SIRAKA 3

₁Bana, ntheetsang, nna rraalona, lo dire se ke se lo bolelelang, gore lo bolokege.

₂Gonne Morena o tlotla rabana ka bana ba gagwe, mme o emela tshiamelo ya mmabana go laola bana ba gagwe.

₃Mongwe le mongwe yo o tlotlang rraagwe o duelela dibe tsa gagwe.

₄Yo o tlotlang mmaagwe o tshwana le motho yo o ikgobokanyetsang letlotlo la khumo.

₅Mongwe le mongwe yo o tlotlang rraagwe o tlaa itumedisiwa ke bana ba e leng ba gagwe; e tlaa re a rapela a utlwiwe.

₆Yo o tlotlang rraagwe o tlaa tshela nako e telele. Yo o dirang gore mmaagwe a wele makgwafo o bontsha gore o ikobela Modimo.

₇O direla batsadi ba gagwe jaaka a direla Morena.

₈Tlotlang rraalona ka se lo se dirang le se lo se buang, gore a tle a lo tshegofatse.

₉Gonne tshegofatso ya rabana e tiisa matlo a bana ba gagwe, mme khutso ya mmabana e thubaka methao ya one.

₁₀Lo se ka lwa ipelela ditlhong tse di welang rraalona, gonne ditlhong tsa rraalona ga di supe tlotlo ya lona.

₁₁Ka gore tlotlo ya motho e tšwa mo tlotlong e a tlotlang rraagwe ka yone, mme mmabana yo o tlontlololwang, ke sekgobo sa bana ba gagwe.

₁₂Ngwanaka, tlamela rrago mo botsofeng jwa gagwe, mme O se ka wa ba wa mo utlwisa botlhoko fa a ntse a tshela.

₁₃Le fa tlhaloganyo ya gagwe e ka nna bokoa, O mo tlhomogele pelo. E se ka ya re O itekanetse, O kwenne wa mo nyatsa, ₁₄gonne bomolemo jo O bo direlang rrago ga bo kitla bo lebalwa, bo tlaa duelela dibe tsa gago.

₁₅Mo malatsing a dipitlagano tsa gago e tlaa re bo gakologelwa bo go thuse, dibe tsa gago di tlaa nyelela jaaka kgogotšhwaane e e gakolosiwang ke letsatsi.

₁₆Motho yo o latlhang rraagwe o itšhwanela fela le motlhapatsi, mme mongwe le mongwe yo o galefisang mmaagwe o hutsitšwe ke Morena.

₁₇Ngwana, dira ditiro tsa gago ka bonolo, mme O tlaa ratega go feta motho yo o fang ka bofafalele.

₁₈Fa O le mogolo, boikokobetso jwa gago le jone bo nne bogolo, ₁₉mme Morena o tlaa go rata; ₂₀gonne, le mororo thata ya Morena e le kgolo, o ntse a amogela tlotlo e e tšwang mo go ba ba ikokobetsang.

₂₁O se ka wa leka go tlhaloganya dilo tse di go palelang go di tlhaloganya, kgotsa wa keleka se O se nang thata ya go se keleka.

₂₂Tlhoma mogopolo wa gago mo go se O se abetšweng, ga O tlhoke go itšhwenya ka masaitseweng.

₂₃O se ka wa itlhakatlhakanya le dilo tse di go fetileng, gonne dilo tse O setseng O di rutilwe di setse di le dikgolo thata mo tlhaloganyong ya motho.

₂₄Gonne go tlhomamisa dilo motho a ise a bone sentle go timeditse ba le bantsi, mme megopolo e e se nang tlhaloganyo e kgweleagantse dikakanyo tsa bone.

₂₅Lesedi ga O kitla O nna nalo fa O se na matlho; fa O sa itse O se ka wa leka go bontsha gore O a itse.

₂₆Motho yo o tlhogo e thata o tlaa felela mašwe, mme mongwe le mongwe yo o ratang kotsi o tlaa šwela mo go yone.

₂₇Motho yo o tlhogo e thata o imelwa ke matšhwenyego, mme moleofi o tlhatlaganya dibe.

₂₈Ga go na phodiso ya go fodisa bolwetsi jwa moikgogomosi, gonne semela sa bosula se itsetsepetse ka medi mo go ene.

₂₉Mogopolo wa motho yo o botlhale o tlaa nnela go akanya diane, mme motlhalefi o eletsa go na le moreetsi wa tsebe e ntlha.

₃₀Metsi a tima molelo o o tutumang, mme go ntsha dikatso go duelela dibe.

₃₁Mongwe le mongwe yo o thusang ba bangwe o akanyetsa malatsi a a tlang, mme e tlaa re a wa a bone ba ba ka mo tshegetsang.