MISHUMO 25

₁Festosi a ri u swika vunduni ḽa Judia a fhedza maḓuvha mararu e Khisaria a konou gonya Jerusalema. ₂Henengei vhotshifhe vhahulwane na vharangaphanḓa vha Majuda vha ḓisa mbilaelo dzavho khae dza u hwelela Paulo. Ndi hone vha tshi kwengweledza Festosi ₃uri a vhidzise Paulo a ḓe Jerusalema. Vha tshi ralo tsho vha tshi tshimbevha tsha uri vha mu lalele vha mu vhulahe nḓilani. ₄Festosi a fhindula a ri, “Paulo u dzhele Khisaria, huno na nṋe ndi khou humela hone hu si kale. ₅Zwino inwi bvisani vharangaphanḓa vhaṋu vha ṱuwe na nṋe uri vha yo mu hwelela henengei arali hu na tshe a tshinya.”

₆Festosi a fhedza maḓuvha a 8 kana a fumi e navho, a konou tsela Khisaria. Nga matshelo a dzula kha tshidzulo tsha khaṱhulo a ri Paulo a ḓiswe. ₇Paulo a tshi swika Majuda vha bvaho Jerusalema vha ima vho tou mu tanga vha thoma u mu hwesa milandu mihulu minzhi-minzhi, hone vhuṱanzi ha uri zwine vha khou amba ndi zwone, vha si vhe naho. ₈Paulo ene a ḓifhindulela a ri, “Nṋe a hu na tshe nda ita tshi lwaho na Mulayo wa Majuda kana na thembele kana na Khisara.” ₉Festosi nga u ṱoḓa u takadza Majuda a vhudzisa Paulo a ri, “Nṋa ni nga takalela u gonya Jerusalema uri ndi yo ni sengisela henengei?” ₁₀Paulo a ri, “Heino khoro ine nda khou sengiswa khayo ndi ya Khisara, hone-ha ho fanelaho uri ndi sengiswe hone. Thovhele na ene u tou zwi ḓivha zwavhuḓi uri arali vhe Majuda a hu na tshe nda vha khakhela ngatsho. ₁₁Arali ndo pfuka mulayo nda ita mulandu wo eḓanwaho nga lufu, a thi khou ri ndi songo vhulawa. Hone arali zwine vha khou nkhwelela ngazwo e mazwifhi, a thi sokou kumedzwa havha vhathu nga u ṱoḓa u tou vha takadza fhedzi. Nṋe ndi ri hoyu mulandu nga u fhiriselwe ha Khisara.” ₁₂Festosi a thoma u dzula na vhaeletshedzi vhawe, a konou fhindula a ri, “No ri ni fhiriselwa ha Khisara, nazwino ni ḓo ya ha ene Khisara.”

₁₃Ho no fhela maḓuvhanyana khosi Agripa na khaladzi awe Berenisi vha ḓa Khisaria u fhululedza vhukoma ha Festosi. ₁₄Vhó no fhedza maḓuvhanyana vhe henefho, Festosi a ṱalutshedza Agripa mafhungo a Paulo a ri, “Fhano ri na muthu wa tshivhotshwa we Felikisi a tshi ṱuwa a mu sia dzhele. ₁₅Zwino musi ndo ya Jerusalema, vhotshifhe vha Majuda na vhahulwane vha mu hwelela kha nṋe vha ita na u nkhumbela uri ndi mu vhone mulandu. ₁₆Nṋe nda vha vhudza uri nga Tshiroma muthu ha kumedzwi vhane vha mu hwelela hu u itela u vha takadza; tsho fanelaho ndi u livhana navho a ṋewa tshifhinga tsha u ḓifhindulela kha zwe a pomokwa. ₁₇Vho ḓo ri u swika fhano nṋe nda sa tsha ṱwa ndi tshi kha ḓi lenga; nga matshelo nda ya nda dzula kha tshidzulo tsha khaṱhulo nda ri a ḓiswe khoroni. ₁₈Vhahweleli vhawe vha tshi takuwa, nṋe nda ri khamusi ndi ḓo pfa vha tshi mu hwelela nga milandu mihulu ye nda vha ndo humbulela yone, hone vhone vha si vhuye vha amba na muthihi wayo. ₁₉Tshilwelwa ndo ḓo wana i khani ye vha vhuya vha ṱaṱa nae nga zwa vhurereli havho na nga muṅwe munna o faho ane vhe ndi Yesu, we Paulo a ri u a tshila. ₂₀Nṋe nga u sa ḓivha uri ndi nga wana hani vhuṱanzi kha haya mafhungo, nda vhudzisa Paulo arali a tshi nga takalela u yo sengiswa hayo mafhungo Jerusalema. ₂₁Paulo ene a ri ndi khwiṋe a tshi ḓi dzula o lindwa zwawe mulandu wawe u hwedzwe ha Khisara, a vhe ene ane a u haṱula. Ndi hone nangoho nṋe ndi tshi ri a dzule o lindwa u swika zwenezwo ndi tshi ḓo mu fhirisela ha Thovhele.” ₂₂Agripa a vhudza Festosi a ri, “Na nṋe hoyu muthu ndi nga takalela u mu pfa nga dzanga nḓevhe.” Festosi a ri, “Vha ḓo mu pfa matshelo.”

₂₃Nga matshelo Agripa na Berenisi vha dzhena holoni ya tsengo nga mutsindo, vho tou ḓiṱama vha fhelela, vhe na vhalangammbi na vhahulwane vha muḓi. Festosi a ri Paulo a ḓiswe, nangoho a iswa. ₂₄Festosi a ri, “Thovhela Agripa na vhoṱhe vho kuvhanganaho fhano! Hoyu munna ane na mu vhona fhano ndi ene we Majuda vhoṱhe vha ḓa ha nṋe vha tshi lila ngae musi ndi Jerusalema, na musi ndi fhano. Vha khou mu hwelela uri ho ngo tsha fanela u tshila. ₂₅Arali e nṋe a tho ngo vhona hu na tshe a ita tsho eḓanwaho nga lufu. Zwino-ha vhunga ene muṋe a tshi ri mafhungo awe a fhirele ha Khisara, nazwino ndo fhedza nga ḽa uri ndi ḓo tou mu fhirisela hone. ₂₆Hone a thi ḓivhi uri ndi tshi ṅwalela Khisara ndi nga ri vhukumakuma a nga vha o tshinyani. Ndi zwone zwe nda mu ḓisa fhano phanḓa haṋu, nga maanḓa phanḓa ha vhone thovhela Agripa, uri khamusi ro no sengulusa mafhungo awe ndi nga wana tshine nda nga ṅwala. ₂₇Ndi uri nṋe ndi vhona vhu vhutsilu u sokou fhirisa tshivhotshwa ndi sa koni u tou ṱalutshedza zwavhuḓi zwine a pfi o tshinya.”