SIRAKA 41

₁Oh loso, kana ruri go botlhoko jang fa motho yo o tshelang ka kagiso mo loruong lwa gagwe a go gopola, motho yo o se nang matšhwenyego a moya, yo o letlhogonolo mo dilong tsotlhe. yo le gone a sa ntseng a na le thata ya go ipha.

₂Oh loso, katlholo ya gago e amogelwa ka pelo e tšhweu ke motho yo o tlhokang, kgotsa yo o setseng a koafaditšwe ke botsofe, a tshwenngwa ke sengwe le sengwe, a sa tlhole a kgatlhwa ke sepe, a se na boitshoko.

₃O se ka wa tshaba katlholo ya loso. O gakologelwe ba ba neng ba tshela pele ga gago le ba ba sa ntseng ba tla tshela morago ga gago.

₄Katlholo e ke katlholo e Morena a atlhotseng dibopiwa tsotlhe ka yone. Jaanong ke eng O gana selo se se itumedisang Mogodimodimo? Le fa boleele jwa botshelo jwa gago e ka nna dingwaga di le some, kgotsa di le lekgolo, kgotsa di le sekete, ga O na go sekisediwa boleele jwa jone kwa bobipong.

₅Bana ba baleofi ke dikhutsanyana tse di tlhoegileng, ba ba kgobokanelang mo marakanelong a baikepi.

₆Bošwa jwa bana ba baleofi bo tšhwanetse gore bo bo bo nyelele, lotso lwa bone lo tlaa tlhola lo tlhorontshitswe ka dikgalo.

₇Bana ba monna yo o bosula ba tlaa mmona molato ka gore ba kgalwa ka ntlha ya gagwe.

₈Lo latlhegile lona baikepi, lona ba lo tlogetseng Molao wa Modimo, Mogodimodimo.

₉E rile lo tsalwa, lwa bo lo tsalelwa go hutsiwa, mme e tlaa re lo šwa khutso eo e nne seabe sa lona.

₁₀Sengwe le sengwe se se tšwang mo mmung se boela mo go one; ka mokgwa o o tšhwanang, baikepi ba tšwa mo khutsong ba tsene mo tshenyegong.

₁₁Batho ba hutsafalela bašwi ba bone, fela leina le le se nang tlotlo la baleofi le tlaa phimoga.

₁₂O tlhokomele go itsege ka tlotlo ga gago, gonne O tlaa nna nago nako e telele go feta mekoa e e sekete ya gouta.

₁₃Botshelo jo bo itumedisang bo nna malatsinyana mangwe fela, fela go itsege ka tlotlo go nnela ruri.

₁₄Tshegetsang dilo tse ke lo di rutileng, lona bana ba me, mme lo nne le kagiso. Botlhale jo bo fitlhilweng le letlotlo le le sa supiweng kana ruri ke dilo tse di thusang eng?

₁₅Motho yo o fitlhang boeleele jwa gagwe o botoka go na le motho yo fitlhang botlhale jwa gagwe.

₁₆Jaanong, lo nne le ditlhong ka mo ke tla lo bolelang ka teng, gonne ga se ditlhong dingwe le dingwe tse motho a tšhwanetseng go na natso, le gone ga se maemo mangwe le mangwe a lobaka a a bonwang ke botlhe gore a siame, ₁₇lo tlhabisiwe ke boitshwaro jo bo itshekologileng ditlhong fa pele ga rraalona le fa pele ga mmaalona, go bua maaka le gone go lo tlhabise ditlhong fa pele ga kgosana kgotsa mmusi.

₁₈O tlhabisiwe ditlhong ke go dira phoso fa pele ga moatlhodi kgotsa molaodi. O tlhabisiwe ditlhong ke boleo fa pele ga phuthego ya batho.

₁₉O tlhabisiwe ditlhong ke tiro ya tsietso fa pele ga molekane wa gago, le fa pele ga tsala ya gago. O tlhabisiwe ditlhong ke go utšwa mo tikologong e O nnang mo go yone.

₂₀O tlhabisiwe ditlhong ke go roba maikano le kgolagano; O tlhabiwe ke ditlhong go tlhoma dikgono mo godimo ga tafole.

₂₁O tlhabisiwe ditlhong ke go ntsha dimpho fa pele ga batho ba ba di nyatsang.

₂₂O tlhabiwe ke ditlhong go leba mosadi wa boitshwaro jo bo maswe. O tlhabiwe ke ditlhong go hularela wa losika lwa gago.

₂₃O tlhabiwe ke ditlhong go tlhokomologa batho ba ba go dumedisang. O tlhabiwe ke ditlhong go itseela seabe sa motho yo mongwe kgotsa mpho ya gagwe. O tlhabiwe ke ditlhong go ferea mosadi wa motho yo mongwe.

₂₄O tlhabiwe ke ditlhong go ratana le mohula wa gagwe, O se ka wa bo wa atamela bolao jwa gagwe.

₂₅O tlhabiwe ke ditlhong go gobolola fa pele ga ditsala tsa gago. E se ka ya re O sena go fa motho mpho O bo O mo kgala.

₂₆O tlhabiwe ke ditlhong go boelelela tshebo le go tlotla ka yone, le go senola diphiri tse go tulweng O se ka wa di senola.

₂₇Ke gone O tla itseng gore ditlhong tota ke eng, mme O tla fitlhela e le gore O ratwa ke mongwe le mongwe.