Raguele
1E rile ba tsena mo Ekebatana Tobiase a re, “Azariase morwarre, a ko O nkise ka bonakonako kwa go Raguele morwarraarona.” Ke fa a mmontsha tsela e e yang kwa tlung ya ga Raguele, yo ba neng ba mo fitlhela a ntse fa thoko ga kgoro ya lolwapa lwa gagwe. Ba mo dumedisa pele mme ene a fetola a re, “Pula, dumelang bakaulengwe.” 2A bo a ba tsenya mo tlung ya gagwe. A raya Edena mosadi wa gagwe a re, “Hee! kana lekawana le le tshwana jang le Tobite morwarre!”
3Edena a ba botsa gore ba tšwa kae; ba re, “Re bana ba ga Nafetali ba ba leleketšweng kwa Ninife.”
4“A lo itse Tobite morwarraarona?” – “Ee!” – “O tsogile jang?”
5“O sa ntse a tshela ebile O tsogile sentle.” Tobiase a bo a tlaleletsa a re, “Ke rre.” 6Raguele a nanoga ka bonako a mo atla a lela. 7Ke fa e re a simolola go bua a re, “A ditshegofatso di wele fa godimo ga gago, ngwanaka! O ngwana wa ga rre yo o tlotlegang. Oh, kana go utlwisa botlhoko jang gore motho yo o siameng jaana le yo o tletseng ditiro tse di molemo jaana a iphoufalele fela jaana!” A wela mo molaleng wa ga Tobiase wa losika lwa gagwe a lela. 8Edena mosadi wa gagwe le ene a mo lelela, Sara morwadie le ene a lela.
9Raguele a ntsha nku mo letsomaneng a e tlhaba, mme ba ba amogela ka pelo e tšhweu.
Ba tlhapa ba bo ba tlhapa mmele mme ba nna fa fatshe ba ja. Ke fa Tobiase a raya Rafaele a re, “Azariase morwarre, a O tlaa kopa Raguele go nnaya kgaitsadiake Sara?” 10Raguele a utlwa mafoko a, mme a raya lekawana a re, “Jaa, O nwe, O itumelele maitiso thata; ga go na ope osele yo o nang le tšhwanelo ya go tsaya Sara morwadiake, ga go na le fa e le ope fa e se wena fela, morwarre. E bile tota, nna ka bonna, ga ke na tetla ya go mo neela ope osele, gonne ke wena O atamalanyeng nae ka losika go feta ba bangwe. Fela, ngwanaka, ke tšhwanetse gore ke se ka ka go fitlhela sepe. 11Ke lekile go mmatlela monna ga supa mo go ba losika lwa rona, mme botlhe fela ba šwa maitsiboeng a ntlha fa ba re ba tsena mo ntlwaneng ya gagwe. Fela jaanong jaana, ngwanaka, jaa O nwe; Morena o tlaa go naya tšhwaro le kagiso.” Tobiase a buela godimo a re, “Ga ke na go ba ke ja ke bo ke nwa go fitlhelela O fetsa kaga me.” Raguele a araba a re, “Go siame. O mo neetšwe, jaaka go laotšwe mo Lokwalong lwa ga Moše, legodimo le lone le laela gore e nne wa gago. Jalo he, ke go neela kgaitsadio. Go simologa gompieno O kgaitsadie le ene ke kgaitsadio. O go neetšwe go simologa gompieno go ya bosafeleng. A Morena a go tlamele bosigong jone, ngwanaka, a go neye tšhwaro le kagiso.”
12Raguele a bitsa morwadie Sara, a mo tsaya ka letsogo, a mo neela Tobiase ka mafoko a, “Ke mmaya mo mabogong a gago; molao le dithulaganyo tse di beilweng mo Lokwalong lwa ga Moše di mo go neela e le mosadi wa gago. Mo tseye; mo tseele gae kwa tlung ya ga rrago ka moya o o tlhatšwegileng. Modimo wa legodimo o lo neye loeto lo lo siameng lo lo tletseng kagiso.”
13Ke fa a retologela kwa go mmaagwe a mo kopa gore a ye go mo tseela pampiri e e kwalelang. A kwala tumalano ya nyalo, gore o neetse Tobiase morwadie jang gore e nne mosadi wa gagwe go latela taolo e e mo Lokwalong lwa ga Moše. 14Morago ga mo ba simolola go ja le go nwa.
15Raguele a bitsa mosadi wa gagwe Edena a re, “Kgaitsadiaka, baakanya ntlwana ya bobedi O mo ise teng.”
16A ya go baakanya bolao mo ntlwaneng e jaaka a ne a mo laetse, a isa morwadie kwa go yone. A mo lelela, a bo a mo phimola dikeledi a re, “O nne pelokgale, morwadiaka! A Morena wa legodimo a fetole kutlo-botlhoko ya gago boitumelo! O nne pelokgale, morwadiaka!” A bo a tšwela kwa ntle.
