BOTLHALE 17

₁Dikatlholo tsa gago di dikgolo ruri mme di thata go rarabololwa. Ke gone ka moo dipelo tse di sa rutwang di neng tsa timela.

₂E rile batho ba ba bosula ba ithaya ba re ba tlobeletse setšhaba se se boitshepo, bone ya bo e le batšhwarwa ba lefifi le magolegwa a bosigo jo boleele, ba tšwaletšwe ka fa tlase ga ditlhomeso tsa bone, ba leleketšwe kgakala le tebatebelo e e sa khutleng.

₃Ka gore e rile ba ntse ba akanya gore ga ba lemogiwe mo dibeng tsa bone tse di fitlhegileng, ba sirilwe ke digareteng tse di lefifi tsa tebalo, ba phatlaladiwa, ba boifa mo go mašwe, ba tshosiwa thata ke dipono.

₄Golo fa ba neng ba iphitlhile gone go ne go ka se ka ga leleka poifo mo go bone. Medumo e e tshosang e ne e gwasa go ba dikologa, Mme dipono tse di hutsafetseng, tse di tsutsubagantseng difatlhego tsa ba tšhwenya.

₅Go ne go se na molelo ope o o neng o nonofile ka selekanyo go ba bonesetsa le fa e le dikgabo tse di phatsimang tsa dinaledi di ne di sa sedifatse bosigo jo bo boitshegang joo.

₆Go ne go se na sepe se se phunyeletsang ka phatsimo ya sone go fitlhelela kwa go bone fa e se molelo mongwe o o tshabegang o o neng o ikgotsitse. Mme mo letshogong la bone, e rile fela pono eo e sena go nyelela, ba akanya gore se ba neng ba se bonye se ne se boitshega go feta jaaka gale.

₇Maselamosenyana a bone a se ka a thusa le fa e le sepe, malepanyana a ba neng ba ikgantsha ka one a raraakana mo go tlhabisang ditlhong.

₈Gonne bone ba ba neng ba re ba itse go leleka dipoifo le dikhuduego mo meweng e e lwalang, ke bone ba ba neng ba lwadiwa ke poifo e e tshegisang.

₉Le fa go ne go se na sepe se se boitshegang se se ba tshosang, go sasanka ga dibatana le go suma ga dikgagabi go ne go ba tshosa. Ba swa ba ngaraladitšwe ke letshogo. Ba gana le go leba phefo tota, e e ka se kang ya bo ya tilwa, le fa motho a ratile.

₁₀Gonne boikepi ke selo se se leboi, se se iponang molato ka bosupi jwa sone. Mme e a re bo kgoromediwa ke segakolodi gale bo godise mathata go feta selekanyo.

₁₁Tshabo yone tota ga se sepe fa e se go tlogela dithuso tse di tšwang mo tlhaloganyong.

₁₂Mme e a re motho a bona gore go solofela thuso go bokoa, poifo ya gagwe e a oketsega ka a sa itse dilo tse di simololang pogo ya gagwe.

₁₃Mme bone, e rile botlhe ba robetse boroko jo bo tshwanang, fa lefifi leo le ntse le le teng, le tota le neng le se na thata epe, mme le le neng le tšwa kwa botengteng jwa bobipo jo le jone bo neng bo se na thata epe, ₁₄bangwe ba kobakobiwa ke dipono tse di boitshegang jaanong, ba bangwe ba tloga ba gatsediwa ke go idibala ga mewa ya bone; gonne letshogo le le neng le sa solofelwa le ne le ba wetse godimo.

₁₅Mme ka mokgwa oo, mongwe le mongwe, le fa e ka nna mang, yo o neng a wela foo, o ne a kgomarela gone foo, ekete mo kgolegelong e e se nang mepako ya tshipi.

₁₆Le fa e ka ne e le molemi kgotsa modisa, kgotsa mongwe fela yo o itirelang, go tlhoka lesego mo, mo go neng go sa falolwe go ne go mo tlhasela mme go mmogisa, gonne botlhe ba ne ba bofilwe ka keetane e e tshwanang ya lefifi.

₁₇A ke mosumo wa phefo, kgotsa molodi o o monate wa dinonyane mo dikaleng tse di ikadileng, kgotsa go phothosela ga metsi a a elelang ka sekgatlha, kgotsa go phatlakana ga mafika a digelwa kwa tlase, ₁₈kgotsa go potokela ga diphologolo tse di sa bonweng, kgotsa modumo mongwe o o belediwang kwa morago o tšwa mo dikgageng tsa dithaba, tsotlhe tse di ne di ba gatsetsa ka poifo.

₁₉Lefatshe lotlhe la bo le phatsima ka lesedi le le galalelang, mme le dira tiro ya lone le sa kgorelediwe mo go yone ke sepe.

₂₀Ke bone fela ba ba neng ba khurumeditšwe ke lefifi le lentshontsho, e leng setšhwantsho sa lefifi le le neng le tlaa ba amogela. Fela bokete jo ba neng ba ikimela ka jone bo ne bo le bogolo go feta lefifi le.