2 TIMOTI 1

₁Ndi nṋe Paulo we nda vha muapostola wa Khristo Yesu nge Mudzimu a zwi funa. Ndo rumiwa u ḓivhadza a vhutshilo he a fulufhedzisa uri ri ḓo vhu wana nga Khristo Yesu.

₂Ndi ṅwalela inwi Timoti ṅwananga ane nda mu funa, ndi ri: Ngavhe Mudzimu Khotsi na Khristo Yesu Muṋe washu vha tshi ni itela vhuthu na tshilidzi na vha na mulalo.

₃Ndi livhuha Mudzimu ane nda mu shumela ndi na luvalo lwo ṱambaho, sa zwe vhomakhulukuku wanga vha ḓi mu shumela; ndi mu livhuha ndi tshi ni elelwa nga misi ndi tshi rabela vhusiku na masiari. ₄Ndi tshi elelwa iḽa miṱodzi yaṋu ya musi ri tshi onesana ndi vho tama u dovha nda tou ni vhona uri ndi rudze mbilu tshoṱhe. ₅Nda dovha nda elelwa na lutendo lwaṋu lu si na muhoyo, lu fanaho na lwa makhulu waṋu Loisa na mme aṋu Yunisi. Ndi a fulufhela uri na inwi ni nalwo. ₆Ndi zwine nda ni humbudza uri mpho iḽa ye Mudzimu a ni ṋea nga vhuthu hawe zwiḽa ndi tshi ni vhea zwanḓa, ni dzule ni tshi i vhudzedza sa mulilo, ₇ngauri Muya we Mudzimu a ri ṋea ha ri iti magoswi, u ri ṋea maanḓa na lufuno na u kona u ḓilanga.

₈Zwino-ha ni songo shona u vha ṱhanzi ya Muṋe washu; na nṋe ndo hoṋelwaho dzhele nge nda vha wawe ndi songo ni shonisa, ni songo ofha u tambudzwa-vho ni tshi tambudzelwa mafhungo maḓifha, vhunga Mudzimu o ri ṋea maanḓa a u zwi konḓelela. ₉Ndi Ene we a ri tshidza a ri vhidza uri ri vhe vhakhethwa. Ho ngo zwi ita nga u vhona mishumo yashu, o tou dzula o zwi dzudzanya nga vhuthu hawe. O ri itela vhuthu nga Khristo Yesu, na shango ḽi sa athu vha hone. ₁₀Huno zwino vhuthu honoho ho no dzumbuluwa nga u ḓa ha Mutshidzi washu Khristo Yesu we a fhedza maanḓa a lufu a dzumbulula vhutshilo vhu sa tshinyali, a vhu dzumbulula nga mafhungo maḓifha.

₁₁Mudzimu o nta uri ndi vhe muḓivhadzi na muapostola na mufunzi wa eneo mafhungo. ₁₂Ndi zwine nda khou tambudzwa nga u rali. Naho zwo ralo a thi shoni, we nda mu fulufhela ndi a mu ḓivha; nahone ndi na ngoho ya uri u na maanḓa a u vhulunga zwe a nkumedza u swika ḓuvha ḽine a ḓo vhuya ngaḽo. ₁₃Maipfi e na pfa nṋe ndi tshi amba ni ite one tsumbo ya pfunzo kwayo, ni tevhedze one nga lutendo na lufuno lwo fanelaho vha re vha Khristo Yesu. ₁₄Zwivhuya zwe na kumedzwa u zwi londola ni zwi vhulunge nga maanḓa a Muya Mukhethwa ane a tshila ngomu hashu.

₁₅Ni a zwi ḓivha uri vhoṱhe vha re vunduni ḽa Asia vho no ntshandukela, na Figilosi na Herimogenesi!

₁₆Hone ngavhe Muṋe washu a tshi itela muṱa wa Onesiforosi vhuthu, ngauri ndi kanzhi hoyu muthu a tshi ḓi nkhwaṱhisa. Ho ngo vhuya a pfa ndi tshi mu shonisa naho ndi dzhele. ₁₇O ri u swika Roma a mbo ḓi thoma u nṱoḓa a vhuya a nngwana. ₁₈Ngavhe Muṋe washu a tshi mu itela vhuthu nga ḓuvha ḽine Ene Muṋe washu Yesu a vhuya ngaḽo. Na zwe a ntonda Efesa ni a zwi ḓivha zwavhuḓivhuḓi.