BOTLHALE 15

₁Fela, wena Modimo, O bonolo, O a ikanyega, O pelotelele mme O busa dilo tsotlhe ka boutlwelo-botlhoko.

₂Fa re leofa, re ntse re le ba gago, ka re dumela thata ya gago, mme ka re itse O re tsaya re le ba gago ga re rate go leofa.

₃Go dumela mo go wena ruri ke tshiamo e e feteletseng. Go itse thata ya gago ke tshimologo ya bosašweng.

₄Ga go botšwerere jwa motho jo bo kileng jwa re timetsa, kgotsa tiro epe e e se nang maungo ya motšhwantshi, le fa e le setšhwantsho sepe se se memeilweng ka mebala-bala, ₅se e a reng dieleele di se bona di be di kgatlhega thata, di tlotla selo se se sa tsheleng sa setšhwantsho sengwe se se sa hemeng.

₆Ba ba dirang dilo tse, ba ba di ikantseng le ba ba di obamelang ke batho ba ba ratang tshenyego le ba ba e tshwanelang ka ba ikantse dilo tse di bosula tse.

₇Fa mmopi wa dijana a duba mmu o o boleta ka matsapa, a bopa dijana tsa mehutahuta tse re ka di dirisang, o bopa ka mmopa one o, dilo tse di ka dirisiwang mo ditirong tse dintle le dilo tse di ka dirisiwang mo ditirong tse di farologanyeng, a dira tsotlhe ka mokgwa o o tšhwanang. Fela ke ene mmopi wa dijana, yo o tlaa atlholang gore ke sejana sefe se se tlaa dirisiwang mo tirong e, kgotsa mo tirong ele ya ditiro tse pedi tse.

₈Ka matsapa a o a sentseng fela a dira modimo o o seng wa sepe, ene motho yo le ene e seng bogologolo a dirilwe ka one mmu o e tlaa reng morago ga sebakanyana fela a bo a boela mo go one o a ntshitšweng mo go one, ka nako e a tlaa bidiwang ka yone go ya go bolela ka ga botshelo jwa gagwe.

₉Fela ene ga a kgathalele gore o beetšwe go šwa, kgotsa gore botshelo jwa gagwe bo bokhutšhwane; o mpa a gaisana le mmetli wa gouta le mmetli wa selefera, a bo a etsa bathudi ba kgotlho, a ikgantsha ka dikamedimo tse a di dirang.

₁₀Pelo ya gagwe e tšhwana le molora fela, tsholofelo ya gagwe e tlhoegile go feta lešwe, botshelo jwa gagwe bo nyatsega go feta mmopa, ₁₁gonne o paletswe ke go itse One o o mmopileng, o o neng wa femela moya wa tiro mo go ene, wa budulela moya wa botshelo mo go ene.

₁₂Go feta moo, o bona botshelo jo jwa rona e le motshameko mongwe fela, nako ya rona yone mono e le moletlo mongwe wa papadi, o o tletseng dikananyo, gonne a re, “Motho o tšhwanetse go loga maano a go tshela le fa a ka nna mašwe jang”.

₁₃Motho yo o itse go feta ba bangwe gore o a leofa fa a dira dijana tse di thubegang le medimo ya disetwa ka dilo tsa lefatshe.

₁₄Fela ba dieleele go feta botlhe le ba ba tlhomolang pelo go feta le moya wa losea tota, ke baba botlhe ba ba kileng ba gatelela batho ba gago.

₁₅Gonne ba ne ba ithaya ba re, disetwa tsa baheitane ke medimo, le mororo di ka se ka tsa dirisa matlho a tsone go bona, kgotsa dinko tsa tsone go hema moya, kgotsa ditsebe go utlwa, le fa e le menwana mo diatleng tsa tsone go tšhwara, dinao tsa tsone go tsamaya.

₁₆Ka di dirilwe ke motho, ene yo moya wa gagwe o adimilweng, o di bopile. Jaanong ga go na ope yo o ka bopang modimo o o tšhwanang nae.

₁₇Ka a šwa, diatla tsa gagwe tse di bosula di ka dira selo se se suleng fela. Ene o botoka go na le dilo tse a di obamelang, ka gore ene o a tshela, fela tsone ga di tshele.

₁₈Batho ba, ba obamela le diphologolo tse di tlhoegileng go feta diphologolo tse dingwe, tse di bosilo go feta tse dingwe.

₁₉Mme fa e le bontle diphologolo tseo ga di bonale di le dintle go le kalo mo e leng gore motho o ka nna a di kgatlhegela. Le Modimo ga o a di boka kgotsa wa di tshegofatsa.