DIPESALEME 59

₂Modimo wa me,

nnamolele mo babeng ba me,

o ntshireletse

mo go ba ba ntsogelang.

₃Nnamolele

mo go ba ba dirang bosula,

o nthuse mo banneng

ba ba tshololang madi.

₄Gonne bona,

ba laletse botshelo jwa me,

diganka di a ntlhasela, ke se kgopo,

ke sa leofa, Morena.

₅Ba a taboga, ba a ipaakanya,

ke se na molato ope.

Tsoga go nkgatlhantsha, o bone.

₆Ee, Morena,

Modimo wa masomosomo,

wena Modimo wa Iseraele,

thanya o betse baheitane botlhe,

mme o se ka wa itshwarela ope

wa baikepi ba boikanyologo. Sela.

₇Ba nne ba boe maitsiboa,

ba lele jaaka dintšwa,

ba dikologe mo motseng.

₈Bona, ba nyefola ka melomo;

ditšhaka di mo melomong ya bona;

gonne ba re:

“Ke mang yo o utlwang?”

₉Mme wena, Morena,

o a ba tshega,

o sotla baheitane botlhe.

₁₀Wena thata ya ka,

ke tla go ela tlhoko;

gonne wena Modimo

o phemelo ya ka.

₁₁Modimo wa me o tla nkgatlhantsha

ka bopelotlhomogi jwa ona;

Modimo o tla ntebisa

baba ba me ka boitumelo.

₁₂O se ka wa ba bolaela ruri,

gore batho ba me

ba tle ba se ka ba lebala.

Ba kgarakgatshe ka thata ya gago,

o ba dige, wena Morena,

thebe ya rona.

₁₃Boleo jwa bona

ke lefoko la melomo ya bona.

A ba tshwarwe

mo boikgantshong jwa bona,

le ka ntlha ya dithogakano

le dikako tse ba di buang.

₁₄Ba nyeletse ka kgakalo,

ba nyeletse gore ba se ka ba tlhola

ba le yo,

mme ba lemoge gore Modimo

o busa mo go Jakobe

go ya kwa dikhutlong tsa lefatshe.

Sela.

₁₅Ba nne ba boe maitsiboa,

ba lele jaaka dintšwa,

ba dikologe mo motseng.

₁₆Ba kgarakgatshegela dijo;

fa ba sa kgore, ba a ngongorega.

₁₇Mme nna ke tla opela

ka ga thata ya gago,

ke tla dudueletsa

bopelotlhomogi jwa gago

mo mosong mongwe le mongwe;

gonne o ne o le phemelo ya me

le botshabelo jwa me

ka letsatsi la tlalelo.

₁₈Wena thata ya me,

ke tla go opelela;

gonne wena Modimo

o phemelo ya me,

Modimo o o bopelotlhomogi

wa me.