DIPESALEME 70
Dafita o rapela Modimo gore o mo golole ka bonako
1Pesalome ya ga Dafita ya kgopotso mo tshupelong ya tebogo e e kwaletsweng moopedisi.
2Modimo, akofa o nkgolole;
Morena, itlhaganele o nthuse.
3A ba ba batlang go mpolaya
ba tlhajwe ke ditlhong,
ba sosobane;
a ba ba kgatlhwang ke tlalelo ya me
ba kate ka morago,
ba tlhajwe ke kgala.
4A ba ba reng: “Ahee, ahee!”
ba boele kwa morago
ka ntlha ya ditlhong tsa bona.
5A botlhe ba ba go batlang
ba go itumelele, ba ipele;
a ba ba ratang pholoso ya gago
ba nne ba bue ba re:
“Modimo o mogolo.”
6Mme nna ke motlalelwi,
ke mohumanegi;
Modimo,
a o ko o tle go nna ka bonako.
Ke wena thuso ya me
le mopholosi wa me;
Morena, o se diege.
© Bible Society of South Africa 1970, 1987, 2007. Used by permission. All rights reserved.
