DIPESALEME 14

Lesilo le bua mo pelong ya lone

le re:

“Modimo ga o yo.”

Ba a senya, ba dira tsa maila;

ga go ope yo o dirang molemo.

₂Morena o lebile bana ba batho

a le mo legodimong,

go bona,

fa go le mongwe yo o botlhale,

yo o batlang Modimo.

₃Ba fapogile botlhe,

ba senyega mmogo.

Ga go ope yo o dirang molemo,

le e seng a le mongwe fela.

₄A botlhe ba ba dirang tshiamololo

ga ba na kitso,

bona ba ba metsang batho ba me

jaaka ba ja senkgwe?

Morena ga ba mmitse.

₅Foo ba tla tshoga

mo go boitshegang;

gonne Modimo

o mo losikeng lo lo siameng.

₆Maano a ba a logelang mmogisegi

a tla ba tlhabisa ditlhong,

gonne Morena

ke botshabelo jwa gagwe.

₇E kete pholoso ya Iseraele

e ka bo e tla e e tswang mo Sione!

E ne e tla re Morena a fetola

tatlhego ya morafe wa gagwe,

Jakobe a duduetse,

Iseraele a itumele.