VHAKOLOSA 3

₁Vhunga zwino no no vuswa vhafuni na Khristo, lwelani-ha zwa ngei ṱaḓulu he Khristo a dzula thungo ya tshanḓa tshauḽa tsha Mudzimu a tshi vhusa nae. ₂Livhisani mbilu dzaṋu kha zwa ngei ṱaḓulu, hu si kha zwa fhano fhasi. ₃Hufha no fa; vhutshilo haṋu ndi vhuḽa ho dzumbamaho na Khristo ngei Mudzimuni. ₄Khristo ndi Ene vhutshilo haṋu. Musi a tshi ḓo dovha a vhonala, ndi hone na inwi ni tshi ḓo vhonala nae ni na vhugala.

₅Vhulahani-ha zwoṱhe zwa fhano shangoni zwine zwa nga ḓi ni nambatela, zwi no nga vhupombwe na vhuaḓa na u emulana na nyemulo dzoṱhe mmbi, na u funesa lupfumo; u funesa lupfumo zwi fana na u rerelela midzimu ya zwifanyiso. ₆Hezwo-ha ndi zwone zwine zwa ita uri Mudzimu a rwe vha sa mu pfi. ₇Na inwi kale no vha ni tshi tshila nga kutshilele kwonokwo, ni tshi ita zwenezwo. ₈Hone zwino zwoṱhe hezwo ni pfi ni zwi laṱe: zwenezwo zwi no nga u sinyutshelana na mbiti na vhunwa na u semana. Ni songo tsha vhuya na bula maṱamba ₉naho hu u zwifhelana. Hufha no no bvula muthu mulala na zwiito zwawe; ₁₀no no ambara muswa ane a sikwa nga huswa hu u fanyisa Ene Musiki wawe, a tou mu kokotolo na kha u mu ṱalukanya. ₁₁Kha vho raloho a zwi tsha dina kana u Mugiriki kana u Mujuda, kana wo fumba kana a wo ngo fumba, kana u amba luambo lufhio, kana a wo ngo funzwa, kana u phuli kana u muḓilangi; tenda Khristo e zwoṱhe kha roṱhe.

₁₂Ndi zwone-ha vhunga no nangiwa nga Mudzimu, ni vhakhethwa vhawe vhane a vha funa, ambarani-ha tshilidzi na vhuthu na u ḓiṱukufhadza na vhulenda na u sa fhela mbilu. ₁₃Ni songo fhelelana mbilu, ni songo farana nga mbilu, ni hangwelane unga na Muṋe washu o ni hangwela. ₁₄Hone tshihulwane tshi fhiraho zwoṱhe ndi uri ni funane. Lufuno ndi yone mbofho i ni vhofhekanyaho na vha na vhuthihi ho khunyelelaho. ₁₅Tshi vhusaho mbilu dzaṋu kha u vhe mulalo wa Khristo, vhunga no vhidzelwa mulalo, ní miraḓo ya muvhili muthihi. Dzulani-ha ni tshi livhuha Mudzimu. ₁₆Ipfi ḽa Khristo na lupfumo lwaḽo lwoṱhe kha ḽi fhaṱele kha inwi, ni vhe na vhuṱali ha u kona u funzana na u layana. Ni imbele Mudzimu dziphisalema na nyimbo dza u mu renda na dzine na funzwa nga Muya, ni tshi imba nga mbilu dzi livhuhaho. ₁₇Na tshini tshine na amba kana u ita, ni tshi ite nga dzina ḽa Muṋe washu Yesu, ni tshi livhuha Mudzimu Khotsi ngae.

₁₈Inwi vhasadzi ipfani vhanna vhaṋu unga zwo fanela vha re vha Muṋe washu.

₁₉Inwi vhanna funani vhasadzi vhaṋu, ni songo vha na tshiṱuhu.

₂₀Inwi vhana, ipfani vhabebi vhaṋu ni ite zwoṱhe zwine vha ni vhudza; ndi zwone zwine Muṋe washu a zwi takalela.

₂₁Inwi vhokhotsi, ni songo ṱwela u kaidzekanya vhana vhaṋu, vha sa ḓo kulea nungo.

₂₂Inwi dziphuli, thetshelesani vhaṋe vhaṋu vha fhano shangoni ni ite zwoṱhe zwine vha ni vhudza, hu si musi no lindiwa fhedzi zwa vho nga ndi u ṱoḓa u khoḓwa nga vhathu; inwi ni vha thetshelese nga mbilu nthihi ni sa hoyi, vhunga ni tshi ofha Muṋe washu. ₂₃Na tshini tshine na ita ni shume nga mbilu yoṱhe, ni nge ni itela Muṋe washu hu si vhathu, ₂₄vhunga ni tshi zwi ḓivha uri Muṋe washu u ḓo ni ṋea pfufho ye a ni vhetshela. Ḓivhani uri Muṋe waṋu vhukuma ane na mu shumela ndi Ene Khristo. ₂₅Ane a khakha u ḓo lifhedzwa vhukhakhi hawe nga Ene Khristo; Ene ha sedzi muthu, u sedza mulandu.