DIPESALEME 122

E rile ba nthaya ba re:

“A re yeng kwa Ntlong

ya Morena!” ka itumela.

₂Dinao tsa rona di eme

mo dikgorong tsa gago,

Jerusalema.

₃Wena, Jerusalema,

yo o agilweng jaaka motse

o o kitlantsweng sentle,

₄kwa ditso di tlhatlogelang teng,

e bong ditso tsa Morena:

Ke molao wa Baiseraele

go baka leina la Morena teng.

₅Gonne ditulo tsa katlholo

di eme teng,

ditulo tsa ntlo ya ga Dafita.

₆Kopang kagiso ya Jerusalema;

a ba ba go ratang

ba phele ka iketlo.

₇A go nne kagiso mo kagong

ya phemelo ya lobota lwa gago,

le boiketlo mo matlong a gago

a borena.

₈Ke tla bua ka ntlha ya bana

ba ga rre le dilekane tsa me ke re:

“A kagiso e nne mo go wena!”

₉Ke tla go batlela se se molemo

ka ntlha ya Ntlo ya Morena,

Modimo wa rona.