MISHUMO 9

₁Saulo zwi tshi khou ralo o vha a kha ḓi halifhela vhafunziwa vha Muṋe washu, a tshi ri vha vhulawe. A ya ha tshifhe muhulu ₂a humbela maṅwalo a u ḓiswikisa sinagogoni dzi re Damasko uri arali a tshi wana vhaṅwe vho faraho Nḓila ya Khristo, vhanna kana vhasadzi, a vha fare a vha ḓise Jerusalema.

₃Musi e nḓilani a tshi vho swika Damasko, kathihi fhedzi a mbo ḓi penyelwa nga tshedza tshi tshi bva ṱaḓulu, tsha tou mu putela. ₄A wela fhasi a pfa ipfi ḽi tshi khou amba nae ḽi tshi ri, “Saulo, Saulo, u ntovholelani?” ₅Ene a vhudzisa a ri, “Muṋe wanga, ndi nga vha ndi khou amba na nnyi?” Ipfi ḽa ri, “Ndi Nṋe Yesu ane wa khou mu tovhola. ₆Zwino takuwa u dzhene afho muḓini, ndi hone hune wa ḓo vhudzwa zwine wa fanela u ita.” ₇Vhaḽa vhanna vhe vha vha vha tshi khou tshimbila nae vho vha vho no sokou hanganea; ipfi ḽone vho vha vha tshi ḽi pfa, ngeno vha sa vhoni muthu; ₈Saulo a tshi vuwa, a tshi ri ndi a bonyolola maṱo, a si tsha kona u vhona. Vha mu fara nga tshanḓa vha dzhena nae Damasko. ₉Ha fhela maḓuvha mararu a sa koni u vhona, a sa ḽi, a sa nwi tshithu.

₁₀Zwino henefho Damasko ho vha hu na muṅwe mufunziwa a no pfi Ananiasi. Onoyo a vhona Muṋe washu kha bono a tshi khou amba nae a tshi ri, “Ananiasi!” Ene a fhindula a ri, “Ndi fhano Muṋe wanga.” ₁₁Muṋe washu a amba nae a ri, “Takuwa u ye nḓuni ya Judasi kha Tshiṱaraṱatswititi. Henefho u humbele u amba na muṅwe munna wa Tharasisi a no pfi Saulo. Nga tshifhinga hetshi u khou rabela, ₁₂nahone o no ḓi vhona bono ḽa muthu ane a pfi Ananiasi a tshi ḓa a mu vhea zwanḓa uri a dovhe a vhone.”

₁₃Ananiasi a fhindula a ri, “Muṋe wanga, hoyo munna vhathu vhanzhi a vha mu ambesi; vha ri zwe a ita vhathu vhau Jerusalema a si zwiṱuku. ₁₄Na u ḓa hawe fhano, o ḓa o fhiwa maanḓa nga vhotshifhe vhahulwane uri a fare vhoṱhe vhane vha luvha Iwe.” ₁₅Muṋe washu a amba nae a ri, “Iya, muthu uyo ndi muḓinḓa we nda ḓinangela uri a nnḓivhadze kha vhannḓa na mahosi avho, a ralo na kha vhathu vha Israele. ₁₆Ndi kha ḓi ḓo mu sumbedza uri u ḓo tambudzwa zwingafhani a tshi tambudzelwa Nṋe.”

₁₇Ndi hone Ananiasi a tshi takuwa a ya nḓuni yeneyo. A ri u swika a vhea Saulo zwanḓa, a ri, “Saulo murathu wanga, Muṋe washu o nthuma, onoyo Yesu we na mu vhona nḓilani ni tshi ḓa. O nthuma uri ni dovhe ni vhone na uri ni ḓadzwe Muya Mukhethwa.” ₁₈Zwenezwo ha mbo ḓi bva zwithu zwi no nga makwanda a khovhe maṱoni a Saulo, a dovha a vhona. A takuwa a lovhedzwa; ₁₉a konou ḽa, miraḓo yawe ya dovha ya khwaṱha.

Saulo o ita maḓuvhanyana a tshi dzula na vhafunziwa henefho Damasko. ₂₀O ri u lovhedzwa a mbo ḓi ya dzisinagogoni a ḓivhadza Yesu kha vhathu a tshi tou ri, “Yesu ndi Ene Murwa wa Mudzimu.” ₂₁Vhoṱhe vhe vha mu pfa vha akhamala vha ri, “Nṋa uyu munna a si ene uḽa we a vha a tshi linga u lozwa vhathu vha luvhaho Yesu ngei Jerusalema? Zwino u vhuya a ḓa fhano ho vha hu si hone u ṱoḓa u fara vhathu vho raloho a vha isa ha vhotshifhe vhahulwane?”

₂₂Maanḓa a pfunzo ya Saulo a ḓi hula a tshi ya, na Majuda vha Damasko vha si tsha zwi kona, ngauri o vha a tshi ṱalutshedza zwa vhonala uri Yesu ndi Ene Mesia.

₂₃Hó no vha maḓuvha Majuda vha langana u vhulaha Saulo, ₂₄hone ene a pfa zwe vha vha vha tshi ṱoḓa u mu ita. Vha mu lalela khoroni vhusiku na masiari uri vha mu vhulahe. ₂₅Hone ḽiṅwe ḓuvha vhafunziwa vhawe vha mu dzhia vhusiku vha mu bvisa nga buli ḽa mutsheṱo vha mu tsisela fhasi nga tshirundu.

₂₆Saulo a tshi swika Jerusalema a linga u ḓibaḓekanya na vhafunziwa. Vhone vha si kone u fulufhela tshoṱhe uri o no vha mufunziwa, vhoṱhe vha tshi ḓi mu ofha. ₂₇Ndi hone Barnabasi a tshi mu dzhia a mu swikisa kha vhaapostola. A vha anetshela a Saulo a tshi vhona Muṋe washu nḓilani na uri Muṋe washu o ita na u tou amba nae. A vha vhudza uri Saulo o vha a tshi khou funza nga dzina ḽa Yesu Damasko a sa ofhi. ₂₈Ndi hone Saulo a tshi vho dzula navho vha tshi tshimbila hoṱhe Jerusalema, ene a tshi funza nga dzina ḽa Muṋe washu a sa ofhi tshithu. ₂₉O vha a tshi ḓi ita a tshi amba na Majuda vha ambaho Tshigiriki, a tshi hanedzana navho, vhone vha vho dzula vha tshi ṱoḓa u mu vhulaha. ₃₀Vhakhriste ngae vha tshi zwi pfa vha mu dzhia vha tsa nae Khisaria, vha konou mu shavhisela Tharasisi.

₃₁Tshivhidzo tshone kha ḽoṱhe ḽa Judia na Galelia na Samaria tsha sa tsha diniwa. Tsha ḓi khwaṱha tshi tshi fariswa nga Muya Mukhethwa, tsha aluwa tshi tshi ya, tsha dzula tshi tshi ofha Mudzimu.

₃₂Pitrosi o vhuya a ri a tshi khou dalela fhano na fhano, a swika na kha vhathu vha Mudzimu vha re Lida. ₃₃Henefho a wana muṅwe munna a no pfi Eniasi we a vha o oma miraḓo, zwi tshi vho ita miṅwaha miṱanu na miraru e thovhoni. ₃₄Pitrosi a amba nae a ri, “Eniasi, Yesu u ri fholani. Zwino vuwani ni adzulule thovho yaṋu.” Eniasi a mbo ḓi vuwa na zwenezwo. ₃₅Vhathu vhoṱhe vha Lida na vha shango ḽa Sharoni vha tshi mu vhona, vha mbo ḓi rembuluwa vha vha vha Muṋe washu.

₃₆Jopa ho vha hu na muṅwe musadzi wa Mukhriste we a vha a tshi pfi Thabitha (zwine zwa amba uri “Tsephe”). Onoyo o vha a tshi dzula nga u tonda vhashai na u vha vhavhalela tshifhinga tshoṱhe. ₃₇Nga tshifhinga tshenetsho a lwala a fa. Tshitumbu tshawe tsha ṱanzwiwa tsha vheiwa kamarani ya tshitizi. ₃₈Zwino vhunga Jopa ho vha hu sa tou vha kulesa na Lida, vhafunziwa vha henefho vha tshi pfa uri Pitrosi u Lida, vha ruma vhanna vhavhili na ipfi ḽi no ri, “Nga vha ṱavhanye vha ḓe ngeno.” ₃₉Pitrosi a mbo ḓi takuwa a ṱuwa navho. A tshi swika vha mu isa henengei kamarani ya tshitizi. Dzitshilikadzi dza mu kuvhanganela dzoṱhe dzi tshi khou lila, vha mu sumbedza dzirokho na dzibadzhi dze Dorokasi a dzi rungela a tshi kha ḓi tshila.

₄₀Pitrosi a vha thathela nnḓa vhoṱhe a gwadama a rabela, a konou rembuluwa a amba na tshitumbu a ri, “Thabitha, vuwani!” Mufu a bonyolola maṱo, musi a tshi vhona Pitrosi a vuwa a dzula. ₄₁Pitrosi a isa tshanḓa a mu takusa. Ndi hone a tshi vhidza vhathu vha Mudzimu, na dzitshilikadzi, a vha ṋea Thabitha a tshi tshila. ₄₂Mafhungo enea a tshi pfala muḓini woṱhe wa Jopa, vhathu vhanzhi vha ṱanganedza Muṋe washu. ₄₃Henefho Jopa Pitrosi a fhedza maḓuvha manzhi a tshi dzula na Simoni musuki wa marevho.