Muya Mukhethwa we Mudzimu a fulufhedzisa vhathu vhawe
1Thifilosi wanga:
Buguni yanga ya u ranga ndo ṅwala nga mishumo yoṱhe ye Yesu a ita na zwoṱhe zwe a funza u bva ḓuvha ḽe a thoma mushumo wawe 2u swika ḓuvha ḽe a takulelwa ṱaḓulu. Hone a sa athu takulelwa ṱaḓulu o vhuya a amba na vhaapostola vhe a vha nanga, a vha laya e na maanḓa a Muya Mukhethwa a tshi vha vhudza zwine vha fanela u ita. 3Musi o no vhulawa, o fhedza maḓuvha a 40 a tshi vha sumbedza nga hunzhi uri ngoho o vuwa vhafuni, u a tshila, a tshi ḓivhonadza khavho a tshi amba navho nga zwa muvhuso wa Mudzimu. 4Ḽiṅwe ḓuvha a tshi khou ḽa navho a vha laya a ri, “Ni songo ṱuwa fhano Jerusalema; lindelani tshe Khotsi anga a ni fulufhedzisa – tshiḽa tshe nda ni vhudza. 5Johanisi ene o vha a tshi lovhedza nga maḓi, hone inwi hu ḓo ri hu songo fhela maḓuvha manzhi na lovhedzwa nga Muya Mukhethwa.”
Yesu a tshi takulelwa ṱaḓulu
6Ḽiṅwe ḓuvha vhaapostola vhó kuvhangana na Yesu vha mu vhudzisa vha ri, “Muṋe washu, nṋa zwino kani ndi hone vha tshi yo vusa muvhuso wa Israele?”
7Yesu a fhindula a ri, “A na maanḓa a u vhea zwifhinga ndi Khotsi anga; uri zwi ḓo itea lini a si zwaṋu, ndi zwawe e eṱhe. 8Inwi ni ḓo ṋewa maanḓa musi Muya Mukhethwa a tshi ḓa kha inwi, uri ni vhe ṱhanzi dzanga fhano Jerusalema na kha ḽoṱhe ḽa Judia na ḽa Samaria u vhuya u swika mugumoni wa ḽifhasi.” 9A kha ḓi ralo a mbo ḓi takulelwa ṱaḓulu vho ḓi lavhelesa, a tsirwa nga gole vha si tsha mu vhona. 10Vha tshee vho lavhelesa, Yesu a tshi khou suvhela a tshi ya, vha vhona vhanna vhavhili vho ambaraho tshena vho ima navho, 11vhenevho vha ri, “Inwi vhanna vha Galelia, khezwi no sokou ima no lilala? Hoyu Yesu ane na mu vhona a tshi ṱuswa kha inwi a takulelwa ṱaḓulu, u ḓo vhuya sa zwenezwi.”
U thihwa ha vhuimo ha Judasi nga muṅwe
12Ndi hone vhaapostola vha tshi ṱuwa Thavhani ya Miolivi i re tsini na Jerusalema, lwendo lune lwa nga ita khilomitha nthihi, vha dzhena muḓini. 13Vha tshi swika vha gonya kamarani ya tshitizi ye vha vha vha tshi khou dzula khayo, e Pitrosi na Johanisi, na Jakopo, na Andrisi, na Filipi, na Thomasi, na Batholomio, na Matiosi, na Jakopo ṅwana wa Alifiosi, na Simoni Muhali-wa-Mudzimu, na Judasi ṅwana wa Jakopo. 14Vhaapostola vhenevho vho vha vha tshi ḓi vha na vhaḽa vhasadzi, khathihi na Maria mme a Yesu na vharathu vhawe, vha tshi khwaṱhela u rabela vhe vha mbilu nthihi.
15Maḓuvha eneo hó kuvhangana vhatendi, ha kuvhangana vhe vha vha vha tshi nga ita 120, Pitrosi a takuwa a ri, 16“Vha hashu, zwo fanela uri maṅwalo aḽa a khunyelele a zwe Muya Mukhethwa a vha o no ḓi dzula o amba nga Dafita – ndi amba zwa Judasi, uḽa we a vha e phangami ya vho faraho Yesu. 17Judasi o vha e muṅwe nga riṋe, ó nangiwa uri ri shume nae.” 18(Iḽa tshelede ye Judasi a i wana nga nḓila yo vhifhaho, o renga tsimu ngayo, a wa henefho a fa, a balea thumbu, vhula hoṱhe ha hushuwa. 19Mafhungo eneo vhathu vhoṱhe vho dzulaho Jerusalema vho a pfa; ndi zwine vha tshi amba iyo tsimu nga lwa havho vha tou ri “Akeldama”, zwine zwa amba uri “Tsimu ya malofha”.)
20“Iṱali ho ṅwalwa kha Dziphisalema ha pfi,
“ ‘Nnḓu yawe nga i sale i dumba,
hu si vhe na a dzulaho khayo!’
“Ha dovha ha ṅwaliwa ha pfi,
“ ‘Mushumo wawe kha u dzhiwe nga muṅwe.’
21-22“Ndi zwine ha ṱoḓea muṅwe ane ra ḓo ṱanzilela roṱhe u vuwa ha Muṋe washu Yesu. U fanela u vha e muṅwe wa avho vhe vha vha vhe na riṋe tshifhinga tshoṱhe ri tshi tshimbila na Yesu Muṋe washu u bva tshee a lovhedzwa nga Johanisi u swika ḓuvha ḽe a ṱuswa ngaḽo kha riṋe a ya ṱaḓulu.”
23Ndi hone hu tshi tiwa madzina a vhanna vhavhili, muṅwe a vha Josefa, we ḽiṅwe ḽa pfi Barasabasi (ḽiṅwe ḽa pfi Justosi), wa vhuvhili a vha Mathiasi. 24Vha mbo rabela vha ri, “Muṋe washu, u ḓivha mbilu dza vhathu vhoṱhe. Asizwi-ha Muṋe washu, ri sumbedze uri kha avha vhavhili ndi ufhio we wa mu nanga 25uri a dzhie mushumo uyu a vhe muapostola vhuimoni ha Judasi, we a u ṱutshela a ya ho mu fanelaho.” 26Vha konou ita madeṅwa a u nanga kha avho vhavhili; ha mvaṱiwa Mathiasi, a mbo ḓi dzheniswa kha tshigwada tsha vhaḽa vhaapostola vha 11.
