BOTLHALE 4

₁Go botoka gore le fa motho a se na bana fela a bo a na le tshiamo, gonne go sa šweng go dira gore tshiamo e nne e gakologelelwe ruri, mme Modimo le batho ba e tšhwaretse kwa godimo thata.

₂Fa e le teng re a e etsa, fa e se yo re a e tlhologelelwa; mo nakong yotlhe e tsamaya e rwele serwalo sa phenyo, e le mofenyi mo kgaisanong ya go gapa dikgele tse di sa lešwefadiwang.

₃Fela losika lo lo ntsifalang lwa ba ba bosula ga lo kitla lo nna le mosola, mme ga go na ope wa bana ba bone ba dikgora yo o tlaa nnang le medi e e totomelang kwa tengteng kgotsa e e tlaa itsetsepelang.

₄Le fa ba ka ala namane e tona ya dikala, ka ba tlaa bo ba sa itsetsepela sentle ba tlaa tsubutlwa ke phefo, mme matsubutsubu a tlaa ba kumula.

₅Mme e tlaa re dikala di sa le dinana di mukege, maungo a tsone ga a kitla a nna le thuso epe. Ka e tlaa bo e sa ntse e le makgela ga a na go jewa, a tlaa bo a se na mosola.

₆Gonne bana ba dikgora ke basupi ba bosula jwa batsadi ba bone ka nako e Modimo o ba tlhatlhobang ka yone.

₇Le mororo mosiami a ka šwa pele ga nako ya gagwe, o tla bona boitapoloso.

₈Gonne malatsi a mantsi ga se one a dirang gore botsofe bo tlotlege, palo ya dingwaga le yone ga se yone e leng selekanyo se se siameng sa botshelo.

₉Tlhaloganyo ke yone e leng moriri o mošweu mo bathong, mme botshelo jo bo siameng ke jone botsofe jo bo lekanyeng.

₁₀Go ne go na le mongwe yo o neng a itumedisa Modimo, mme wa mo rata; mme ka a ne a tshela le baleofi o ne a namolwa.

₁₁O ne a phamolwa e se re kgotsa bosula jwa mo tlhakanya tlhogo, kgotsa bolotsana jwa tsietsa moya wa gagwe.

₁₂Gonne kokiso ya bosula e dira dilo tse di molemo bofitlha, mme setsuatsuwe sa keletso e e bosula se senya moya o o itshiametseng.

₁₃Ka a ne a siama ka nako e khutshwanyane o ne a diragatsa dingwaga tse di telele.

₁₄Ka gonne moya wa gagwe o ne o itumedisa Morena, Morena o ne a mo inola ka bonako mo bosuleng jo a neng a le mo go jone.

₁₅Le fa go ntse jalo batho ba ne ba bona mme ba se ka ba tlhaloganya, kgotsa ba lemoga gore botlhe ba Modimo o ba itlhophetseng ba tlaa nna le tšhwaro ya one le boutlwelo-botlhoko jwa one, le gore o sireletsa baitshepi ba one.

₁₆Mosiami yo o tlhokafetseng o tlaa bona baikepi ba ba sa ntseng ba tshela molato, mme motho yo moša yo o siameng ka bonako o bona motsofe yo o bosula yo o nang le nako e telele molato.

₁₇Batho ba tlaa bona phelelo ya motho yo o botlhale, ga ba na go tlhaloganya gore Morena o mmeetse eng, le gore ke ka ntlha yang a mmolokile.

₁₈Ba tlaa bona mme ba mo sinalele, fela Modimo o tlaa ba ja ditshego.

₁₉Morago ga mo ba tlaa tšwa ditoto tse di tlontlologileng, dilo fela tse di nyatsegang ka bosafeleng mo gare ga bašwi, gonne Morena o tlaa ba thubaganya ka tlhogo fa fatshe, ba sa tlhole ba bua. O tlaa ba kumula mo methaong ya bone, ba senyakwe mme ba bolawe ke kutlo-botlhoko le gone ga ba na go gakologelwa ke ope.

₂₀Ba tlaa tla ba roroma ba tlela go balololwa ga dibe tsa bone, mme melato ya bone, e tlaa re e eme fa pele ga bone, e ba tšhwaye phoso.