2 TIMOTI 3

₁Ḓivhani uri nga maḓuvha a vhufhelo hu ḓo ḓa misi mivhi. ₂Misi iyo vhathu vha ḓo vha na tseḓa, vha funesa lupfumo, vha ṱonga, vha ḓihudza, vha dzula nga u semana, vha nyadza vhabebi, vha sa livhuhi, vha sa luvhi Mudzimu; ₃vha si na vhuthu; vha ḓo dzula vho farana nga mbilu, vha ṱolou iselana phungo, vha vha khundavhalai na vhalevhi, vha lwa na zwivhuya, ₄vha fheṱana, vha si tsha londa, vha huduluwa, vha funa zwa madakalo fhedzi vha si tsha funa Mudzimu, ₅vha sokou luvha Mudzimu khole-khole hone vha sa fulufheli maanḓa azwo. Vho raloho ni songo konana navho. ₆Vhaṅwe vhavho vha sokou vhanyuludza vha dzhena nḓuni dza vhathu, vha zhongondedza zwiḽa zwisadzi zwo ḓilemedzaho nga milandu ya vhutshinyi hazwo zwa sokou langwa nga dzinyemulo dza tshakha-tshakha, ₇zwa dzulela u guda, hone zwa ḓi kundwa u ḓivha ngoho. ₈Havha vhathu vha hanedza ngoho sa Janesi na Jamburesi zwiḽa vha tshi hanedza Mushe. Mihumbulo yavho yo gomala, vha si kone u ṱalukanya zwa lutendo. ₉Hone a vha nga yi kule, vhathu vhoṱhe vha ḓo ṱuwa vha tshi vha vhonolola uri ndi matsilu. A thi ri ndi zwenezwo zwo bvelelaho kha Janesi na Jamburesi?

₁₀Inwi hone ṅwananga, no kanda vhuṱalani hanga, na edza pfunzo yanga na u ḓifara hanga na zwine nda tshilela zwone, na lutendo lwanga na u sa fhela mbilu hanga na lufuno lwanga na u konḓelela hanga, ₁₁na u tovholwa hanga na u tambudzwa hanga. A thi ri ni kha ḓi elelwa zwe zwa nngwela Antiokia na Ikoniamu na Listara, zwauri ndo tovholwa hani? Hone Muṋe washu o nndamukisa khazwo zwoṱhe. ₁₂Nahone vhoṱhe vhane vha funa u tshila vha tshi ofha Mudzimu vhe vhathihi na Khristo Yesu vha ḓo ḓi tovholwa. ₁₃Hone vhathu vhavhi na vhafhuri vha ḓo ḓi ṋaṋa u ralo vha tshi fhura vhaṅwe, na vhone vha tshi fhurwa.

₁₄Inwi hone ni ḓi ima kha zwe na funzwa na zwi tenda ni sa timatimi. Hufha vho ni funzaho ni tshi vha ḓivha. ₁₅Hufha Maṅwalo Makhethwa ni tshi a ḓivha u bva hanani haṋu. Ndi one a konaho u ni ṋea vhuṱali vhu isaho u tshidzwani nga u fulufhela Khristo Yesu. ₁₆Maṅwalo oṱhe ndi mahevhedzwa-nga-Mudzimu, a a farisa kha u funza ngoho, na u sumbedza zwi si ngoho, na u khakhulula zwo khakheaho, na u gudisa muthu kutshilele kwone-kwone, ₁₇uri muthu o ḓikumedzaho Mudzimu a vhonale e na vhukoni, a tshi kona mushumo muṅwe na muṅwe wavhuḓi.