BOTLHALE 6

₁Reetsang he, lona dikgosi, mme lo tlhaloganyeng. Ithuteng, lona babusi ba dintlha tsa lefatshe. Tsayang tlhagiso.

₂Utlwang se, lona ba lo busang dikete tsa batho, lona ba lo ipokang ka go nna le bontsintsi jwa babusiwa.

₃Thata ke neo e lo e neilweng ke Morena. Borena jo bo okameng bo tšwa kwa go Mogodimodimo. Ke ene ka boene a tlaa tlhotlhomisang ditiro tsa lona, a keleke maikaelelo a lona.

₄Fa lo sa busa ka tshiamo kgotsa lwa tshegetsa molao, lona magosana a Mmuso wa gagwe, kgotsa lo sa itšhwara jaaka Modimo a batla gore lo itshware, ₅o tlaa lo wela godimo ka bonako le gone ka mokgwa o o boitshegang, katlholo e e setlhogo e tlaa wela ba maemo a a kwa godimo le ba ba nang le thata.

₆Motho wa maemo a a kwa tlase o ka nna a itšhwarelwa ka boutlwelo-botlhoko, fela batho ba maemo ba tla otlhaiwa ka bokete.

₇Gonne Morena wa botlhe ga a nke a ingotla fa pele ga motlotlegi ope. Ga a boife bogolo bope ka ke ene yo o dirileng ba bannye le ba bagolo, ke ene a ba tlamelang.

₈Fela ba ba busang ba tlaa kelekwa thata.

₉Ee, balaodi ba kgatelelo, ke bua le lona, gore lo ithute gore botlhale ke eng mme lo se ka lwa tlola molao.

₁₀Gonne botlhe ba ba tshegetsang dilo tse di boitshepo ka boitshepo ba tlaa itshepisiwa, mme fa ba di rutilwe ba tlaa bona phemelo mo go tsone.

₁₁Eletsang he, mafoko a me, a tlhologelelweng, mme a tlaa lo ruta.

₁₂Botlhale bo a phatsima, ga bo nke bo nna looto. Botlhe ba ba bo ratang ba bo bona ka motlhofo, mme ba ba bo senkang ba a bo bona.

₁₃Bo itlhaganelela go ikitsise botlhe ba ba bo eletsang.

₁₄Yo o phakelelang go bo senka ga a na bothata bope gonne o tlaa bo fitlhela bo ntse fa dikgorong tsa gagwe.

₁₅Go bo akanya fela e setse e le tlhaloganyo e e tletseng. Fa O ka nna O bo tlhokometse tlhobaelo e tlaa tloga e go tlogela.

₁₆Le jone ka bojone bo tsamaya bo batla botlhe ba ba bo tšhwanetseng, mme ka bopelotšhweu bo a ba ipontsha fa ba ntse ba tsamaya, bo bo bo ba kgatlhantsha mo dikakanyong tsotlhe tsa bone.

₁₇Tshimologo ya botlhale ke keletso ya nnete ya thuto, mme go tsaya matsapa kaga thuto ke go bo rata.

₁₈Go bo rata ke go tshegetsa melao ya jone, mme go utlwa melao ya jone ke go itlhomamisetsa bosaboleng.

₁₉Bosaboleng bo atametsa Modimo, mme ka mokgwa oo botlhale bo isa ₂₀kwa boreneng jo bogolo.

₂₁Jalo he, balaodi ba kgatelelo, fa lo jesiwa monate ke setilo sa bogosi le thobane ya segosi tlotlang Botlhale gore lo tle lo buse ka bosafeleng.

₂₂Ke tlaa lo bolelela gore Botlhale ke eng, le gore bo tlile jang, Ga ke na go lo fitlhela diphiri dipe. Ke tlaa bo tsaya motlhala go tšwa tshimologong ya lobopo, mme ke tlhalose kitso ya jone sentle ke sa fapoge boammaaruri.

₂₃Le gone ga nkitla ke dira lefufa le le ferosang sebete mompati gonne lefufa ga le tšhwane le botlhale le fa e le go le gonnye.

₂₄Poloko ya lefatshe e mo banneng ba ba botlhale. Tlhomamo ya morafe e mo kgosing e e tlhalefileng.

₂₅Jalo he, ithuteng mo mafokong a me, mme lo tla boelwa.