SIRAKA 17

₁Morena o dirile motho ka mmu, go mmusetsa mo go one gape.

₂A naya batho palo e e lekantšweng ya malatsi, a bo a ba naya thata ya go busa sengwe le sengwe mo lefatsheng.

₃A tsenya mo go bone thata e e tšhwanang le ya gagwe, mme ya re a ba dira a ba tšhwantshanya nae.

₄A dira gore ditshedi tsotlhe di boife motho, a mo dira gore a laole diphologolo le dinonyane.

₅Ba amogela dithata di le tlhano mo Moreneng tse ba di dirisang, ya borataro e ba neng ba e fiwa e ne ya nna seabe mo tlhaloganyong, ya bosupa ya nna kakanyo; e leng setlhalosi sa dithata tsa gagwe.

₆A ba direla molomo le loleme, matlho le ditsebe, mme a ba naya pelo gore ba akanye ka yone.

₇A ba tlatsa kitso le tlhaloganyo mme a ba senolela bomolemo le bosula.

₈O ne a tsenya lesedi la gagwe mo dipelong tsa bone go ba bontsha bontlentle jwa ditiro tsa gagwe.

₉Mme a ba naya thata ya go anamisa mafoko a gagwe ka bosakhutleng.

₁₀Ba tlaa baka leina la gagwe le le boitshepo, fa ba ntse ba bolela ditiro tsa gagwe tse dintlentle.

₁₁O ne a baya kitso fa pele ga bone. mme a tsenya molao wa botshelo mo go bone.

₁₂A dira kgolagano e e sa khutleng nabo, mme a ba senolela dikatlholo tsa gagwe.

₁₃Matlho a bone a ne a bona borena jwa gagwe jo bo galalelang, mme ditsebe tsa bone tsa utlwa kgalalelo ya lentšwe la gagwe.

₁₄O ne a ba raya a re, “Lo ikefeng mo bosuleng jotlhe.” A naya mongwe le mongwe molao mabapi le mokaulengwe wa gagwe.

₁₅Ditsela tsa bone di tlhola di le ka fa tlase ga leitlho la gagwe, ga di kake tsa bo tsa fitlhiwa gore a se ka a di bona.

₁₆Fa ba sa ntse ba le bannye fela ditsela tsa bone di sekametse mo bosuleng, mme ba palelwa ke go itirela dipelo tsa nama go tsaya manno a tsa leje.

₁₇Gonne e rile a kgaoganya ditšhaba tsa lefatshe lotlhe, a baya balaodi go busa setšhaba sengwe le sengwe, fela Iseraele e ne ya nna seabe se e leng sa Morena, ₁₈yo, ka e le ngwana wa ntlha, a mo godisang ka thuto, mme a mo nayang lesedi la lorato lwa gagwe, a se ka a bo a mo tlhokomologa.

₁₉O bona ditiro tsa bone di bonala fela jaaka letsatsi, mme o tlhola a tlhomile matlho a gagwe mo ditseleng tsa bone.

₂₂O bona dikatso tsa motho di tshwana le mhitshana wa sekano, mme o rata bopelo jwa motho jaaka thaka ya leitlho la gagwe.

₂₃Tsatsi lengwe o tlaa ema, a ba duele, a ba busetse ka mo ba tšhwanelwang ka teng.

₂₄Fela ba ba ikotlhayang o ba letlelela go boa, a bo a kgothatsa ba ba neng ba re ba itlhoboga.

₂₅Boelang kwa Moreneng, mme lo tlogele sebe, mo kopeng lo lebaganye nae mme lo fokotse kgopiso ya lona.

₂₆Boelang kwa go Mogodimodimo mme lo hulareleng boikepi, lo ile sengwe le sengwe se se bosula.

₂₇Ke mang yo o tla bokang Mogodimodimo kwa Bopibong, fa batshedi ba sa dire jalo ka go mo galaletsa?

₂₈Baswi ga ba itse go boka fela jaaka batho ba ba se yong, ke ba ba tshelang le ba ba itekanetseng fela ba ba ka bakang Morena.

₂₉Kana boutlwelo-botlhoko jwa Morena bo bogolo jang! le boitšhwarelo jo a itšhwarelang ka jone botlhe ba ba sokologelang kwa go ene!

₃₀Motho ga a kake a rua dilo tsotlhe, gonne morwa motho ga a nnele ruri.

₃₁Ke eng se se phatsimang go feta letsatsi? Mme le fa go ntse jalo le tle le fifale. Nama le madi ga di akanye sepe fa e se boleo fela.

₃₂O keleka mephato ya loapi lo lo kwa godimodimo, ka batho botlhe bone e le lorole le melora fela.