DIANE 22

₁Leina le le molemo le phala khumo e kgolo; go ratwa go gaisa selefera le gouta.

₂Mohumi le mohumanegi ba a phedisanya; Morena o ba dirile botlhe.

₃E a re letlhale le bona dikotsi, le iphitlhe; mme ba ba sa tlhalefang ba fetele pele, ba wele tatlhegong.

₄Tuelo ya boikokobetso le ya go boifa Morena ke khumo le tlotlo le bophelo.

₅Mitlwa le diru di mo tseleng ya yo o sokameng; yo o bolokang bophelo jwa gagwe o a di katoga.

₆Tlwaetsa mosimane tsamao e e mo tshwanetseng; foo ga a kitla a fapoga mo go yona, le fa a tsofetse.

₇Mohumi o laola bahumanegi; moadingwi ke motlhanka wa moadimi.

₈Yo o jwalang tshiamololo o tla roba tatlhego; thupa ya kgalefo ya gagwe e tla itaya ene.

₉Yo o matlho-a-lorato o tla tshegofadiwa; gonne o nathetse ba ba tlhokang bogobe jwa gagwe.

₁₀Leleka mosotli; foo dikgang di tla fela; go seka le go nyatsa go tla khutla.

₁₁Morena o rata yo o pelo e phepa; kgosi ke tsala ya yo o e kgatlhang ka puo.

₁₂Matlho a Morena a boloka tse o di bonyeng, mme o tla diga mafoko a molotsana.

₁₃Motlapa o a re: “Tau e ka fa ntle; nka bolawa mo dipatlelong.”

₁₄Melomo ya basadi ba sele ke gopo e e boteng; yo Morena o mo galefetseng o tla wela mo go yona.

₁₅Fa bosilo bo palelela mo pelong ya mosimane, thupa ya kotlo e tla bo ntsha mo go ene.

₁₆Go gatelela yo mmotlana ke go mo humisa; go naya mohumi ke go mo tlhokisa fela.

₁₇Tlhwaya tsebe, o utlwe mafoko a matlhale, o ele kitso ya me tlhoko. ₁₈Ee, go gontle, fa o a boloka mo maikutlong a gago; foo aotlhe a tla bo a bopetswe molomo wa gago. ₁₉Ke ruta wena kajeno gore o tle o ikanye Morena ka wesi. ₂₀Kana ke go kwaletse diane tse di nang le dikgakololo le kitso, ₂₁go go ruta nnete le mafoko a a ikanyegang gore o tle o arabe yo o go botsang ka mafoko a boammaaruri.

₂₂Se thukhuthe yo mmotlana, ka a le mmotlana; le gona se gatelele mmogisegi mo lekgotleng. ₂₃Gonne Morena o tla ba emela mo tshekong, mme bathukhuthi ba bone o tla ba thukhutha bophelo.

₂₄Se tsalane le yo o mabifi; se kopane le monna yo o pelo-khutshwane, ₂₅e se re gongwe wa tlwaela mekgwa ya gagwe, wa thaela bophelo jwa gago seru.

₂₆Se nne le ba ba ikanang ka letsogo, ba ba ipofang go emela melato ya ba bangwe. ₂₇Kana fa o palelwa ke go lefa, bolao jwa gago bo tla tsewa ka fa tlase ga gago.

₂₈Se sutise molelwane wa bogologolo o borraago ba o segileng.

₂₉Fa o bona monna e le setswerere mo tirong ya gagwe, ene o ka direla dikgosi; ga se yo o ka direlang ba e leng batho fela.