DIPESALEME 24

Lefatshe ke la Morena

le tsotlhe tse di mo go lone;

lefatshe

le ba ba agileng mo go lone.

₂Gonne o le theile mo mawatleng,

a le tlhomamisa mo dinokeng.

₃Ke mang yo o tla tlhatlogelang

mo thabeng ya Morena?

Ke mang yo o tla emang

mo felong ga gagwe ga boitshepo?

₄Ke ena yo o diatla di phepa,

yo o pelo e itshekileng;

yo o sa lebiseng mowa wa gagwe

kwa boithamakong,

a sa ikanele maaka.

₅Ena yoo o tla amogela tshegofatso

mo Moreneng

le tshiamo mo Modimong

wa pholoso ya gagwe.

₆Ke lone losika

lwa ba ba o tlhokomelang,

ba ba batlang sefatlhego sa gago,

Modimo wa ga Jakobe. Sela.

₇Lona dikgoro, tsholetsang ditlhogo;

lona mejako ya bogologolo tala,

itsholetseng gore

Kgosi ya kgalalelo e tsene.

₈Mme Kgosi ya kgalalelo ke mang?

Ke Morena yo o thata,

yo o bonatla,

Morena, senatla mo tlhabanong.

₉Lona dikgoro,

tsholetsang ditlhogo,

ee, itsholetseng,

lona mejako ya bosakhutleng,

gore Kgosi ya kgalalelo e tsene.

₁₀Mme Kgosi eo ya kgalalelo

ke mang?

Ke Morena wa masomosomo –

ke ena Kgosi ya kgalalelo. Sela.