si na mulandu shangoni ḽine Muṋe washu a ni ṋea uri ḽi vhe ḽaṋu, ni sa ḓo ḓiovhela mulandu wa u shulula malofha.

₁₁“Hone arali muthu a tshi dzula o fara muṅwe nga mbilu, a mu lalela a tshi ri a mu vhulahe, nangoho a mu vhulaha, onoyo naho a shavhela kha muṅwe wa yeneyo miḓi, ₁₂vhahulwane vha muḓi wa hawe vha fanela u yo mu dzhia henefho vha mu kumedza shaka ḽi re mulifhedzi uri ḽi mu vhulahe. ₁₃Ni songo mu khathutshela, muthu a no sokou vhulaha muṅwe a si na mulandu tshawe ndi u lozwiwa a si tsha wanala kha Vhaisraele, ndi hone zwi tshi ḓo ni nakela.

₁₄“Ni songo sudzulusa mikano ya muṅwe; yo dzula yo vhewa nga vha kale uri i sumbe mikovhe ine na wana shangoni ḽine Muṋe washu Mudzimu waṋu a ni ṋea uri ḽi vhe ḽaṋu.

₁₅“A zwo ngo tendelwa uri hu ṱanziele muthu muthihi fhedzi khoroni a tshi vhea vhuṱanzi ha vhukhakhi kana vhutshinyi vhufhio na vhufhio; arali muthu o tshinya ni nga ṱanganedza vhuṱanzi arali ṱhanzi dzi mbili kana tharu.

₁₆“Arali ha ḓa ṱhanzi mmbi ya pomoka muthu nga u mu zwifhelela i tshi ṱoḓa u mu huvhadza fhedzi, ₁₇zwenezwo mupomoki na mupomokwa nga vha yo ima phanḓa ha Muṋe washu thembeleni, vha ime phanḓa ha vhotshifhe na vhahaṱuli vhane ḽa vha diso ḽavho musi uyo, ₁₈vhenevho vha ṱoḓisese mafhungo. Arali zwa wanala uri ṱhanzi iyo yo tou zwifhelela uyo muṅwe, ₁₉ni i ite zwenezwo zwe ya vha i tshi ṱoḓa u ita uḽa a si na mulandu, ndi hone ni tshi ḓo fhelisa vhuvhi vhu no nga honoho kha inwi. ₂₀Vhathu vha ḓo pfa zwo iteaho, vha ofha, vhuvhi vhungafho ha si tsha itwa kha inwi. ₂₁Ni songo khathutshela ṱhanzi iyo, ni lifhedze vhutshilo nga vhutshilo, iṱo nga iṱo, iṋo nga iṋo, tshanḓa nga tshanḓa, mulenzhe nga mulenzhe.