DIANE 25

₁Diane tse di latelang fa le tsona ke tsa ga Salomo; di kgobokantswe ke banna ba ga Hesekia kgosi ya Juta.

₂Ke tlotlo ya Modimo go loba mafoko; ke tlotlo ya dikgosi go tlhotlhomisa mafoko go a senola.

₃Bogodimo jwa legodimo le boteng jwa lefatshe le dipelo tsa dikgosi ga di ka ke tsa tlhotlhomisiwa.

₄Fa manyela a okolwa mo selefereng, sebopiwa sa mogakolosi se tla tswa sentle: ₅A moikepi a tlosiwe jalo fa pele ga kgosi; foo sedulo sa bogosi sa yona se tla tlhomamisiwa ka tshiamo.

₆Se ipoke fa pele ga kgosi; se eme mo maemong a ba bagolo! ₇Gonne go bolelelwa go twe: “Tlhatlogela kwano!” go phala go kokobediwa fa pele ga motlotlegi yo ò mmonang ka matlho a gago.

₈Ò se ka wa potlaka go ya go seka, e se re gongwe morago ga moo wa tlhoka go itse se ò ka se dirang, fa mongwe-ka-wena a go tlhabisa ditlhong.

₉Seka kgang ya gago le mongwe-ka-wena, mme ò se ka wa senola sephiri sa yo mongwe, ₁₀e se re gongwe ba ba utlwang jalo ba go kgoba, mme nyatsego ya gago ya se ka ya khutla.

₁₁Lefoko le le buiwang ka nako ya lone le tshwana le dinamune tsa gouta tse di mo megopong ya selefera.

₁₂Mokgalemi yo o botlhale mo tsebeng ya yo o utlwang ke lenyena la gouta le mokgabo wa gouta e e sa pekwang.

₁₃Morongwi yo o ikanyegang o tshwana le maruru a semathana mo bolelong jwa kotulo mo go ba ba mo romileng; gonne o lapolosa mowa wa morena wa gagwe.

₁₄Monna yo o ipokang ka dineo, mme a sa di ntshe, o tshwana le maru le phefo tse di sa neseng pula.

₁₅Kgosi e e bogale e kgonwa ka bopelotelele; loleme lo lo bonolo lo roba marapo.

₁₆Fa ò bonye mafura a dinotshe, ò je a a go lekanyeng fela, e se re gongwe a go tena, mme wa a tlhatsa. ₁₇Ò se ka wa ya gantsi kwa ntlong ya mongwe-ka-wena, e se re gongwe wa mo tena, mme a go tlhoa.

₁₈Monna yo o supang maaka ka ga mongwe-ka-ene ke molamu le tšhaka le motswi o o bogale.

₁₉Go ikanya molotsana ka letsatsi la tlalelo ke go ikanya leino le le bodileng le lekoto le le relelang.

₂₀Go opelela yo o pelo-e-botlhoko difela go tshwana le go apola diaparo ka letsatsi le le maruru le go tshela se se botlhoko mo dinthong.

₂₁Fa mmaba wa gago a tshwerwe ke tlala, mo fe dijo; fa a nyorilwe, mo nose metsi. ₂₂Gonne o tla bo o tlhatlaganya magala mo tlhogong ya gagwe, mme Morena o tla go duela.

₂₃Phefo ya bokone e tlisa pula; loleme lo lo sebang lo ngadisa difatlhego.

₂₄Go nna mo sekhutlong mo godimo ga ntlo go phala go nna mo ntlong mmogo le mosadi yo o omanang.

₂₅Mafoko a a molemo a a tswang mo lefatsheng le le kgakala ke metsi a a maruru mo go yo o nyorilweng.

₂₆Mosiami yo o fenngwang ke moikepi ke motswedi o o gatakilweng, ke sediba se se kgoberegileng.

₂₇Go ja mafura a dinotshe thata ga go molemo; go tlhotlhomisa tse di thata go isa mo bothateng.

₂₈Monna yo o sa itseng go itshwara ke motse o o phuntsweng lobota.