DIANE 3

₁Morwaaka, se lebale thuto ya me; a pelo ya gago e tshegetse ditaolo tsa me! ₂Gonne di tla go okeletsa bontsi jwa malatsi le dinyaga tsa bophelo le kagiso. ₃A lorato le boammaaruri di se go tlogele, di apare mo molaleng wa gago, o di kwale mo pelong ya gago jaaka mo letlapeng. ₄Foo o tla bona bopelonomi le botlhale jo bo molemo tse di kgatlhang Modimo le batho.

₅Ikanye Morena ka pelo yotlhe, mme o se ikaege ka tlhaloganyo ya gago. ₆Mo gopole mo ditseleng tsotlhe tsa gago, mme ene o tla siamisa ditselana tsa gago. ₇Se ikae yo o botlhale ka wesi, mme o boife Morena, o ile bosula. ₈Go dira jalo go tla fodisa mmele wa gago, go lapolosa marapo a gago. ₉Tlotla Morena ka dineo tsa khumo ya gago le tsa letlhafula la kotulo yotlhe ya gago. ₁₀Foo difala tsa gago di tla tlala letlotlo; digatelo tsa gago di tla tshologa matute a moweine.

₁₁Morwaaka, se nyatse kotlo ya Morena; le gona o se kgopisiwe ke kgalemelo ya gagwe. ₁₂Gonne Morena o a tle a otle yo a mo ratang, jaaka rraagwe motho a betsa ngwana yo o mo kgatlhang. ₁₃Go tlhogonolo motho yo o bonyeng botlhale le monna yo o bonang tlhaloganyo. ₁₄Go bo bona go gaisa go bona selefera; go nna najo go phala gouta. ₁₅Bo na le tlhwatlhwa e kgolo bogolo go dibaga tsa korale. Dilo tse dintle tsotlhe ga di lekane najo. ₁₆Boleele jwa bophelo bo mo seatleng sa jona se se jang; mo go sa molema sa jona go na le khumo le tlotlo. ₁₇Ditsela tsa jona ke ditsela tse dintle; ditselana tsotlhe tsa jona ke tsa kagiso. ₁₈Botlhale ke setlhare sa bophelo mo go ba ba bo tshwereng; ba ba itshwarelelang ka jona ba tlhogonolo. ₁₉Morena o theile lefatshe ka botlhale; a tlhomamisa legodimo ka tlhaloganyo. ₂₀Ke ka kitso ya gagwe, fa madiba a tswela, fa maru a rothisa monyo.

₂₁Morwaaka, boloka kelelelo le kakanyo; a di se tloge mo matlhong a gago! ₂₂Tsona di tla phedisa mowa wa gago; tsona e tla nna mokgabo o montle mo molaleng wa gago. ₂₃Foo ò tla tsamaya mo tseleng ya gago ò iketlile; leoto la gago ga le ne le kgotšwa. ₂₄Fa o ya go robala ga o ka ke wa boifa. Fa o robetse, boroko jwa gago bo tla nna monate. ₂₅Ga o na go boifa poitshego ya tshoganyetso, le fa e le tatlhego ya baikepi, fa e tla. ₂₆Gonne ke Morena yo ò mo ikanyang; o tla disa leoto la gago gore le se tshwarwe.

₂₇Se time ba ba tshwanetsweng ke tse di molemo, fa go le mo thateng ya gago go ba thusa. ₂₈Se ree mongwe-ka-wena o a re: “Tsamaya o tla boa! Ke tla se go naya kamoso!” etswe o na naso. ₂₉Se logele mongwe-ka-wena maano a a bosula a ntse a agile nao a go ikantse. ₃₀O se ka wa seka le motho kwa ntle ga lebaka, fa a sa go direla bosula bope! ₃₁Se fufegele monna yo o dirang ka tshiamololo, se itlhophele tsela epe ya ditsela tsa gagwe! ₃₂Gonne Morena o tenwa ke yo o kgopo, mme o kopana le ba nnete. ₃₃Morena o rogaka ntlo ya moikepi, mme lelapa la basiami o a le tshegofatsa. ₃₄Ba e leng basotli o tla ba sotla; mme ba ba ikokobetsang o tla ba tlhomogela pelo. ₃₅Boswa jwa ba ba botlhale ke tlotlo, mme masilo a tla sala le ditlhong.