Mopati wa ga Tobiase
1Ke fa Tobiase a araba Tobite rraagwe a re, “Rra, ke tlaa dira sengwe le sengwe se O se mpoleletseng. 2Fela ke tlaa tsaya madi jang mo go ene? Ga a nkitse, le nna ga ke mo itse. Ke ka mo neela sesupo sefe gore a tle a ntumele a bo a nneele selefera? Le gone ga ke itse gore nka tsaya ditsela dife go ya kwa Media.”
3Ke fa Tobite a araba Tobiase morwawe a re, “Mongwe le mongwe wa rona o ne a kwala leina la gagwe mo lokwalonyaneng lo ke neng ka lo kgaoganya ka bogare, gore mongwe le mongwe a ipolokele mhama o mongwe wa lone. Ke ne ka tsaya mhama o mongwe, mme o mongwe ka o tsenya mo selefereng. A ko O akanye fela gore ke dingwaga di le masome a mabedi ke tlogetse selefera e, mo go ene: Mme jaanong, ngwanaka, tsaya monna mongwe yo o ikanyegang O tsamaye nae – re tlaa mo duelela nako ya gagwe go fitlhelela O boa – jaanong tsamaya O ye go tsaya madi mo go Gabaele.”
4Tobiase a tšwele kwa ntle go ya go batla monna mongwe yo o itseng tsela e e yang kwa Media gore a tsamaye nae go ya teng. E rile ka fa ntle a fitlhela moengele Rafaele a eme a mo lebile (le mororo a ne a sa akanye gore ke moengele wa Modimo.) 5A bo a re, “O tšwa kae, tsala ya me?”
Moengele a bo a araba a re, “Ke mongwe wa Baiseraele ka wena: ke tsile mono go tla go batla tiro.” Tobiase a botsa a re, “A O itse tsela e e yang kwa Media?”
6Yo mongwe yoo, a araba a re, “Ke e itse tota. Ke ile teng gantsintsi fela, ke itse ditsela tsotlhe ka tlhogo. Gantsi ke ntse ke ya Media mme ke nna le Gabaele, yo e leng mongwe wa ba losika lwa rona yo o nnang kwa Rhagese mo Media. Gale go tsaya motho malatsi a mabedi a a tletseng go tšwa kwa Ekebatana go ya Rhagese; Rhagese o mo dithabeng, Ekebatana ene a le mo gare ga lebala.”
7Tobiase a bo a re, “A ko O nkemele fa, tsala ya me, ke sa ntse ke ya go bolelela rre; ke tlhoka gore O tsamaye le nna; ke tlaa go duelela nako ya gago.”
8Yo mongwe yoo, a araba a re, “Go siame, ke tlaa leta, fela O se ka wa diega.”
9Tobiase a bo a tsena mo teng a ya go bolelela rraagwe gore o bonye mongwe wa Baiseraele ka bone. Mme rraagwe a re, “Mo reye a tsene; ke batla go itse bagolo ba gagwe le morafe wa ga gabo. Ke tšhwanetse go bona gore a e tlaa nna mopati yo o ikanyegang wa gago, ngwanaka.” Ke fa Tobiase a tšwela kwa ntle go ya go mmitsa. A re, “Tsala ya me, rre o a go batla.”
10Moengele a tsena mo tlung; Tobite a mo dumedisa, mme ene a dumela, a mo eleletsa boitumelo. Tobite a fetola a re, “A ruri nka tlhola ke itumela gape? Ke sefofu; ga ke tlhole ke bona lesedi la legodimo; ke totomeditswe mo lefifing jaaka baswi ba ba sa tlholeng ba bona lesedi. Ke motho yo o fitlhilweng a ntse a tshela; ke utlwa batho ba bua, fela ga nkake ka ba bona.” Moengele a bo a re, “Gomotsega; go ise go bo go ye kae Modimo o tlaa go fodisa. Gomotsega.” Ke fa Tobite a re, “Tobiase morwaake o eletsa go ya Media. A O ne O ka seka wa tsamaya nae go mmontsha tsela? Ke tlaa go duela, mokaulengwe.” A bo a re, “Ke rata go tsamaya nae; ke itse ditsela tsotlhe; ke gantsi ke ntse ke ya Media, ke kgabagantse dipoa le dithaba tsa teng, mme ke itse ditsela tsotlhe.”
11Tobite a bo a re, “Mokaulengwe, bagolo ba gago ke bomang le morafe wa ga eno ke ofe? A ko O mpolelele, mokaulengwe.”
12Moengele a re, “O dirang ka morafe wa me?” Tobite a bo a re, “Ke batla go tlhomamisa gore O ngwana wa ga mang le gore leina la gago ke mang?”
13Moengele a re, “Ke Azariase, morwa Ananiase yo o tlotlegang thata, mongwe wa ba losika lwa gago.”
14“Ke go amogela ka pelo e tšhweu le ka mabogo a mabedi mme ke a go dumedisa, mokaulengwe. O se ka wa utlwisiwa botlhoko ke fa ke botsa gore leina la bagolo ba gago ke mang; ke bona gore O losika le nna, wa lotso lo lo siameng le lo lo tlotlegang. Ke itse Ananiase le Jathane, boobabedi barwa Shemaia yo o tlotlegang thata. Ba ne ba tle ba ye le nna Jerusalema kwa re neng re obamela teng, mme ga ba ise ba ke ba theoge mo tseleng ya tshiamo. Bomorwarrago ke banna tota; O wa lotso lo lo siameng, ke go amogela ka pelo e tšhweu le ka maboga a mabedi.”
15A tšwelela-pele a re, “Ke go thapa ka tuelo ya drakema ka letsatsi, ka ditshenyegelo tsa gago, jaaka morwaake. O tseye loeto lotlhe le morwaake, 16mme ke tla go duela go feta jaaka re dumalanye.” Moengele a fetola a re, “Ke tlaa tsaya loeto lotlhe nae. O se ka wa boifa sepe. Fa re ya kwa tsotlhe di tlaa siama; le fa re boa tsotlhe di tlaa siama; tsela e itshiametse fela.”
17Tobite a bo a re, “A ditshegofatso di wele fa godimo ga gago, morwarre!” Ke fa jaanong a retologela kwa go morwawe, a re, “Ngwanaka, baakanya se O tlaa se tlhokang mo loetong lo, O tsamaye le morwarrago. A Modimo o o kwa legodimong o lo sireletse gongwe le gongwe o bo o lo mpusetse loobabedi lo bolokesegile, lo itekanetse! A moengele wa one a lo pate, a lo sireletse, ngwanaka!” Tobiase a tšwa mo tlung go tsena mo loetong, a atla rraagwe le mmaagwe. Tobite a bo a re, “Lo tsamayeng sentle!”
18Mmaagwe a itshela ka dikeledi, a raya Tobite a re, “Tota O romelang ngwanake kgakala jaana? A ga se ene tsamma ya diatla tsa rona, re mo roma kwa le kwa?
19“Kana madi ga se sone selo se le nosinosi se se tlhokafalang! Kana ga a kana ka ngwana wa rona ka tlhwatlhwa!
20“Tsela ya botshelo e Modimo o neng o setse o e re abetse e ne e siame tota.”
21A bo a mo raya a re, “O se ka wa akanya megopolo e e ntseng jalo. Go tsamaya le go boa, tsotlhe di tlaa bo di siame ka ngwana wa rona. Letsatsi la go goroga ga gagwe mono gae O tlaa bona le wena ka mo tsotlhe di ntseng di mo siametse ka teng. O se ka wa akanya megopolo e e ntseng jalo; O se ka wa bo wa tshwenyega mo moyeng ka ntlha ya bone, kgaitsadiaka.
22“Moengele yo o molemo o tlaa mo pata; o tlaa tsaya loeto lo lo siameng, a bo a boele kwa go rona a itekanetse, a itumetse.”
