DIPESALEME 110

Morena o ne a raya

Morena wa me a re:

“Dula fa letsogong la me le le jang

go ya ke be ke dire baba ba gago

sebeo sa dinao tsa gago.”

₂Thobane-ya-bogosi

ya thata ya gago,

Morena o tla e otlolola

a le mo go Sione a re:

“Busa mo gare ga baba ba gago.”

₃Ka letsatsi la pololo ya gago

batho ba gago ba tla tla

ka bopelotshweu,

ba apere mekgabo ya boitshepo.

Mophato wa makau o tla tla

kwa go wena,

jaaka monyo o tsalwa ke mahube.

₄Morena o ikanne –

mme ga a kitla a dirolola ikano –

a re:

“O Moperesiti ka bosakhutleng

ka fa mokgweng

wa ga Melegi-Seteke.”

₅Morena yo o fa letsogong le le jang

la gago

o tla thubakanya dikgosi

ka letsatsi la bogale jwa gagwe.

₆O tla atlhola mo ditšhabeng,

go tlala direpa,

a thubakanya tlhogo

e e okameng lefatshe le legolo.

₇O tla nwa mo nokaneng,

a le mo tseleng,

mme ka ntlha ya moo

o tla tsholetsa tlhogo.