1Ke fa e re ke utlwile botlhoko jalo, ke sisa pelo ke lela, ke ba ke simolola thapelo e ya khutsafalo:
2“Oh Morena, O siame,
le ditiro tsotlhe tsa gago di siame.
Ditsela tsotlhe tsa gago ke tšhwaro le boammaaruri,
e bile ke wena Moatlhodi wa lefatshe.
3Ke gone, Oh Morena,
O ko O nkgakologelwe, O ntebe.
O se ka wa nkotlhaela dibe tsa me, kgotsa melato e ke e dirang ka tlhokomologo,
kgotsa wa nkotlhaela melato ya borraetshomogolo.
4Gonne re go leofetse, mme ra tlola melao ya gago
mme O letlile gore re welwe godimo, re tšhwarwe re bo re bolawe,
re sebiwe, re tshegiwe re be re nyadiwe
ke ditšhaba tse O re phatlaladitseng le tsone.
5Ditaolo tsa gago tsotlhe di boammaaruri;
fa O dira ka nna ka mo melato ya me e tshwanelang ka teng, le yone ya borraetshomogolo,
gonne ga re a tshegetsa melao ya gago
kgotsa ra tsamaya mo boammaaruring fa pele ga gago;
6a jaanong O dire ka nna ka mo O ratang ka teng;
A O ko O tseye botshelo jwa me mo go nna;
Ke eletsa e kete ke ka tlosiwa mo lefatsheng
ka nna mmu gape.
Gonne loso lo botoka mo go nna go na le botshelo.
Ke kgobilwe kwa ntle ga lobaka
mme ke utlwile botlhoko go feta selekanyo.
Morena, ke letile katlholo e O tlaa e dirang
go nkgolola mo khutsafalong e.
A ko O mme ke ye legaeng la me la bosafeleng;
O se tlhoke go ntšheba, oh Morena.
Gonne go botoka go šwa go na le go nna ke tshela
mo gare ga matšhwenyego a a sa itseng bopelotlhomogi;
ke lapisitšwe ke go tlhola ke utlwa ke kgalwa.”
Sara
7Go ne ga diragala gore ka lone letsatsi leo Sara, morwadia Raguele, yo o neng a nna mo Media kwa Ekebatana, le ene a rogiwe ke mongwe wa bahula ba ga rraagwe. 8O itse gore o ne a kile a nyalwa ga supa, mme Asemodeuse, modemone yole, yo o fetang bademone ba bangwe ka bosula, a kile a nna a bolaya banna ba gagwe a ba tlhomaganya le pele ga ba robala nae tota jaaka monna le mosadi. Mohula yo o ne a re, “Ee, ke wena O bolayang banna ba gago. Ba setse ba tšhwara bosupa ba O neng O ba neilwe, mme ga O ise O ko O nne sego. 9Ga se gore fela gonne banna ba gago ba sule, O tšhwanetse go re otlhaya. Tsamaya O ye kwa go bone, mme a re se ka ra bo ra bona ngwana ope wa gago.”
10Letsatsi leo, a utlwa botlhoko thata, a sisa pelo, mme a ya kwa ntlwaneng ya ga rraagwe a ikaeletse go ya go ipega a ipolaya. Fela a akanya a re, “Ha boo ba ka tloga ba re ke rre! Ba tlaa re, ‘O ne O na le ngwana wa mosetsana a le esi yo O neng O mo rata, mme jaanong ke yoo o ipegile a ipolaya ka ntlha ya kutlobotlhoko.’ Ga nkake ka utlwisa rre botlhoko mo e tlaa reng a tshofetse jaana a bo a šwe. Go ka nna botoka fa nka se ka ka ipega ka ipolaya, ka mpa ka kopa Morena gore a mme ke šwe ke se ka ka tshelela go tlhola ke utlwile dithogano.”
11Ke fa e re a le fa fensetereng a otlolola mabogo a rapela thapelo e:
“O a bakega, oh Modimo wa boutlwelo-botlhoko:
A leina la gago le bakwe ka bosafeleng,
mme a dilo tsotlhe tse O di bopileng di go bake ka bosafeleng.
12Mme jaanong, ke a lelala ke šebile wena.
13A lefoko la gago le ntlose mo lefatsheng;
Ke palelwa ke go tlhola ke utlwa ke kgobiwa.
14Oh Morena, O a itse fa ke ntse ke itshekile;
ga go na monna ope yo o kileng a nkgotlela;
15Ga ke ise ke ke ke tlontlolole leina la gago lefa e le la ga rre
mo lefatsheng le la telekelo.
Ke nna fela ke le nosi ngwana wa mosetsana wa ga rre,
ga a na ngwana ope yo mongwe go nna moja-bošwa;
ga a na morwarraagwe ope fa thoko,
lefa e le ope wa losika lwa gagwe yo ke tšhwanetseng go mo ipolokela.
Ke setse ke latlhegetšwe ke banna ba supa;
ke sa ntse ke tšhwanetse go tshelelang?
Fa O sa rate go tsaya botshelo jwa me
a mme he, O ntlhomogele pelo;
Ke palelwa ke go tlhola ke utlwa ke kgobiwa.”
16Jaanong thapelo ya mongwe le mongwe wa bone e ne ya itumedisa Modimo o o tlotlegang. 17Mme Rafaele a romelwa go tla go ba fodisa boobabedi. O ne a tšhwanetse go tlosa dibala tse ditšhweu mo matlhong a ga Tobite, gore a tle a bone lesedi la Modimo ka matlho a gagwe. O ne a bile a tšhwanetse go naya Sara, morwadia Raguele, Tobiase morwa Tobite, gore e nne monna wa gagwe, le go tlosa Asemodeuse mo go ene, modemone yole, yo o bosula go feta ba bangwe. Gonne tota-tota e ne e le Tobiase yo o neng a tšhwanetse go mo nyala, e seng bakopi ba bangwe botlhe. Tobite o ne a boa a tšwa ka kwa segotlong ka nako e Sara, morwadia Raguele, le ene a neng a fologa a tšwa kwa ntlwaneng e e kwa godimo.
