SIRAKA 28

₁Morena o tlaa busolosa motho yo o ipusolosetsang, ene Morena yo o tlhokomelang palo le mofuta wa dibe tsotlhe.

₂O itšhwarele mokaulengwe wa gago fa a go utlwisitse botlhoko, mme e tlaa re O rapela, O itšhwarelwe dibe.

₃A motho o ka batla go tlhomogelwa ke Morena pelo, fa ene ka esi a tshwere yo mongwe ka pelo?

₄O ka rapelela dibe tsa gagwe jang, fa ene a sa utlwele motho yo o tšhwanang nae botlhoko?

₅Ke mang yo o tlaa mo itšhwarelang dibe, fa ene, sebopiwanyana sa nama, a rata go ila ba bangwe?

₆O gakologelwe dilo tsa bofelo, mme O tlogele go tlhoa, O gakologelwe tshenyego le loso, mme O tshele ka melao.

₇O gakologelwe melao, O se ka wa tlhoa mokaulengwe wa gago, O gakologelwe kgolagano ya Mogodimodimo, mme O itebatse kgopiso.

₈Ikgoge mo dikomanong mme o tlaa fokotsa go leofa ga gago, gonne motho yo o bogale o tsosa dikomano.

₉Moleofi o jala matšhwenyego fa gare ga ditsala, a tsenye diphapaano fa gare batho ba ntse ka kagiso.

₁₀Molelo o tuka ka fa dibeso di ntseng ka teng, mme dikomano le tsone di anama ka fa di kgoberwang ka teng; Motho o galefa fela ka mo a leng thata ka teng, mme go gakala ga gagwe go tlaa golela godimo fela ka fa a humileng ka teng.

₁₁Komano ya tshoganyetso e tlhosetsa molelo, mme kganetsanyo ya ka pejana e isa polaong.

₁₂Fa O ka futswela tlhase e tlaa tuka, fa O e kgwela mathe e a tima, mme ditiro tse pedi tse, di tšwa mo molomong wa gago.

₁₃A go hutsiwe motho yo o ratang ditshebo le yo o tsietsang, gonne O bolaile batho ba le bantsi ba ba neng ba tshela ka kutlwano.

₁₄Loleme loo lwa boraro lo lo itlhakanyang lo tshikintse batho ba le bantsi, lwa ba phatlalatsa le ditšhaba tsotlhe, lwa senya metse e e tiileng, lwa pitikolola matlo a magosana.

₁₅Loleme lo lwa boraro lo ntshitse basadi ba ba siameng mo matlong le mo magaeng, lwa ba amoga tuelo e e neng e ba tshwanetse ka ntlha ya tiro e ba neng ba e dirile ka thata.

₁₆Mongwe le mongwe yo o lo reetsang ga a kake a bo a na le kagiso mo moyeng wa gagwe, mme ga a kitla a bo a tlhola a tshela ka kagiso.

₁₇Go šapa ga seme go rurubatsa letlalo, fela go šapa ga loleme go roba marapo.

₁₈Batho ba le bantsi ba bolailwe ke go tlhabiwa ka tšhaka, mme ba le bantsi go feta moo ba bolailwe ke loleme.

₁₉Go sego motho yo o nnileng a lo tidisiwa, yo o iseng a ke a utlwe kgakalo ya lone, yo o iseng a ke a tsamaye a sikere jokwe ya lone, kgotsa a bofiwe ka dikeetane tsa lone; ₂₀Gonne jokwe ya lone ke jokwe ya tshipi; dikeetane tsa lone ke dikeetane tsa kgotlho.

₂₁Loso lo lo bolayang ka lone ke loso lo lo boitshegang, e bile Bobipo bo botoka.

₂₂Ga lo kake lwa kgona basiami, ga ba kitla ba ša mo dikgabong tsa lone.

₂₃Botlhe ba ba tlogelang Morena ba tlaa wela mo go lone, lo tlaa tuka mo gare ga bone, lo ka se ka lwa timiwa, lo tlaa ba saelediwa jaaka ditau, lo ba gagolake jaaka lengau.

₂₄O tlhokomele, O agelele dilo tsa gago ka legora le mangana. O lotlelele selefera le gouta ya gago, ₂₅O bo O direla mafoko a gago dikale le dilekanyo, molomo wa gago O o tšwala ka lebati le le nang le diberebere.

₂₆O tlhokomele, O se ka wa bo wa kgopega, e se re kgotsa wa wela mo mabogong a yo o go laletseng.