1 PITROSI 3

₁Inwi vhasadzi, luvhani vhanna vhaṋu. Vhaṅwe vhavho a vha athu tenda ipfi ḽa Mudzimu, hone nangwe ni songo vhuya na amba tshithu vha nga kungiwa nga u vhona kutshilele kwaṋu ku tamisaho ₂kwa u vha hulisa, ku si na zwa vhuaḓa.

₃U ḓiṱama haṋu hu songo vha ha nga nnḓa fhedzi, hu no nga u luka mavhudzi na u ambara nungu na zwiambaro zwa maṱeleṱele, ₄ḓiṱameni mbiluni nga u vuḓa na vhulenda; ndi lwone lunako lwa ngomu mbiluni lu sa ṱahali. Ndi lwone lune na Mudzimu a tshi sedza a vhona lu tshi tamisa. ₅Ndi zwone zwe kale vhasadzi vhakhethwa vho ṱulutshelaho Mudzimu vha ḓiṱama ngazwo vha tshi luvha vhanna vhavho, ₆unga na Sara o thetshelesa munna wawe Abrahamu a ri, “Muṋe wanga”. Na inwi ni ḓo vha vhaḓuhulu vha Sara arali ni tshi dzula ni tshi ita zwivhuya ni sa ofhi tshithu.

₇Na inwi vhanna dzudzanani zwavhuḓi na vhasadzi vhaṋu ni tshi ḓifara sa vha na vhulondo. Sedzani musadzi sa muthu-vho, ngauri u shaya nungo, nahone Mudzimu u ḓo mu fha-vho ifa ḽa vhutshilo unga inwi; na sa dzudzana nae zwavhuḓi zwi vho ḓo kundisa thabelo dzaṋu u swika ha Mudzimu.

₈Ndi zwone, noṱhe dzulani nga u pfana, ni lilelane, ni funane nga tshaṋu, ni vhe na mbilutshilidzi, ni ḓiṱukufhadze. ₉Ni songo lifhedza vhuvhi nga vhuvhi kana samba nga samba, tshaṋu ni tou ri ngavhe zwi tshi nakela maswina aṋu, vhunga mashudu tshi tshone tshe Mudzimu a ni vhidzela tshone. ₁₀Ho ṅwalwa ha pfi,

₁₃Ndi nnyi ane a nga ni pfisa vhuṱungu arali ni tshi dzula nga u fungelela u ita zwivhuya? ₁₄Hone naho ni tshi nga tambudzwa nge na ita zwone, ndi hone ni na mashudu. Ni songo vha ofha, ni songo dinalea. ₁₅Khristo ndi Ene ane na fanela u mu luvha e Muṋe waṋu mbiluni dzaṋu; ni dzule no ḓiimisela u fhindula muṅwe na muṅwe ane a nga ni sengisela zwe na zwi fulufhela; ₁₆hone ni fhindule nga vhulenda na khuliso, ni na mvalo dzo ṱambaho, uri vhaḽa vhane vha nyefula kutshilele kwaṋu kwavhuḓi kwa u sumbedza vhuthihi haṋu na Khristo vha mbo ḓi shona zwenezwo vha tshi ni pomoka. ₁₇Arali Mudzimu a tshi funa ni tshi tambudzwa, ndi khwiṋe u tambudzwa no nakisa, u fhira u tambudzwa no tshinya.

₁₈Khristo na Ene o fela vhutshinyi haṋu kathihi fhedzi zwa vha zwo fhela, Ene muvhuya a fela vha si vhavhuya uri a kone u ni swikisa ha Mudzimu. U vhulawa o vhulawa sa muthu wa ṋama, hone a dovha a vuswa lwa muya. ₁₉O ṱuwa lwa muya a yo ḓivhadza mimuya yo vhoxwaho dzhele uri o kunda. ₂₀Ndi vhaḽa vhe vha ḓi landula ipfi ḽa Mudzimu zwiḽa Nua a tshi fhaṱa tshikepe, Mudzimu a tshi kha ḓi konḓelela vhathu vhaḽa a sa vha fheleli mbilu, ha vhuya ha ḓa muḓalo wa maḓi ha tshidzwa vhathu vha si gathi, vhathu vhaṱanu na vhararu fhedzi, nge vha dzhena tshikepeni. ₂₁Hezwo zwi fanyisedza ndovhedzo, ine inwi na tshidzwa ngayo zwino. Ndovhedzo a si u ṱanzwiwa tshika dza muvhili, hu tou vha u humbela Mudzimu uri ri ṱanzwiwe vhutshinyi, luvalo lwa sala lwo ṱamba. Hezwo zwi a konadzea nge Yesu Khristo a vuwa vhafuni. ₂₂Ene o luvhisa vharuṅwa na vhavhusi na vhahulwane, a gonya ṱaḓulu a yo dzula thungo ya tshanḓa tshauḽa tsha Mudzimu, vha vhusa vhoṱhe.