BOTLHALE 9

₁Oh Modimo wa borraetsho, Morena wa mautlwelo-botlhoko, wena yo O neng wa dira dilo tsotlhe ka lefoko la gago, ₂wena yo O neng wa bopa motho ka Botlhale jwa gago, go busa dibopiwa tsotlhe tse O di dirileng.

₃Le go laola lefatshe ka boitshepo le tshiamo le go atlhola ka moya o o tlhamaletseng, ₄a O ko O mphe Botlhale jo bo ntseng fa setilong sa gago sa bogosi mme O se ka wa ntlosa mo palong ya bana ba gago.

₅Gonne ke motlhanka wa gago, ngwana wa mohula wa gago, motho yo o bokoa, yo o tlaa tshelang nako e khutšwane, yo o sa tlhaloganyeng tshiamo le Melao ya gago go le kalokalo.

₆Tota, fa mongwe mo baneng ba batho a ne a ka itshepa mme a tlhoka Botlhale jo bo tšwang kwa go wena, o ne a tlaa bo a ntse a se sepe.

₇Ke wena yo o ntlhophileng gore ke nne kgosi ya batho ba gago, ke nne moatlhodi wa bomorwao le bomorwadio.

₈O ntaetse go aga Tempele fa godimo ga thaba ya gago e e boitshepo, aletare mo motseng o O tlhomileng boago jwa gago mo go one, setšhwantsho sa motlaagana wa gago o o boitshepo o O neng wa o baakanya go tšwa tshimologong, ₉Botlhale bo na nao, jone jo bo itseng ditiro tsa gago, jone jo bo neng bo le teng fa O dira lefatshe. Bo tlhaloganya se O bonang se go itumedisa, le se se dumalanang le melao ya gago.

₁₀A O ko O bo romele, bo tšwa kwa magodimong a a boitshepo, bo romele bo tšwa kwa setilong sa kgalalelo ya gago, go tla go nthusa le go dira le nna; ₁₁gonne bo itse dilo tsotlhe, bo a di tlhaloganya, Bo tlaa ntshupegetsa tsela ka tlhoko mo ditirong tsa me bo ntshireletse ka kgalalelo ya jone.

₁₂Ke gone dilo tse ke tlaa bong ke di dira di tlaa amogelesegang; ke tlaa busa batho ba gago ka tshiamo, mme ke tšhwanele setilo sa bogosi sa ga rre.

₁₃Ke mang tota-tota motho yo o ka itseng maikaelelo a Modimo? Ke mang yo o ka tlhotlhomisang go rata ga Morena?

₁₄Megopolo ya rona baswi ga e tlhomamisege mme dikakanyo tsa rona di ka nna tsa tlholega.

₁₅Gonne mmele o o šwang o tlobelela moya kwa tlase mme motlaagana o wa mmopa o imela mogopolo o o akanyang thata.

₁₆Go setse go ntse go le bokete mo go rona go akanya gore se se mo lefatsheng ke eng; go itse se se gaufi le rona go a re lapisa. Jaanong ke mang yo o ka fatololang se se kwa magodimong?

₁₇Fa e le maikaelelo a gago one, tota ke mang yo o neng a ka a itse fa O ne O ka bo o sa aba Botlhale jwa gago, O sa romela moya wa gago o o boitshepo, o fologa kwa godimo?

₁₈Jalo he, Botlhale ke jone jo bo neng jwa tlhamalatsa ditsela tsa batho mo lefatsheng, jwa ba ruta gore se se go itumedisang ke eng, jwa ba boloka.