MISHUMO 14

₁Na Ikoniamu zwa ḓi ralo: Paulo na Barnabasi vha dzhena sinagogoni, vha funza lwe vhathu vhanzhi vha Majuda na vhannḓa vha vha vhatendi. ₂Majuda vhe vha sa fune u tenda, vhone vha vho ita zwa vhuluṱa uri vhannḓa vha vhenge Vhakhriste. ₃Vhaapostola vha dzula henefho tshifhinga tshilapfu. Vha amba nga Muṋe washu vha sa ofhi tshithu, huno na Ene a khwaṱhisa vhuṱanzi havho nga u ḓi vha ṋea maanḓa a u ita maḓembe na zwimangadzo. ₄Vhathu vha muḓi wonoyo vho bva zwigwada zwivhili, vhaṅwe vha tshi ima na Majuda vhaṅwe vha ima na vhaapostola.

₅Ndi hone vhannḓa na Majuda, khathihi na vharangaphanḓa vhavho, vha tshi vho langana u tambudza vhaapostola na u vha kanḓa nga matombo. ₆Musi vhaapostola vha tshi zwi pfa, vha shavhela Likhonia miḓini ya Listara na Derebe na mivhunduni yo i tangaho. ₇Henengei vha isa phanḓa u ḓivhadza mafhungo maḓifha.

₈Listara henefho ho vha hu na muṅwe munna we a vha o holefhala milenzhe, u bva tshee a bebiwa a sa athu vhuya a tshimbila. ₉Onoyo a dzula a thetshelesa Paulo a tshi khou funza. Paulo a mu lavhelesa a vhona uri u na lutendo lune a nga fhodzwa. ₁₀Ndi hone a tshi vhidzelela a ri, “Takuwani ni ime nga milenzhe yaṋu ni tou dzi!” Uyo munna a mbo ḓi thamuwa a thoma u tshimbila-tshimbila. ₁₁Mavhuthu a tshi vhona zwe Paulo a ita, vha thoma u zhamba nga Tshilikhonia vha ri, “Midzimu yo tsela kha riṋe nga tshivhumbeo tsha muthu!” ₁₂Barnabasi vha ri ndi Ziasi khosi ya midzimu, Paulo ene vha ri ndi Hermesi muḓinḓa wa midzimu, ngauri ho vha hu tshi amba ene. ₁₃Tshifhe wa Ziasi a ḓisa dzimboho dzo ṱamiwa nga khare dza maluvha a ima khoroni. Ndi uri thembele ya Ziasi yone yo vha i henefho nnḓanyana ha muḓi. Zwino hoyo tshifhe na mavhuthu, vho vha vho no vha na muhumbulo wa u ṋekedza vhaapostola nduvho.

₁₄Barnabasi na Paulo vha tshi tou pfa zwi no ṱoḓa u itwa, vha kherukanya zwiambaro zwavho vha gidimela vhukati ha gogo vha ṱavha mukosi vha ri, ₁₅“Vha hashu, mathina zwo no vha zwifhio? Riṋe ri tou vha vhathu vha ṋama unga inwi! Tshe ra ḓela ndi u ni ḓivhadza mafhungo maḓifha uri ni laṱe hezwi zwithu zwi si na mushumo, ni rembulutshele ha Mudzimu a tshilaho we a sika ḽiṱaḓulu na ḽifhasi na lwanzhe na zwoṱhe zwi re khazwo. ₁₆Kale o litsha tshakha dzoṱhe dzi tshi fara yadzo nḓila. ₁₇Naho zwo ralo o ḓi sumbedza uri u hone nga zwivhuya zwine a ita. Vhonani u ni nisela mvula i tshi bva ṱaḓulu, a ni fha na zwiliṅwa nga tshifhinga tshazwo; u ni fha zwiḽiwa, a takadza mbilu dzaṋu.” ₁₈Naho vhaapostola vho amba vha ralo, ho vha ho tou sala zwiṱukuṱuku gogo ḽo vha ṱhavhela idzo mboho.

₁₉Ha mbo swika Majuda vha bvaho Antiokia na Ikoniamu. Vhenevho vha tswa mbilu dza gogo ḽa vho ima navho, vha kanḓa Paulo nga matombo vha mu kokodzela nnḓa ha muḓi vha tshi ri o fa. ₂₀Hone musi vhafunziwa vha tshi ḓa vha mu tanga, a vuwa a humela muḓini. Nga matshelo a ṱuwa na Barnabasi vha ya Derebe.

₂₁Paulo na Barnabasi vha funza mafhungo maḓifha Derebe, ha rembuluwa vhathu vhanzhi. U bva henefho vha humela Listara, vha konou fhirela Ikoniamu, na Antiokia u re kha ḽa Phisidia. ₂₂Vha khwaṱhisa vhafunziwa na u vha ṱuṱuwedza uri vha ime kha lutendo. Vha ri, “Ri dzhena muvhusoni wa Mudzimu ró fhira nga maṱhuphoni manzhi.” ₂₃Vha tela tshivhidzo tshiṅwe na tshiṅwe vhalisa vhatsho, vha konou vha kumedza Muṋe washu nga thabelo na nga u ḓidzima, vhunga vho vha vho no ḓi mu ṱanganedza.

₂₄Vha buḓekanya shango ḽa Phisidia vha swika Phamfilia. ₂₅Henefho vha amba ipfi ḽa Mudzimu muḓini wa Pherege, vha konou tsela Athalia. ₂₆U bva henefho vha namela tshikepe vha humela Antiokia, fhaḽa he vha kumedzwa kha vhuthu ha Mudzimu uri vha ite mushumo wonoyo une vha kha ḓi bva u u khunyeledza.

₂₇Vha tshi swika Antiokia vha kuvhanganya tshivhidzo tshoṱhe vha vha hanelela zwoṱhe zwe Mudzimu a shuma ngavho, na he a vulela vhannḓa nḓila uri vha mu ṱanganedze. ₂₈Henefho vha fhedza tshifhinga vha tshi dzula na vhafunziwa.