BOTLHALE 14

₁Kgotsa yo mongwe gape o gopotse go tsaya loeto ka sekepe go kgabaganya lewatle le le bogale, a bo a rapela logong lo lo bokoa go gaisa sekepe se se mo rweleng.

₂Ga go na pelaelo gore sekepe se thailwe ka ntlha ya keletso ya go dira matsadiso mo papading, mme ya nna botlhale jo bo se agileng.

₃Fela ke tebatebelo ya gago, wena Rara, e e se kgweetsang mo tseleng ya sone, gonne O se betletse tsela mo lewatleng, tsela-tšhweu go ralala makhubu.

₄O bontsha gore O ka boloka, le fa go ka diragala eng, mo e leng gore le fa motho a se na botšwerere bope o ka nna a kgabaganya mawatle.

₅O rata thata gore ditiro tsa botlhale jwa gago di se ka tsa tlhoka bomolemo bongwe. Ke gone ka moo batho ba bayang botshelo jwa bone mo logonyaneng, ba kgabaganya namane e tona ya mawatle ka mokorwana, ba bo ba goroga kwa seemeleng-dikepe, ba bolokesegile.

₆Mme kana le mo tshimologong, e rile bomokaloba ba ba diganka ba nyelela, lefatshe la solofela botshabelo mo godimo ga mokorwana, mme mo tsamaisong ya seatla sa gago, peo ya lotso lo loša ya bolokelwa ruri.

₇Gonne go sego logong lo tshiamo e tlang ka lone.

₈Fela go hutsegile sesetwa se se dirilweng ka diatla tsa motho, moseti wa sone le ene o hutsegile; ene o hutsegile ka ntlha ya go se dira, le selonyana se e seng sa sepe se, ka gore se biditšwe “Modimo”.

₉Gonne Modimo o tlhoile moikepi le boikepi jwa gagwe.

₁₀Go tlaa otlhaiwa tiro le modiri wa yone.

₁₁Jalo he, disetwa tsa baheitane di tlaa atlholwa, ka gore, le mororo e le dingwe tsa dilo tse Modimo o di bopileng, fela di dule bomašwe, dirai tsa mewa ya batho, dikgatampi tsa dinao tsa difafalele.

₁₂E rile disetwa di dirwa sa ntlha ga simologa kobamelo-disetwa, mme kitso ya tsone ya tsala tshenyego ya botshelo, ₁₃gonne mo tshimologong di ne di se yo, mme ga di kitla di nnela ruri.

₁₄Di tsisitšwe ke botlaela jwa batho mo lefatsheng. Ke gone ka moo go rulagantšweng gore di fele ka bonako.

₁₅Rre mongwe yo o wetšweng ke kutlobotlhoko e a neng a sa e lebelela o dira setšhwantsho sa ngwana wa gagwe yo o namotsweng ka tshoganyetso jalo. Jaanong o tlotla, jaaka e kete o tlotla Modimo, se maabane e neng e le motho yo o suleng, a tlogelela lotso lwa gagwe ditirelo le dithuto tsa sephiri.

₁₆Mme fa nako e ntse e ya, mokgwa o wa boikepi o nna o gola, o bo o tla o tshegediwa jaaka molao, ₁₇e be e re, ka taelo ya magosana, setšhwantsho se se betlilweng se se obamelwa. E ne e tle e re fa batho ba palelwa ke go tlotla dikgosi di le teng, ka gore di ne di nna kgakala, ba bo ba ikakanyetsa dipopego tsa bone, ba itirela setšhwantsho se se bonalang sa kgosi nngwe e ba e tlotlang, gore ka tlhwaafalo ya bone ba tle ba kgatlhe yo o se yong jaaka e kete o teng.

₁₈Mme maatlametlo a mmetli a fuduwe le maikutlo a batho ba ba sa mo itseng tota gore ba bo ba anamise tumedi mo go ene; ₁₉Gonne ene mmetli, e rile a batla go itumedisa mmusi wa gagwe a pateletsa botšwerere jwa gagwe go dira setšhwantsho sentlentle gore bontle jwa sone bo bo bo fete jwa motho yo o tšhwantshitsweng ka sone.

₂₀Mme ya re batho ba bantsi ba kgatlhilwe ke bontle jwa tiro e ya gagwe ba mo tlotla ka tlotlo ya semodimo, ene yo malobanyana jaana ba neng ba ntse ba mo tlotla jaaka motho fela.

₂₁Mme se e ne ya nna lemena la botshelo jwa batho, gonne batho ba ba neng ba le mo kgolegong ya go tlhoka lesego kgotsa ya thata ya magosi, ba ne ba bitsa dikgong le maje ka leina je le sa abelanweng la “Modimo”.

₂₂Moragonyana go ne ga se ka ga lekana gore ba bo ba le phoso ka ga kitso ya Modimo, mme e ne ya re ba tshelela mo matšhwenyegong a mantsi ka ntlha ya go tlhoka kitso ga bone, ba bo ba bitsa bosula jo bontsi jo “kagiso”.

₂₃Ka ntlha ya ditirelo tsa bone tsa go bolaya bana, masaitsiweng a bone a a fitlhegileng le ditlhapedi tsa bone tsa boipelo tse di dirwang ka ditirelo di sele, ₂₄ba ne ba sa tlhole ba na le bophepa bope mo botshelong jwa bone kgotsa mo dinyalong tsa bone. Motho a bolaya yo mongwe ka bosetlhogo kgotsa a mo utlwisa botlhoko ka boaka.

₂₅Gongwe le gongwe go ne go le madubadube a madi le polao, bogodu le tsietso, tshenyego le bosetlhogo, mekubukubu, kako morago ga go ikana, ₂₆letšhwenyo la batho ba ba siameng, tebalo ya botsalano, go lešwefadiwa ga mewa, dibe kgatlhanong le tlholego, go dubega ga manyalo, boaka, itshekologo.

₂₇Gonne kobamelo ya disetwa tsa mainanyana a a sa tšhwanelang go bidiwa ke tshimologo, sesimolodi le bokhutlo jwa bosula bongwe le bongwe.

₂₈Baobamedi ba tsone ba tlhaba megolokwane ya boipelo, kgotsa ba tshela botshelo jwa boikepi jo bogolo, kgotsa ba aka morago ga ba sena go ikana kwa ntle ga go tikatika.

₂₉Ka ba ikantse disetwa tse di sa tsheleng ga ba akanye gore maikano a bone a maaka a ka nna a ba utlwisa botlhoko.

₃₀Fela katlholo ya tshiamo e tla ba wela godimo ka ntlha ya mabaka a mabedi a:

₃₁Ka gore ga se thata ya dilo tse batho ba ikanang ka tsone, e e tlholang e setse tlolo ya moikepi morago, ke kotlhao ya baleofi.