TOBITE 10

₁Fa tse di ntse di diragala, malatsi otlhe, Tobite ene o ne a ntse a bala malatsi a motho a ka a tsayang go ya le go boa. Palo e e tletseng ya malatsi ya feta, morwawe a ntse a ise a bo a tle.

₂Ke fa a akanya a re, “Ke solofela gore ga aa ka a diiwa kwa! Gabaele a bo a sa tlhokafala tlhe! Gongwe go ne go se na ope teng go mo neela madi.” ₃Mme a simolola go huduega maikutlo.

₄Anna mosadi wa gagwe a nnela go re, “Morwaake o tlhokafetse! Ga a tlhole a le mo gare ga batshedi!” Mme a simolola go lelela le go hutsafalela morwawe. A nna a re, ₅“Kana ruri! Ke ne ka go dumelela go ntlogela, ngwanaka, wena, lesedi la matlho a me.”

₆Mme Tobite a fetole a re, “A ko O ne O didimala, kgaitsadiaka! Se nne le dikakanyo tse di ntseng jalo. Tsotlhe di itshiametse fela ka ene. Sengwe se teng se se ba diileng. Motho yo o tsamaileng nae ke mongwe yo re ka mo ikanyang, mongwe wa losika lwa rona, le gone. O se ka wa kgobega marapo, kgaitsadiaka. O tlaa tloga a tla.”

₇Mme a bua jaana fela a re, “A ko O ntlogele; O se ka wa leka go ntsietsa. Ngwanake o tlhokafetse.” Mme letsatsi lengwe le lengwe o ne a a tle a itlhaganelele kwa ntle go ya go lebelela tsela e ngwana wa gagwe a neng a tsamaile ka yone. A sa ikanye matlho ape fa e se a gagwe fela. E re fela fa letsatsi le se na go phirima a bo a boela gae, go ya go lala a lela, a dumaela bosigo jotlhe, a palelwa ke go thulamela.

E rile morago ga malatsi a a lesome le bone a go ja modiro a Raguele o neng a ikanne go a tshegeletsa go ja nyalo ya morwadie, Tobiase a tla mo go ene a mo raya a re, “A ko O mme ke tsamaye, jaanong; rre le mme ba tšhwanetse ba bo ba sa tlhole ba solofela go mpona gape. Jalo he, rra, ke go kopa gore O mme ke boele kwa tlung ya ga rre; ke go boleletse maikutlo a a botlhoko a o neng a le mo go one fa ke mo tlogela.”

₈Raguele a raya Tobiase a re, “Nna, ngwanaka, nna le nna. Ke tla romela batho kwa go rrago Tobite go ya go mmolelela kaga gago.”

₉Fela Tobiase a mo pateletsa a re, “Nnyaa, rra. Ke kopa gore O ntetlelele go boela kwa tlung ya ga rre.”

₁₀Kwa ntle ga tse dintsi, Raguele a mo neela Sara mosadi wa gagwe. A neela Tobiase mhama mongwe wa khumo ya gagwe, a mo fa batlhanka le bahula, dipholo le dinku, ditonki le dikamela, diaparo le madi le dilo tsa ntlo. ₁₁Ke fa a ba tlogela gore ba tsamaye ka boitumelo. Ya re ba kgaogana jalo a bolelela Tobiase mafoko a, “O tsoge sentle, ngwanaka, O tsamaye sentle! A Morena wa legodimo a lo itumelele, wena le mosadi wa gago, Sara! Ke solofela gore e tlaa re pele ga ke tlhokafala ke bone bana ba lona.” ₁₂A raya Sara morwadie a re, “O tsamaye jaanong, morwadiaka, O ye kwa tlung ya ga matsalaago, ka gonne go tloga jaanong ke batsadi ba gago fela jaaka ba ba go neileng botshelo. O tsamaye ka kagiso, ngwanaka, ke solofela go utlwa tse di siameng fela ka ga gago, fa ke ntse ke tshela.” A ba raya a re ba tsamaye sentle mme a ba naya tsela.

Edena ene a raya Tobiase a re, “Morwa le kgaitsadiaka yo o rategang, a go itumedise Morena go go busa! Ke solofela gore ke tla tshela nako e telele gore ke be ke bone bana ba gago le morwadiake Sara pele ga ke tlhokafala. Fa pele ga Morena ke go neela morwadiake gore O mmoloke. O se ka wa bo wa re fa O ntse O tshedile wa mo utlwisa botlhoko. O tsamaye ka kagiso, morwaaka. Go tloga jaanong ke mmago mme Sara ke kgaitsadio. A rotlhe re tshele ka boitumelo malatsi otlhe a botshelo jwa rona!” Ke fa a ba atla boobabedi, a ba bona ba wela mo tseleng ka boitumelo.

₁₃Tobiase a tlogela ntlo ya ga Raguele a phuthologile maikutlo. Ya re mo boitumelong jwa gagwe a baka Morena wa legodimo le lefatshe, Kgosi ya tsotlhe tse di leng gone, a mmakela tšwelelopele e e itumedisang ya maeto a gagwe. A tshegofatsa Raguele le mosadi wa gagwe Edena ka tshegofatso e, “A e nne boitumelo jwa me gore malatsi otlhe a botshelo jwa me ke nne ke lo tlotle.”