DIPESALEME 21

₂Morena,

kgosi e itumelela thata ya gago,

e dudueletsa thuso ya gago

bogolo jang ne!

₃O e neile

se pelo ya yona e se eletsang;

ga o a ka wa gana kopo

ya molomo wa yona. Sela.

₄Gonne o ne wa e kgatlhantsha

ka ditshegofatso tsa molemo,

wa e rwesa tlhogo

ka serwalo sa gouta e ntlentle.

₅E kopile bophelo mo go wena,

o bo e neile,

botshelo jo boleele ka gale

le ka bosakhutleng.

₆Tlotlo ya yona e kgolo

ka thuso ya gago;

o beile tlotlo le borena mo go yona.

₇Gonne o e beile go nna lesego

le legolo thata ka bosakhutleng,

wa e itumedisa ka boitumelo

fa pele ga gago.

₈Gonne kgosi e ikanya Morena;

mme ka bopelotlhomogi

jwa Mogodimodimo

ga e kitla e theekela.

₉Letsogo la gago le tla fitlha

kwa babeng botlhe ba gago;

letsogo le le jang

le tla tshwara ba ba go tlhoileng.

₁₀O tla ba direla

jaaka pesetso ya molelo,

mogang o ipontshang.

Morena o tla ba metsa

mo bogaleng jwa gagwe,

molelo o tla ba nyeletsa.

₁₁Leungo la bona o tla le nyeletsa,

o le tlosa mo lefatsheng,

le losika lwa bona

mo baneng ba batho.

₁₂Ba ne ba go gopoletse bosula,

ba go logetse maano,

mme ba sa nonofa go a dirafatsa.

₁₃O tla ba hularisa ka go lebisa

dithapo tsa bora jwa gago

kwa difatlhegong tsa bona.

₁₄Morena,

nanoga o bonale ka thata ya gago;

mme re tla opelela

bonatla jwa gago, re bo baka.