SIRAKA 51

₁Ke tlaa go leboga, wena Morena le kgosi, mme ke go boke, wena Modimo Mmoloki wa me. Ke leboge leina la gago; ₂gonne ga O bolo go nna O ntshireletsa, O nthusa, mme wa falodisa mmele wa me tshenyego le loleme lo lo maaka le molomo o o ipopelang dilo di sele fela. Mme fa pele ga botlhe ba ba neng ba le gaufi le nna, O ne wa nthusa, wa nnamola.

₃Ka bontsi jwa boutlwelo-botlhoko jwa gagwe le ka ntlha ya leina le legolo la gago, wa nnamola mo menong a a lomang a a neng a batla go nkgarolaka, wa nnamola mo diatleng tsa ba ba neng ba senka go mpolaya, wa nnamola mo botlhokong jo ke neng ke bo boga; ₄wa nkinola mo mogoteng o o neng o nkhupeditse ka ntlha tsotlhe; wa nkgolola mo gare ga molelo o ke neng ke sa o gotsa; ₅wa ntšhwatola mo teng ga bobipo, wa nthibosa loleme lo lo sa itshekang le lefoko la maaka, ₆ebong loleme lo lo ikanneng ka maaka lo lo neng lo nkakela mo kgosing. Ke ne ka batla ke šwa, botshelo jwa me jwa gomisa go tsena mo bobipong.

₇Ba ne ba mpharafere, go se na ope yo o nkemelang; Ka batla motho yo o ka nthusang mme ga bo go se na ope.

₈Ke fa ke gakologelwa boutlwelo-botlhoko jwa gago, Morena, le ditiro tsa gago tse O sa bolong go nna O di dira, jaaka O a tle O golole ba ba solofelang thuso mo go wena ka boitshoko, O bo O ba namole mo diatleng tsa baba ba bone.

₉Mme ya re ke le mo lefatsheng ka romela kopo ya me kwa godimo, ka kopa gore O nkgolole mo losong.

₁₀Ka bitsa Morena, Ra-Morena wa me, ka re, “O se ka wa ntlogela mo malatsing a pitlagano ya me, mo nakong e ke se nang mothusi yo o ka nthusang go tlhabantsha baikgogomosi ka yone. Ke tlaa ne ke sale ke ntse ke boka leina la gago mme ke opela maboko a lone ka tebogo.”

₁₁Mme kopo ya me e ne ya utlwiwa, gonne O ne wa maphalodisa tshenyego, wa nkgolola mo nakong e ya bosula.

₁₂Ke gone ka moo ke tlaa go lebogang ke bo ke go boka; mme ke baka leina la Morena.

₁₃E rile ke sa le mmotlana pele ga ke eta, mo dithapelong tsa me ka kopa botlhale ka tlhwaafalo.

₁₄Ke ne ke a tle ke bo kope fa pele ga Felo ga Boitshepo mme ke tlaa nna ke bo kopa go fitlhelela bokhutlo.

₁₅Go tswa mo go thunyeng ga jone go fitlhelela moretlwa wa jone o butswa, pelo ya me ga e bolo go nna e bo itumelela. Lonao lwa me lo tsamaile ka tsela e e tlhamaletseng, ke ntse ke gata mo bo gatileng gone fa e sale ke le mmotlana.

₁₆Ka sekega tsebe go le gonnye mme ka bo amogela, ka bo ka rutwa thata.

₁₇Ke ka ntlha ya jone ke tsweletseng pele. A go galalediwe ene yo o mphileng botlhale.

₁₈Gonne ke ikaeletse go bo dirisa. Ke ne ka tlhwaafalela go latela se se molemo, mme ga nkitla ke swaba.

₁₉Moya wa me o ne wa lwela go nna najo; ka tlhokomela thata go tshegetsa Molao; ka tsholeletsa mabogo a me kwa legodimong, mme ka lelela go sa bo itseng.

₂₀Ke ne ka retolelela moya wa me kwa go jone, mme ka boitshepo ka bo bona; ka gonne ke sale ke ntse ke tlhomile pelo ya me mo go jone go tšwa tshimologong, ga nkitla ke bo ke hularwa.

₂₁E rile pelo ya me e eletsa thata go bo bona, ka fitlhela jaanong ke bonye loruo lo lo molemo.

₂₂Mme Morena a ntuela ka go nnaba loleme. lo ke tla mo opelelelang mayoko ka lone.

₂₃Nkatamelang, lona ba lo iseng lo rutwe, nnang lo le mo sekoleng sa me.

₂₄Lo ngongoregelang kaga go tlhoka dilo tse, fa mewa ya lona e di eletsa thata jaana?

₂₅E ne ya re ke tswa molomo ka bua ka re, “Bo rekeng kwa ntle ga madi. ₂₆Lo tsenye melala ya lona ka fa tlase ga jokwe ya jone, mme lo mme mewa ya lona e rutwe. Ga bo batlelwe kgakala.”

₂₇Lo ka nna lwa iponela le lona ka mo matsapa a me a neng a se magolo ka teng, mme ke ipapaletse kagiso e ntsi.

₂₈Lo ithekeleng thuto ka selefera e ntsi, mme ka ntlha ya jone lo tla bapala gouta e ntsi, ₂₉a mewa ya lona e itumelele boutlwelo-botlhoko jwa Morena; a lo ko lo se ka lwa tlhabisiwa ditlhong ke go mmaka.

₃₀Lo dire tiro ya lona pele ga nako e e beilweng, mme ene e tlaa re ka nako ya gagwe a lo duele.