SIRAKA 9

₁O se ka wa boulela mosadi wa gago yo O mo ratang, kgotsa wa mo ruta bosula, e se re kgotsa wa ikutlwisa botlhoko.

₂O se ka wa ineela mosadi ope ka pelo ya gago yotlhe gore a bo a laole thata ya gago.

₃O se ka wa tlwaelana le seaka, e se re kgotsa wa wela mo diraing tsa sone.

₄O se ka wa bo wa nna wa diega le ngwanyana wa seopedi, e se re kgotsa wa wela mo dikokisong tsa gagwe.

₅O se ka wa tlhoma matlho a gago mo kgarebaneng, e se re kgotsa wena le yone lwa otlhaiwa ka kotlhao e le nngwe fela.

₆O se ka wa ineela diaka ka pelo ya gago yotlhe, wa tloga wa latlhegelwa ke bošwa jwa gago.

₇O se ka wa gadimaka mo mebileng ya motse, kgotsa wa nnela go sasanka mo dikgokgotshwaneng tsa one.

₈O se ka wa leba mosadi yo montle go feta selekanyo kgotsa wa tlhoma matlho a gago mo bontleng jo e leng jwa yo mongwe. Bontle jwa mosadi bo timeditse batho ba le bantsi. Bo gotsa dikeletso tse di maswe jaaka molelo.

₉O se ka wa nnela go tlotla le mosadi yo o nyetšweng, kgotsa wa nna nae mo tafoleng lo nwa bojalwa jwa mofine, e se re kgotsa wa ineela dikokiso tsa gagwe, mme ya re O gotela wa relela mo tshenyegong ya gago.

₁₀O se ka wa latlha tsala ya gago e kgologolo. E ntšha ga e kitla e tšhwana nayo. Tsala e ntšha e tšhwana le bojalwa jwa mofine jo boša. Fela jo bo setseng bo le bogologolo bo tlaa go natefelela.

₁₁O se ka wa eletsa tšwelelopele ya moleofi; ga O itse gore tiro ya gagwe e tlaa fetoga eng.

₁₂O se ka wa itumelela se se itumedisang baikepi. O gakologelwe gore ga ba na go tlogelwa fela ba sa otlhaiwe go fitlhelela ba šwa.

₁₃O ikgaphele kgakala le motho yo o ka nnang a bolaya, mme ga O kitla O tšhwenngwa ke poifo ya go šwa. Fela fa O ka mo atamela, O se ka wa bo wa tsamaya ka bofafalele, e se re kgotsa a go amoga botshelo jwa gago. O itse gore O tsamaya fela mo gare ga dirai, le gore O tsamaya O iketlile mo motseng wa tlhabano.

₁₄Ka mo O ka kgonang ka teng O ikaelele go itsane le bakaulengwe ba gago, akantshanya le batho ba ba botlhale.

₁₅Fa O batla go tlotla, tlotla le batho ba ba botlhale, mme dipuisanyo tsa lona di nne ka ga Molao wa Mogodimodimo.

₁₆O je le basiami, mme O ikgantshe ka go boifa Morena.

₁₇Tiro e bakiwa ka ntlha ya botswerere jwa modiri wa yone, ke gone ka moo batho ba tlaa bakang moeteledi-pele wa bone fa ba utlwa mafoko a gagwe a a botlhale.

₁₈Motho yo o buang bobe o a tshabiwa mo motseng wa ga gabo, motho yo o sefafalele mo puong o a tlhoiwa.